Mazmure 147 - ጌሻ ማፃፋ

ፆሳይ መቅዳ ዎዛና ኮሌስ

¹ ጎዳ ጋላትተ! ኑ ፆሳ ሳቦይ ሎኦ፤ እያ ሳቦይ ኡፋይስያባነ በሲያባ።

² ጎዳይ የሩሳላመ ኦራና፤ እስራኤለፐ ድኤትዳይሳታ ሺሻና።

³ ዎዛን መቅዳይሳታ ኮሌስ፤ ኤንታ ማዱን ፓስ።

⁴ እ ፆልንቶታ ታይቡዋ ኤሬስ፤ ኤንታ ኡባ ኤንታ ሱንን ሱንን ፄጌስ።

⁵ ኑ ጎዳይ ግታ፤ እ ዎልቃማ፤ እያ አኬካስ ዛው ባዋ።

⁶ ጎዳይ አዳታ ዘምፕሴስ፤ ሽን ኢታታ ሳአን የጌስ።

⁷ ጎዳስ ጋላታ የ የፅተ፤ ኑ ፆሳስ ዲን የፅተ።

⁸ እ ሳሉዋ ሻራ ማይዜስ፤ ቢታስ እራ እሜስ፤ ዙማታ ቦላ ማታ ዶልሴስ።

⁹ መሄታስ ካ፥ ኮሻትድ ዋስያ ቁሮ ናይታስ ምያባ እሜስ።

¹⁰ እ ፓራታ ዎልቃንነ ቶራንቾታ ምኖተን ኡፋይተና።

¹¹ ሽን ጎዳይ ባዉ ያየይሳታንነ እያ ማሮታን አማነተይሳታን ኡፋይቴስ።

¹² የሩሳላመ፥ ጎዳ ጋላታ! ፅዮነ፥ ነ ፆሳ ጋላታ!

¹³ እ ነ ፐንግያ ኮበታ ምንና፤ ነ ግዶን ደእያ ነ አሳ አንጃና።

¹⁴ እ ነ ዛዋ ሳሮተን ናጋና፤ ነና ሎኦ ግስተን ካልሳና።

¹⁵ እ ባ ኪታ ቢታስ የዴስ፤ እያ ቃላይ ኤሶን ጋኬስ።

¹⁶ እ ሻች ቡሉኮዳ ምጬስ፤ ጫጋና ብዶዳ ላሌስ።

¹⁷ እ ሻቻ ሹቻዳ ሆሌስ፤ እያ ሜጉዋን ኦንካ ኤቃናዉ ዳንዳኤና።

¹⁸ እ ባ ቃላ ኪትድ ሻቻ ማይሴስ። እ ጫርኩዋ ኪትን ሃ ጎጌስ።

¹⁹ እ ባ ቃላ ያይቆባስ፥ ባ ህግያነ ዎጋ እስራኤለስ አዋጄስ።

²⁰ እ ሀራ ካዎተታስ ሄሳ ኦቤና፤ ኤንቲ እያ ህግያ ኤሮኮና። ጎዳ ጋላትተ!