Mazmure 102 - ጌሻ ማፃፋ

ነ ሶምኡዋ ታፐ ገንፋ

ኡንኤትዳ ዎደ ፆሳ ስንን ዎስዳ አሳ ዎሳ

¹ ጎዳዉ፥ ታ ዎሳ ስአ፤ ታ ዋሶይ ኔኮ ጋኮ።

² ታ ዋይያ ጋላስ ነ ሶምኡዋ ታፐ ገንፋ፤ ነ ሀይ ታኮ ዛራ፤ ታኒ ኔኮ ዋስያ ዎደ፥ ታና ኤሶን አላ።

³ ታ ላይይ ጩያዳ ዬስ፤ ታ መቀይ ታማዳ ኤፄስ።

⁴ ታ ዎዛናይ ቡጭድ የግዳ ማታዳ መልስ፤ ካካ ታዉ ሜተተና።

⁵ ታኒ ታ ቃላ ቁ ኦዳ ኦልዳ ግሾ፤ ታ ጎጋይ መቀራ ኦይከትስ።

⁶ ታኒ ዎራን ደእያ ሶሎ መላ፥ ካይሳ ኬን ደእያ ጉቶ መላ።

⁷ ታኒ ዝንእን ስኮይ ዬና፤ ታኒ ኬ ሁጰን ባርካ ኡትዳ ካፎ ግዳስ።

⁸ ታ ሞርከት ጋላስ ኩመ ታና ጫዮሶና፤ ታና ቀልቅሰይሳት ታ ሱንን ባዶሶና።

⁹ ብዶይ ታዉ ካ ግድስ፤ ታ አፉይ ታ ኡሻራ ዋላከትስ።

¹⁰ ሄስ ሀንዳይ ነ ሀንቆይነ ነ ይሎይ፥ ታና ደንድ ዎራ ሆልዳ ግሾሳ።

¹¹ ታ ላይይ ኦማርሳ ኩያ መላ ኤለስድ አስ፤ ታኒ ማታዳ ሹላይስ።

¹² ሽን ጎዳዉ፥ ኔኒ ነ አራታን መርናዉ ኡታዳሳ፤ ነ ሱንይ የለታፐ የለታ ጋካናዉ ሀሳየታና።

¹³ ኔኒ እዮ ማርያ ዎደይ ጋክዳ ግሾ፤ ደንዳዳ ፅዮነስ ቃታ፤ ኔኒ ዶርዳ ዎደይ ጋክስ።

¹⁴ እ ሹቻት ነ ኦሳንቾታስ አልኦ፤ እ ቢታይካ ኤንታ ቃስ።

¹⁵ ካዎተት ጎዳ ሱንስ ያያና፤ ሳኣ ካዎት እያ ቦንቹዋስ ዳጋማና።

¹⁶ ጎዳይ ፅዮነ ዛሪድ ኬፃና፤ ባ ግታተ በሳና።

¹⁷ እ ማንቆታ ዎሳ ስአና፤ ኤንታ ኦይሻ ካና።

¹⁸ ቡሮ የለታና አሳይ ጎዳ ጋላታና መላ፥ ሀይስ ያ የለታስ ፃፈቶ።

¹⁹ ጎዳይ ቃን ደእያ ባ ጌሻ በሳፈ ፄልስ፤ ሳሎን ግድድ ሳኣ ፆሞሴስ።

²⁰ ሄስካ ቃሸትዳ አሳ ዋሱዋ ስአናዉነ ሀይቆ ፕርደትዳ አሳ ብርሻናሳ።

²¹ ሄሳ ግሾ፥ ጎዳ ሱንይ ፅዮነን ኦደታና፤ እያ ጋላታይ የሩሳላመን አዋጀታና።

²² ደረይነ ካዎተይ ሺቅድ፥ ጎዳስ ሄ ዎደ ጎይናና።

²³ ታኒ ናአተን ደእሽን፥ ታ ዎልቃ እፅስስ፤ ታ ላይ ቃምስስ።

²⁴ ታኒ፥ “ታ ፆሳዉ፥ ታ ላይ ግዶ ዛዋን ታና ኮፋ” ያጋይስ። ጎዳዉ፥ ኔኒ የለታፐ የለታ ጋካናዉ ደኣሳ።

²⁵ ኔኒ በን ሳኣ መዳሳ፤ ሳሎይካ ነ ኩሸ ኦሶ።

²⁶ ሀይሳቲ ኡባይ ያና፤ ሽን ኔኒ ዳና፤ ኤንቲ ኡባይ አፍላዳ ዉራና። ኔኒ ኤንታ ጩርቃ አፍላዳ ላማና፤ ኤንትካ አና።

²⁷ ሽን ኔኒ ነና፤ ነ ላይይ ዉረና።

²⁸ ነ አይለታ ናይታ ኔኒ ሳሮ ዎሳ፤ ኤንታ ኮቻይ ነ ስንን ምንድ ዳና።