Mazmure 140 - ጌሻ ማፃፋ

ኢታ አሳ ኩሸፐ ታና አሻ

ዳዊታ ማዝሙረ

¹ ጎዳዉ፥ ኢታታፐ ታና አሻ፤ ማካላንቾታፐ ታና ናጋ።

² ኤንቲ ኢታ ኦናዉ ማቀቶሶና፤ ጋላስ ጋላስ ኦላ ደንሶና።

³ ባንታ እንፃርሳ ሾሻ እንፃርሳዳ ቃራዮሶና፤ ኤንታ ዶናን ዎያ ማርዘይ ደኤስ። ሳላሀ

⁴ ጎዳዉ፥ ኢታታ ኩሸፐ ታና አሻ፤ ታ ቶሁዋ ቃፃናዉ ቆፕያ ማካላንቾታፐ ታና ናጋ።

⁵ ኦቶራንቾ አሳት ታዉ ፅሄ ዎሶና፤ ግተ ሂፆሶና፤ ታና ኦይካናዉ ግተ የጎሶና። ሳላሀ

⁶ ጎዳ፥ “ኔኒ ታ ፆሳ” ጋና፤ ጎዳዉ፥ ታ ዎሳ ስአ።

⁷ ኡባ ሃርያ ጎዳዉ፥ ታና አሽያ ምኑዋዉ፥ ኦላ ጋላስ ታዉ ጎንዳለ ግዳዳሳ።

⁸ ጎዳዉ፥ ኢታታስ ኤንታ አሙዋ እሞፋ፤ ኤንቲ ኦቶርቶና መላ ኤንታ ማቁዋ ፖልሶፓ። ሳላሀ

⁹ ታ ሞርከታን ታና ፆንሶፓ፤ ኤንታ ዶናፐ ከይያ ኢታይ ኤንታ ቦላ ስሞ።

¹⁰ ኤንታ ቦላ ፁግያ ታማ ቦንቆይ ቆለቶ፤ ኤንቲ ታማ ኦላን የገቶ፤ ከያናዉ ዳንዳኦና ኦላ ሆለቶ።

¹¹ ዮያማት ቢታ ቦላ ደኦፖ፤ ቡቀይሳታ ኢታባይ የደድ ኦይኮ።

¹² ጎዳይ ማንቆታስ ፕርደይሳነ መቶታንቾታስ ሞተተይሳ ኤራይስ።

¹³ ፅሎት ቱማ ነ ሱን ጋላታና፤ ሱረ አሳት ነ ስንን ዳና።