Mazmure 144 - ጌሻ ማፃፋ

ፆሳይ ታዉ ሚፃ

ዳዊታ ማዝሙረ

¹ ጎዳይ፥ ታ ዛላይ፥ ጋላተቶ! ታ ኩሽያ ኦላ ታማርሴስ፤ ታ ብራታ ቶራስ ጊግሴስ።

² እ ታ ሲቆ ፆሳነ ታ ቆሰታ አትያ በሰ፤ ታ ሚፃነ ታና አሸይሳ። ታ ጎንዳለነ ታኒ ባቃታዳ አትያ በሰ፤ እ ካዎተት ታዉ ሃረታና መላ ኦስ።

³ ጎዳዉ፥ ኔኒ እያዉ ቆፓናዉ አስ አይቤ? ነ ዎዛናን እያዉ በሰ እማናዉ አሳ ናእ አይቤ?

⁴ አስ እስ ቶሆ ጫርክያ ጫርኮ መላ፤ እያ ጋላሳት አያ ኩያ መላ።

⁵ ጎዳዉ፥ ሳሉዋ ጳልቃዳ ዱገ ዎ! ደረታ ቦቻ፤ ኤንቲ ጩዮ!

⁶ ዎልአን የዳዳ ነ ሞርከታ ላላ፤ ነ ዶንግያ ዪሻን ዱካዳ ኤንታ የደ።

⁷ ቦላራ ነ ኩሽያ የዳዳ፥ ታና ዎልቃማ ሃፈ ጎቻዳ ከሳ፤ አላጋ አሳታ ኩሸፐ ታና ዎስሳ።

⁸ ኤንቲ ቱማ ሃሳይድ ኤሮኮና፤ ባንታ ኡሻቻ ኩሽያ ደንድ ዎርዶን ጫቆሶና።

⁹ ፆሳዉ ታኒ ነዉ ኦራ ማዝሙረ የፃና፤ ታሙ ሻያን ዋፀትዳ ዲን የፃና።

¹⁰ ካዎታስ ፆኖ እማሳ፤ ነ አይልያ ዳዊታ አሻሳ።

¹¹ ታና ኢታ ማሻፈ አሻ፤ አላጋ አሳታ ኩሸፐ ታና ዎስሳ። ኤንታ ዶናይ ዎርዶን፥ ኤንታ ኡሻቻ ኩሸይ ጭሞን ኩምስ።

¹² ኑ አደ ናይት ባንታ ናአተን፥ ሎኦ ድጭያ ም መላ ግዶ። ኑ ማጫ ናይት ካዎ ጋ አሌቅሳናዉ፥ ኦሰትዳ ቱቀ መላ ግዶ።

¹³ ኑ ሻለት ዱማ ዱማ ካ ቆሞን ኩሞ፤ ሄመትያ በሳን ደእያ ኑ ዶርሳት ሙኩላንነ ታሙ ሙኩላን የሎ።

¹⁴ ኑ ሚዛት ብራይሶ፤ አዉጫዮና የለትድ ዳሮ፤ ኑ ኦገታን ዋሶይ ስኤቶፎ።

¹⁵ ሀ አንጆት ጋክያ አሳት ቱማ አንጀትዳይሳታ፤ ፆሳይ ኤንታዉ ጎዳ ግድዳ አሳት አንጀትዳይሳታ።