Mazmure 28 - ጌሻ ማፃፋ

ፆሳይ ታዉ ጎንዳለነ ዎልቃ

ዳዊታ ማዝሙረ

¹ አቤት ጎዳዉ፥ ታ ዛላዉ፥ ታ ነና ፄጋይስ፤ ነ ታዉ ስእ ጎፓ። ነ ስእ ጊኮ፥ ታ ዱፎ ገልዳ አስ ግዳይስ።

² ማደ ኮያዳ ታ ዋስያ ዎደ፤ ኡባፈ ጌሻ ዱንካንያኮ፥ ታ ኩሽያ ምጭያ ዎደ ታ ዎሳ ስአ።

³ ኢታ ኦያ ኢታ አሳታራ ታና ጋዳ ኦይኮፋ፤ ኤንቲ ባንታ ዎዛናን ገነ ቆፕሸ፥ ባንታ ዶናን ሳሮተ ሃሳዮሶና።

⁴ ኤንታ ኦሱዋዳ ኤንታ ሴራ፤ ኤንታ ኢታተዳ ኤንታዉ ቃንፃ። ኤንታ ኩሸ ኦሱዋዳ ኤንታ ፕርዳ፤ ኤንታዉ በሲያ ኢታ ኤንታዉ ዛራ።

⁵ ኤንቲ ጎዳ ኦሱዋነ እያ ኩሸ መዋስ፥ በሰ እሞና ግሾ ጎዳይ ኤንታ ላላና፤ ዛሪድ ኤንታ ኬፀና።

⁶ ታ ዎሳ ስእዳ ግሾ ጎዳይ ጋላተቶ።

⁷ ጎዳይ ታዉ ዎልቃነ ጎንዳለ፤ ታ ዎዛናይ እያን አማነቴስ፤ ታ እያን ማደታስ። ታ ዎዛናይ እያን ኡፋይቴስ፤ ታ እያ ማዝሙረን ሳባና።

⁸ ጎዳይ ባ አሳስ ዎልቃ፤ ባ ዶርድ ካዋ አሽያ ሚፃ።

⁹ ጎዳዉ፥ ነ አሳ አሻ፤ ነባ ግድዳይሳታ አንጃ። ኤንታ ሄመይ ነና ግዳ፤ ኤንታ መርናዉ ቶካ።