Marqoosa 2 - ጌሻ ማፃፋ

ጉንዳ ኡራ

¹ ጉ ጋላሳፐ ጉየ፥ የሱሲ ቅፍርናሆማ ስሚድ፥ ሶን ደኤስ ግያ ኦዳይ ስኤትስ።

² አሳ ኬይ ኤኮና እፅን፥ ሀር አቶሽን ካረይካ ፁማና ጋካናዉ ዳሮ አሳይ ሺቅን፥ የሱሲ ቃላ ታማርስስ።

³ ኦይዱ አሳት እስ ጉንዳ ኡራ ቶክድ እያኮ ኤህዶሶና።

⁴ አሳይ ዳርዳ ግሾ፥ ኡራ የሱሳኮ ሺሻናዉ ኤንታዉ ዳንዳኤቶና እፅን፥ የሱሲ ደእያ ግናራ ኬ ቃርድ፥ ካራ ቃዉፅድ ኡራ እ ዝንእዳ አልጋራ ዱገ የድድ የሱሳ ስንን ዎስዶሶና።

⁵ የሱሲ ኤንታ አማኑዋ በእድ፥ ሄ ጉንዳ ኡራ፥ “ታ ናአዉ፥ ነ ናጋራይ አቶ ጌተትስ” ያግስ።

⁶ ህገ አስታማረታፐ ሄ በሳን ኡትዳ እሶት እሶት ባንታ ዎዛናን፥

⁷ “ላ ሀ ኡራይ ሀይሳ መላ ኢታባ ፆሳ ቦላ አይስ ኦዴቲ? ፆሳ ፃላላፐ አትሽን፥ ሀር ኦን ናጋራ አቶ ጋናዉ ዳንዳኢ?” ግድ ቆፕዶሶና።

⁸ ኤንቲ ባንታ ዎዛናን ሄሳዳ ቆፕዳይሳ የሱሲ ኤለስድ ባ አያናን ኤርድ፥ ኤንታኮ፥ “ህንተ ህንተ ዎዛናን አይስ ሄሳዳ ቆፔቲ?

⁹ ጉንዳ ኡራ፥ ‘ነ ናጋራይ አቶ ጌተትስ’ ገይስ ማተዬ? ዎይኮ፥ ‘ደንዳ ኤቃዳ ነ አልጋ ቶካዳ ባ’ ገይስ ማቴ?

¹⁰ ሽን ታዉ፥ አሳ ናኣስ፥ ሳአ ቦላ ናጋራ አቶ ጋናዉ ማት ደኤይሳ ህንተ ኤራና መላ” ግድ ሄ ጉንዳ ኡራኮ፥

¹¹ “ነና ጋይስ፥ ደንዳ ኤቃዳ ነ አልጋ ቶካዳ ነ ሶ ባ” ያግስ።

¹² ኡራይ ኤለስ ደንድ ኤቅድ፥ ባ አልጋ ቶክድ አሳ ኡባይ በእሽን ብስ። አሳ ኡባይ ማላለትድ፥ “ኑኒ ሀይሳ መላ ማላልስያባ በእ ኤሮኮ” ያግድ ፆሳ ጋላትዶሶና።

የሱሲ ሌወ ፄሳ

¹³ የሱሲ ቃስ ጋልላ አባ ዶና ስም ብድ፥ ባኮ ይዳ አሳ ኡባ ታማርስስ።

¹⁴ ያራ አሸ፥ እልፍዮሳ ናኣ ሌወ ጌተተይስ ቃራፃ ቃንፅስያ በሳን ኡትዳይሳ በእድ፥ “ታና ካላ” ያግስ። ሌወይ ደንድ ኤቅድ እያ ካልስ።

¹⁵ የሱሲ ካ ማናዉ ሌወ ሶን ኡትስ። እያ ካልያ አሳይ ዳሮ ግድያ ግሾ፥ ቃራፃ ቃንፅስያ ዳሮ አሳይነ ናጋራንቾት እያራነ እያ ታማረታራ እስፈ ኡትዶሶና።

¹⁶ ህገ አስታማረ ግድዳ እስ እስ ፋርሳወት የሱሲ ናጋራንቾታራነ ቃራፃ ቃንፅሰይሳታራ ካ ምሽን በእድ፥ “እ አይስ ናጋራንቾታራነ ቃራፃ ቃንፅሰይሳታራ ካ ሚ?” ያግድ፥ እያ ታማረታ ኦይችዶሶና።

¹⁷ የሱሲ ኤንቲ ገይሳ ስእድ፥ “ሀርጋንቾታፐ አትሽን፥ ፓፃታስ አክመ ኮሸና። ታኒ ናጋራንቾታ ፄጋናዉ ያስፐ አትሽን፥ ፅሎታ ፄጋናዉ ያቢከ” ያግድ ኤንታዉ ዛርስ።

የሱሲ ፆማባ ኦይሸትስ

¹⁸ ፃማቅያ ዮሃንሳ ታማረትነ ፋርሳወት ፆሞሶና። እስ እስ አሳት የሱሳኮ ይድ፥ “ዮሃንሳ ታማረትነ ፋርሳወታ ታማረት ፆሞሶና፥ ሽን ነ ታማረት አይስ ፆሞኮና?” ያግዶሶና።

¹⁹ የሱሲ ኤንታኮ፥ “ያጋኑዋ ይዳ አሳት ማችዉ ኤከይስ ኤንታራ ደእሽን፥ ፆማናዉ ዳንዳኦና? ማችዉ ኤከይስ ኤንታራ ደእሽን፥ ፆማናዉ ዳንዳኦኮና።

²⁰ ሽን ማችዉ ኤከይስ ኤንታ ማታፐ ኤከታና ዎደይ ያና፥ ኤንቲ ሄ ዎደ ፆማና።

²¹ “ጋልአ ማኦ ቦላ ኦራ ጫርቀ ዎድ ስክያ አስ ባዋ። ዎድ ስክኮ፥ ኦራይ ጬጋ ማኡዋ ዳኬስ፤ ዳከይካ ካሰይሳፈ ዳሬስ።

²² ቃስ ማልአንቶ ዎይነ ጬጋ ኦጎሮን ቆልያ አስ ባዋ። ሽን ቆልኮ፥ ሄ ዎይነይ ኦጎሩዋ ዳኬስ፥ ባዉካ ጉኬስ፥ ኦጎሮይካ ኢቴስ። ሽን ማልአንቶ ዎይነይ ኦራ ኦጎሮን ቆለቴስ” ያግስ።

ሳምባታባ ቦንቻናዉ በሲ?

²³ የሱሲ እስ ሳምባታ ጋላስ ባንጋ ጋደ ግዶራ አሽን፥ እያ ታማረት እያራ ብሸ ባንጋ ትያ ሽርክድ ሞሶና።

²⁴ ፋርሳወት የሱሳኮ፥ “ሄኮ፥ ነ ታማረት ሳምባታ ጋላስ ዎጋ ግዶናባ አይስ ኦና?” ያግዶሶና።

²⁵ የሱሲ ኤንታኮ፥ “ዳዊቲ ኮሻትድ፥ ምያባ ኮይዳ ዎደ፥ ባራ ደኤይሳታራ ኦዳይሳ ናባብበከቲ?

²⁶ አብያታር ካህነ ሀላቃ ግድድ ደእያ ዎደ ዳዊቲ ፆሳ ኬ ገልድ፥ ካህነታ ፃላል ማናፐ አትሽን፥ ኦንካ ማናዉ ዎጋ ግዶናይሳ ጎዳ ስንን ዎዳ ዳቡዋ ምስ፥ ባራ ደኤይስታስካ እሚስ” ያግስ።

²⁷ ቃስካ የሱሲ ኤንታኮ፥ “ሳምባት አሳ ናአ ጎአስ መትስፐ አትሽን፥ አስ ሳምባታስ መትቤና።

²⁸ ሄሳ ግሾ፥ አሳ ናአይ፥ ሀር አቶሽን ሳምባታስካ ጎዳ” ያግስ።