Mazmure 107 - ጌሻ ማፃፋ

እቻሻን ማፃፋ ( ማዝ 107—150 ) መቶ ዎደ ኤለ ጋክያ ፆሳ

¹ እ ኬሀ ግድያ ግሾነ እያ ሲቆይ መርናስ ግዲያ ግሾ፤ ጎዳ ጋላትተ

² ጎዳይ አሽዳይሳት፥ ሞርከ ኩሸፐ ከስ ኤክዳይሳት ሀይሳዳ ያግድ ኦደቶ።

³ ኤንቲ ዶሎሀፐነ ዉሎሀፐ፥ ፑደሀፐነ ዱገሀፐ ቢታ ኡባፈ ሺቅዳይሳታ።

⁴ ኤንታፈ እሶት እሶት መላ ቢታን ዩይዶሶና። ባንታ ደእያ ካታማ ብያ ኦግያ ደማናዉ ዳንዳእቦኮና።

⁵ ኤንቲ ኮሻትዶሶና፤ ሳሞትዶሶና፤ ኤንቲ ኡንኤትዶሶና።

⁶ ኤንቲ መቶትዳ ዎደ፥ ጎዳኮ ዋስዶሶና፤ እ ኤንታ ዋይያፐ ኤንታ አሽስ።

⁷ ኤንቲ ዳና ካታማ ጋካናዉ፥ ኤንታ ሱረ ኦገን ካለስ።

⁸ መርና እያ ሲቁዋ ግሾነ እ ኤንታዉ ኦዳ ማላልስያ ኦሱዋ ግሾ ኤንቲ ጎዳ ጋላቶ።

⁹ እ ሳሞትዳይሳታ አልሴስ፤ ኮሻትዳይሳታ ሎኦባ ካልሴስ።

¹⁰ እሶት እሶት ሳካና ማን ኡትዶሶና፤ ብራታ ሳንላታን ዋይዶሶና።

¹¹ ሄስ ሀንዳይ ኤንቲ ኡባፈ ቃ ፆሳ፥ ኪታ ቦላ ማካልዳ ግሾነ እያ ዞርያ ካዳ ግሾሳ።

¹² እ ኤንታ ዋየ ኦሶን ዳቡርስስ፤ ኤንታ ማድያ አስ ይን ኩንድዶሶና፤

¹³ ኤንቲ መቶትዳ ዎደ፥ ጎዳኮ ዋስዶሶና፤ እ ኤንታ ዋያፐ ኤንታ አሽስ።

¹⁴ እ ኤንታ ሳካና ማፐ ከስስ፤ ኤንቲ ቃሸትዳ ሳንላታ ዱስ።

¹⁵ እያ ሲቁዋ ግሾነ እ ኤንታዉ ኦዳ ማላልስያ ኦሱዋ ግሾ ኤንቲ ጎዳ ጋላቶ።

¹⁶ እ ናሰ ብራታ ፐንገታ መንስ፤ ብራታ ካሶታ ቃንፅስ።

¹⁷ እሶት እሶት ኤያ ግድዶሶና፤ ባንታ ኦዳ ናጋራ ጋሶን ባንታ ኢታተ ጋሶን መቶትዶሶና።

¹⁸ ኤንቲ ካ እፅዳ ግሾ ሀይቆስ ጋክዶሶና።

¹⁹ ኤንቲ መቶትዳ ዎደ፥ ጎዳኮ ዋስዶሶና፤ እ ኤንታ ዋያፐ ኤንታ አሽስ።

²⁰ እ ባ ቃላ ኪትድ ኤንታ ፓስ፤ ዱፎፐ ኤንታ አሽስ።

²¹ እያ ሲቁዋ ግሾነ እ ኤንታዉ ኦዳ ማላልስያ ኦሱዋ ግሾ ኤንቲ ጎዳ ጋላቶ።

²² ኤንቲ እያዉ ጋላታ ያርሾ ሺሾ፤ ኡፋይሳ የን እያ ኦሱዋ ኦዶ።

²³ እሶት እሶት ማርካበን አባ ቦላራ ብዶሶና፤ አባ ቦላ ባንታ ኦሱዋ ኦዶሶና።

²⁴ ኤንቲ ጎዳ ኦሱዋ በእዶሶና፤ ጪሞ አባን ኦዳ ማላልስያባ ፄልዶሶና።

²⁵ እ ኪትዳ ዎደ ጎተይ ደንድስ፤ አባ ዙለይ ቃፅስ።

²⁶ ኤንቲ ፑደ ደንድዶሶና፤ ዱገ ጪሞን ዎዶሶና፤ ኢታ መቶይ ጋክን ኤንታ ዎዛናይ ትልእስ።

²⁷ ኤንቲ ማትዳ አሳዳ በትድ ጋንድጋርዶሶና፤ ኤንታ ኤራይ ማይስ።

²⁸ ኤንቲ መቶትዳ ዎደ፥ ጎዳኮ ዋስዶሶና፤ እ ኤንታ ዋያፐ ኤንታ አሽስ።

²⁹ እ ጎትያ ስእ ኦስ፤ አባ ቤታ ስርጵ ኦስ።

³⁰ ስእ ግዳ ግሾ ኡፋይትዶሶና፤ ኤንቲ ኮይዳ ካታማ ጎዳይ ጋስ።

³¹ እያ ሲቁዋ ግሾነ እ ኤንታዉ ኦዳ ማላልስያ ኦሱዋ ግሾ ኤንቲ ጎዳ ጋላቶ።

³² ደርያ ሺቁዋን እያ ግታተ አዋጆ፤ ጭማታ ዱላታን እያ ጋላቶ።

³³ ጎዳይ ሻፋታ መልስስ፤ ፑልቶት ጎጎናዳ ተቅስ።

³⁴ ሄ በሳን ደእያ አሳ ኢታተ ግሾ፥ አራዳ ቢታ ቁኤ ከስስ።

³⁵ እ መላ ቢታን ሃ ኤልስስ፤ መላ ቢታን ፑልቶይ ቃናዳ ኦስ።

³⁶ ኮሻትዳ አሳ ሄ በሳን ዎስ፤ ባንታዉ ዳና ካታማ ያን ኬፅዶሶና።

³⁷ ኤንቲ ባንታ ጎሻን ዘርዶሶና፤ ዎይነ ቶክዶሶና፤ ዳሮ ሙሩቶ ሺሽዶሶና።

³⁸ እ ኤንታ አንጅን ኤንቲ ዳርዶሶና፤ ኤንታ መህያ ታይቡዋ ጉቤና።

³⁹ ኤንቲ ፆነትያ ዎደነ ኡንኤትያ ዎደ፥ መቶንነ አዛኖን ካዉይያ ዎደ፥

⁴⁰ ጎዳይ ኤንታ ሀላቃታ ካዉሽስ፤ መላ ቢታን ቶይላታና መላ ኦስ።

⁴¹ ሽን ማንቆታ መቶፐ ከስስ፤ ኤንታ ሶ አሳ ዶርሳ ዉደዳ ዳርስስ።

⁴² ሱረ አሳይ ሄሳ በእድ ኡፋይቶሶና፤ ሽን ኢታ አሳይ ዬላትድ ስእ ጎሶና።

⁴³ ጭንጫት ሀይሳ ኡባ አኬኮ፤ ጎዳ ሲቁዋ ቆፖ።