Mazmure 116 - ጌሻ ማፃፋ

ሀይቆፐ አትዳ አሳ ጋላታ

¹ ጎዳይ ታ ዋሱዋነ ታ ዎሳ ስእዳ ግሾ፥ ታኒ እያ ዶሳይስ።

² እ ባ ሀይ ታኮ ዛርዳ ግሾ፥ ታ ደኦ ላይ ኡባን እያ ፄጋና።

³ ሀይቆይ ፅሄዳ ታና ተቅስ፤ ዱፎ ህርጋይ ታና ኦይክስ፤ ኡንእነ መቶይ ታና ቃችስ።

⁴ ሄ ዎደ፥ “አቤት ጎዳዉ፥ ታና አሻ” ያጋዳ ጎዳ ሱን ፄጋስ።

⁵ ጎዳይ ኬሀነ ፅሎ፤ ኑ ፆሳይ ቃቴስ።

⁶ ጎዳይ አሽከታ ናጌስ፤ ታ መቶትዳ ዎደ ታና አሽስ።

⁷ ጎዳይ ነዉ ኬሀ ግድያ ግሾ፥ ህዛ ታ ሸምፐ፥ ዎፑ ጋ።

⁸ ጎዳይ ታ ሸምፑዋ ሀይቆፐ፥ ታ አይፍያ አፉፈ፥ ታ ቶሁዋ በፐ አሽስ።

⁹ ታኒ ደኦን ደኤይሳታ ግዶን፥ ጎዳ ስንን ሄመታይስ።

¹⁰ ታኒ፥ “ዳሮ ዋየታስ” ግዳ ዎደ፥ ታ አማኑዋ አጋብከ።

¹¹ ታዉ ሳእ ሀድርዳ ዎደ፥ “አስ ኡባይ ዎርዳንቾ” ያጋስ።

¹² እ ታዉ ኬህዳ ኬሀተ ግሾ ጎዳስ አይ ቃንፃናዉ ዳንዳእያና?

¹³ ጎዳይ ታና አሽዳ ግሾ ጋላታና፥ ፁአ ዎይነ ኡሻ ያርሾ ኦዳ ሺሻና።

¹⁴ እያ አሳ ኡባ ስንን ታ ቃንገ ጎዳስ ጋና።

¹⁵ ጌሻታ ሀይቆይ ጎዳ ስንን፥ ዳሮ አልኦ።

¹⁶ አቤት ጎዳዉ፥ ታኒ ነ አይለ፤ ታኒ ነ አይለ፥ ነ ጋንደ ናኣ፤ ታና ቃሾፐ ነ ብርሻዳሳ።

¹⁷ ጎዳዉ፥ ታ ጋላታ ያርሾ ነዉ ያርሻና፤ ነ ሱን ፄጋና።

¹⁸ አሳ ኡባ ስንን ታ ቃንገ ጎዳስ ጋና።

¹⁹ የሩሳላመን ደእያ ፆሳ ኬ ዳባባን፥ ታ ቃንገ ጋና። ጎዳ ጋላትተ።