Mazmure 10 - ጌሻ ማፃፋ

ሱረ ፕርዳ ኮሻ ዎሳ

ዳዊታ ማዝሙረ

¹ አቤት ጎዳዉ፥ አይስ ሃካዳ ኤቃይ? መቶ ዎደ አይስ ኔኒ ጌማይ?

² ባ ኦቶሩዋን ኢታ አስ ማንቁዋ የደስ፤ ኤንቲ ባንታ ማቁዋን ባንታዉ ኦይከትዶሶና።

³ ኢታ አስ ባ ኢታ አሙዋን ጬቀቴስ፤ ባ ኡዝያን ጎዳ ጫዬስነ ካስ።

⁴ ኢታት ባንታ ኦቶሩዋን ፆሳ ኮዮኮና፤ ባንታ ቆፋን ፆሳስ በሰ እሞኮና።

⁵ እያዉ ኡባ ዎደ እንጀቴስ፤ ነ ህገይ እያዉ ገለና፤ ባ ሞርከታ እ ቀልቅሴስ።

⁶ ባ ዎዛናን፥ “ታና አይብካ ቃና ታና መቶይ ጋከና” ያግድ ቆፔስ።

⁷ እያ ዶናን ባደ፥ ዎርዶይነ ማንደ ኩምስ። ገነይነ ኢታተ እያን እንፃርሳን ደኤስ።

⁸ ጉታታን ዙግድ ኡቴስ፤ ሱረ አሳታ ዎናዉ ቆሰትድ ናጌስ፤ ዎልቅ ባይና ዳቡራንቾታ ዎቼስ።

⁹ ባ ቆሰትዳ በሳን ጌምድ፥ ማንቁዋ ኦይካናዉ ጋሞዳ ዙጌስ፤ እያ ኦይክድ ባ ፅህያን ጎችድ ኤፌስ።

¹⁰ ዎልቅ ባይና ማንቁዋ ሾጭድ የጌስ፤ እያ ቶሁዋ ጋርሳን እ ኩንዴስ።

¹¹ እ ባ ዎዛናን፥ “ፆሳይ ዶግስ። ባ ሶምኡዋ ገንድ በኤና” ያጌስ።

¹² አቤት ጎዳዉ፥ ደንዳ! ፆሳዉ፥ ነ ዎልቃማ ኩሽያ ደን፤ ማንቆታ ዶጎፓ።

¹³ ኢታ አሳት ፆሰ አይስ ካኦና? ባንታ ዎዛናን፥ “ፆሳይ ኑና ሴረና” አይስ ያጎና?

¹⁴ ሽን ፆሳዉ፥ ነ መቱዋነ ኡንኣ በኣሳ፤ ኔኒ ማዳናዉ ጊጋ ኡታዳሳ። ኔኒ ይኦታስ ማደ፥ ቆሄትዳይ ነ ማዳና መላ ባና ነዉ አድ እሜስ።

¹⁵ ገነ አሳታ ዎልቃ መን፤ ኢታ አሳታ ሴራ፤ ዛሪድ ኤንታ ግዶን ኢታተ በንቶፎ።

¹⁶ ጎዳይ መርናዉ ካዎትድ ደኤስ፤ ሀራ ካዎተት እያ ቢታፈ ያና።

¹⁷ አቤት ጎዳዉ፥ ኔኒ አሽከታ አሙዋ ኩንሳ፤ ኤንታ ምን፤ ኤንታ ዎሳ ስአ።

¹⁸ ይኦታነ ኡንኤትዳይሳታ ቆሆና መላ፥ ሳአን ደእያ ኦንካ ኤንታ ያሽሶና መላ፥ ኔኒ ኤንታዉ ፕርዳ።