Mazmure 109 - ጌሻ ማፃፋ

ታ ፆሳዉ ታና አሻ

ዳዊታ ማዝሙረ

¹ አቤት ታ ነና ጋላትያ ፆሳዉ፥ ነ ታዉ ስእ ጎፓ።

² ኢታ አሳትነ ዎርዳንቾት፥ ባንታ ዶና ታ ቦላ ዶይዶሶና፤ ባንታ ዎርዶ እንፃርሳን ታ ቦላ ሃሳዮሶና።

³ እፆን ታ ዩሹዋ ተቅዶሶና፤ ጋሶይ ባይና ታና ኦልዶሶና።

⁴ ታ ኤንታ ዶሳይስነ ኤንታዉ ዎሳይስ፤ ግዶሽን፥ ኤንቲ ታና ሞቶሶና።

⁵ ታ ሎኦ ኦን፥ ታዉ ኢታ ዛሮሶና፤ ታ ኤንታ ዶስን፥ ኤንቲ ታና እፆሶና።

⁶ ታ ሞርክያ ቦላ ኢታ ዳይና ሹማ፤ ሞታንቾይ እያ ኡሻቻን ኤቆ።

⁷ እያ ፕልግያ ዎደ እ ባላ ግድድ በንቶ፤ እያ ዎሳይ እያዉ ጎመ ግዶ።

⁸ እያ ላይይ ቃሞ፤ እያ ሹማተ ሀር ኤኮ።

⁹ እያ ናይት ይኦ ግዶ፤ እያ ማችያ አምኦ ግዶ።

¹⁰ እያ ናይት ዎሳንቾ ግድድ ቶይላቶ፤ ባንታ ደእያ ሁምፓ ኬፈ ጎደቶ።

¹¹ እያ ሻሎ ኡባ አጮይ ኦይኮ፤ እ ዳቡርድ ከስዳባ ኡባ አላግ ቦንቆ።

¹² ኦንካ እያዉ ኬሆፖ፤ እያ ናይታስ ቃትያ አስ በንቶፎ።

¹³ እያ ናይት ኡባይ ሀይቅድ ዉሮ፤ ካልያ የለተን እያ ሱንይ ዶገቶ።

¹⁴ እያ አዋታ ናጋራይ ጎዳ ስንን ቆፈቶ፤ እያ አየ ናጋራይ ቁሸቶፎ።

¹⁵ ጎዳይ ኤንታ ናጋራ ኡባ ዎደ ቆፖ፤ ኤንቲ ሳአ ቦላ ሀሳየቶፎ።

¹⁶ እ ኬሀ ኦናዉ ፖሎ ቆፕቤና፤ ማንቆታ፥ መቶታንቾታ፥ ቆሄትዳይሳታ ጎድድ ዎስ።

¹⁷ እ ባዳናዉ ዶስዳ ግሾ፥ እ ባደትዳይሳ ግዶ። እ አንጃናዉ ዶሶና ግሾ፥ እያ አንጆይ እያፐ ሃክስ።

¹⁸ ባደ እያ አፍላዳ ማእስ፤ እያ ባደ ሃዳ እያ ቦላ ላክስስ፤ ዛይተዳ እያ መቀ ግዶ ገሎ።

¹⁹ አፍላዳ እያ ካሞ፤ ዳንጮዳ ኡባ ዎደ እያ ፄሳን ደኦ።

²⁰ ሀ ታና ሞተይሳነ ታ ቦላ ኢታ ኦደተይሳታ ጎዳይ ሄሳዳ ኦድ ሴሮ።

²¹ ሽን አቤት ኡባ ሃርያ ጎዳዉ፥ ነ ሱን ግሾ ታና ማዳ። ነ መርና ሲቁዋነ ነ ኬሀተ ግሾ ታና አሻ።

²² ታኒ ማንቆነ መቶታንቾ አስ፤ ታ ዎዛናይ ማዱንፅስ።

²³ ታ ኦማርሳ ኩያዳ ያና ሀናይስ፤ ታ ቦለዳ ቆቆፈታስ።

²⁴ ፆማን ታ ጉልባታይ ዳቡርስ፤ ታ አሳተይ ላፍን መቀ አትስ።

²⁵ ታና ሞተይሳታስ ቀልቅሰስ አታስ፤ ታና በእድ፥ ባንታ ሁጵያ ቃሶና።

²⁶ አቤት ጎዳዉ ታ ፆሳዉ፥ ታና ማዳ፤ መርና ነ ሲቁዋዳ ታና አሻ።

²⁷ ነ ኩሸይ ሀይሳ ኦዳይሳነ፥ ነ ሀይሳ ኦዳይሳ ታ ሞርከት ኤሮ።

²⁸ ኤንቲ ታና ባዶሶና፥ ሽን ነ ታና አንጃና፤ ታና ጎደይሳት ዬላቶ፤ ሽን ነ ታና ኡፋይሳ።

²⁹ ታና ሞተይሳት ዬላ ማኦ፤ ባንታ ካዉሻ አፍላዳ ማኦ።

³⁰ ታኒ ታ እንፃርሳን ጎዳ ጋላታና፤ ደርያ ሺቁዋን እያ ሳባና።

³¹ እ ማንቆታ ግሾ ሞተቴስ፤ ሀይቆስ ፕርደትዳይሳታ አሼስ።