Mazmure 132 - ጌሻ ማፃፋ

ፆሳይ ፅዮነ ዶርስ

ፑደ ከይሸ የፅያ ማዝሙረ

¹ ጎዳዉ፥ ዳዊታነ እ ዳንዳእዳ መቱዋ ኡባ ቆፓ።

² ጎዳስ እ ጫቅዳይሳ፥ ዎልቃማ ግድዳ ያይቆባ ፆሳስ፥ እ ኦድዳይሳ ሀሳያ።

^3-5 ጎዳስ በሰ ጊግሳና ጋካናዉ፥ ዎልቃማ ግድዳ ያይቆባ ፆሳስ፥ ኬ ኬፃና ጋካናዉ፥ ታ ሶ ገልከ፤ ታ ሂፃን ዝንእከ። ታ አይፈይ ቅልምኤና፥ ዎይኮ ታና ስኮይ ኤከና።

⁶ ኑኒ ታቦትያባ ኤፍራታን ስእዳ፤ ይኣርመ ቢታን እያ ደምዳ።

⁷ “አነ እ ደእያ በሳ ቦስ፤ እያ ቶሆይ የያ በሳን እያ ጎይኖስ።”

⁸ ጎዳዉ፥ ደንዳ! ነ ምኖተ ማላ ግድዳ ነ ታቦትያራ ነ ኬ ገላ።

⁹ ነ ካህነት ፅሎተ ማኦ፤ ነ አሳይ ኡፋይሳን የፆ።

¹⁰ ነ አይልያ ዳዊታ ግሾ፥ ኔኒ ትይዳ ካዋ አጎፋ።

¹¹ ጎዳይ ዳዊታስ ላመቶና ጫቆ ሀይሳዳ ያግድ ጫቅስ፤ “ነ ጉልባታፐ ከይዳ፥ ነ ናይታፐ እሱዋ ነ አራታን ኡትሳና።

¹² ነ ናይት ታ ጫቁዋነ ታ ታማርስያ ትምርትያ ናግኮ፥ ኤንታ ናይት ነ አራታን መርናዉ ኡታና” ያግስ።

¹³ ጎዳይ ፅዮነ ዶርስ፤ ባዉ ደእያ በሲ ኦናዉ አሞትድ፥ ሀይሳዳ ያግስ፤

¹⁴ “ሀይስ ታ መርናዉ ደእያ በሰ፤ ታኒ አሞትዳ ግሾ ሀይሳን ዳና።

¹⁵ ታኒ ዳሮ ካ እማዳ ፅዮነ አንጃና፤ እያን ደእያ ማንቆታካ ካ ካልሳና።

¹⁶ እያን ደእያ ካህነታ አቶተ ማይዛና፤ እያን ደእያ ፅሎት ኡፋይሳን የፃና።

¹⁷ ሄ በሳን ዳዊታ ዘርያፐ ካዎ ከሳና፤ ታኒ ትይዳ ካዋ ካዎተን ጋምእሳና።

¹⁸ ታኒ እያ ሞርከታ ዬላ ማይዛና፤ ሽን እያ ሁጰን ደእያ ካላቻይ ጶላና” ያጋስ።