Luqaasa 4 - ጌሻ ማፃፋ

የሱሲ ፓጨተ

¹ የሱሲ ጌሻ አያናን ኩምድ ዮርዳኖሰ ሻፋፐ ስምዳ መላ አያናይ እያ መላ ብታ ኤፍስ።

² ያን ኦይታሙ ጋላስነ ቃማ ፃላሄን ፓጨትስ። ሄ ጋላሳታን አይኮካ ሞና ጋምእዳ ግሾ ዉርሰን ኮሻትስ።

³ ፃላሄይ እያኮ፥ “ኔኒ ፆሳ ናአ ግድኮ አነ ሀይስ ሹቻይ ኡይ ግዶ ጋዳ ኪታ” ያግስ።

⁴ የሱሲ ዛሪድ፥ “አስ ኡይ ፃላላን ዴና ጌተትድ ፃፈትስ” ያግስ።

⁵ ሄሳፈ ጉየ፥ ፃላሄይ የሱሳ አዱሳ ደረ ቦላ ከስድ ሀ አላምያ ካዎተታ አይፈ ቅጵ ዛራናዉ በስስ።

⁶ ፃላሄይ፥ “ሀ ኡባስ ማታይነ ቦንቾይ ታዉ እመትስ። ታኒ ዶስዳ ኦደስካ እምያ ግሾ ነዉ እማና።

⁷ ሄሳ ግሾ፥ ኔኒ ታዉ ጎይንኮ ኡባይ ነዉ ግዳና” ያግስ።

⁸ የሱሲ ዛሪድ፥ “ነ ጎዳ፥ ነ ፆሳ፥ እያ ፃላላ ጎይና ጌተትድ ፃፈትስ” ያግስ።

⁹ ዉርሰን ፃላሄይ የሱሳ የሩሳላመ ኤፍድ ፆሳ ኬስ ሁጵያ ቦላ ኤስድ፥ “ኔኒ ፆሳ ናአ ግድኮ አነ ዱገ ሳአን ነና የጋ።

¹⁰ አይስ ጊኮ፥ “ ‘ነና ናግያ ኪታንቾታ ፆሳይ ነ ግሾ ኪታና።

¹¹ ኤንቲ ነ ቶሆይ ሹቻን በቶና መላ፥ ባንታ ኩሽያን ቁ ኦድ ነና ደንና’ ጌተትድ ፃፈትስ” ያግስ።

¹² የሱሲ ዛሪድ፥ “ነ ጎዳ ፆሳ ፓጮፋ ጌተትድ ፃፈትስ” ያግስ።

¹³ ፃላሄይ የሱሳ ፓጭያ ዉርስዳፐ ጉየ ሀራ እንጀ ዎደ ደማና ጋካናዉ እያፐ ሻከትስ።

የሱሲ ጋልላን ታማርሶ ዶመ

¹⁴ የሱሲ አያና ዎልቃን ኩምድ ጋልላ ስምስ። እያ ሱንይ ሄራን ደእያ ቢታ ኡባን ከይስ።

¹⁵ እ አይሁደ ዎሳ ኬ ገልድ ታማርስስ፤ አሳ ኡባይ እያ ጋላትዶሶና።

¹⁶ ያፐ እ ድጭዳ ካታማ ናዝረተ ይስ። ካሰ ሜዘትዳይሳዳ ሳምባታ ጋላስ አይሁደ ዎሳ ኬ ገልስ። ናባባናዉካ ደንድ ኤቅስ።

¹⁷ ናብያ እሳያሳ ማፃፋይ እያዉ እመትን፥ ዶይድ፥ ሀይሳዳ ያግድ ፃፈትዳይሳ ደምስ፦

¹⁸ “ጎዳ አያናይ ታ ቦላ ደኤስ፥ ማንቆታስ ዎንገላ ኦዳና መላ ፆሳይ ታና ዶርስ። ቃሸትዳይሳታስ ብለተ፥ ቆቅዳይሳታ ፄልሳናስነ ኡንኤትዳይሳታ ብርሻና መላ፥

¹⁹ ፆሳይ ኬሀናዉ ቆፕዳ ላይ ኦዳና መላ ታና ኪትስ” ያግስ።

²⁰ ሄሳፈ ጉየ፥ ማፃፋ ፃፅድ ሀጋዘይሳስ እምድ ታማርሳናዉ ኡትስ። አይሁደ ዎሳ ኬን ደእያ አሳት ኡባይ ጫድ ፄሎሶና።

²¹ እ፥ “ሀይስ ህንተ ሀይን ህንተ ስእያ ሀ ማፃፋ ቃላይ ሀች ፖለትስ” ያግስ።

²² ኡባይ እያባ ዳርስድ ኦደቶሶና። ቃስ እያ ዶናፐ ከይያ አ ኬሀተን ኩምዳ ቃላን ማላለትሸ፥ “ሀይስ ዮሰፋ ናኣ ግደነዬ?” ያግዶሶና።

²³ እ፥ “ ‘ነኖ ለ አዋዉ ነና አሻ፥ ቅፍርናሆማን ነ ኦዳባ ኑ ስኦይሳ ቃስ ሀይሳን ነ ካታማን ኦ’ ግያ ሌምሱዋን ህንተ ታና ጋናይሳስ ስይ ባዋ” ያግስ።

²⁴ ቃስ፥ “ቱማ ኦዳይስ፤ ናበይ ባ የለትዳ ቢታን ቦንቸተና።

²⁵ “ታ ህንተዉ ቱማ ኦዳይስ፤ ሳሎይ ሄ ላይነ ባጋ ጎርደትን ምኖ ኮሽ ቢታ ኡባን ደእያ ኤልያሳ ዎደ ዳሮ አምኤት እስራኤለን ደኦሶና።

²⁶ ኤልያስ ኤንታፈ እስነኮካ ኪተትቤና። ሽን ሳራፕታን ደእያ አምኤኮ ኪተትስ።

²⁷ ናብያ ኤልሳ ዎደ እስራኤለን ዳሮ ባሮ ሀርጋንቾት ደኦሶና። ሽን ሶረ ኡራ ንእማነፐ አትሽን፥ ኦንካ ፓፅቤና” ያግስ።

²⁸ አይሁደ ዎሳ ኬን ደእያ አሳ ኡባይ ሄሳ ስእዳ ዎደ ዳሮ ይሎትዶሶና።

²⁹ ባንታ ኡትዳ በሳፈ ደንድድ ደረ ቦላ ኬፀትዳ ካታማፐ ጋፃ ከስድ ሱግ የዳናዉ አፎ ዶና ኤፍዶሶና።

³⁰ ሽን እ ኤንታ ግዶራ ካንድ አስ።

የሱሲ ቱና አያና ከስስ

³¹ ያፐ ጋልላ ቢታን ደእያ ቅፍርናሆማ ካታማ ብስ። ያን ሳምባታ ጋላስ አሳ ታማርስስ።

³² እ ታማርሰይ ማታራ ግድያ ግሾ ኡባይ እያ ትምርትያን ማላለትዶሶና።

³³ አይሁደ ዎሳ ኬን ቱና አያናይ ኦይክዳ ኡራይ ደኤስ።

³⁴ እ፥ “ናዝረተ የሱሳ ኑና አይስ ዋይሳይ ኑፐ ሃካ፤ ኔኒ ይዳይ ኑና ይሳናሰዬ? ኔኒ ኦነኮ ታኒ ኤራይስ። ኔኒ ፆሳፈ ይዳ ጌሻ” ያግድ ዋስስ።

³⁵ የሱሲ ቱና አያናኮ፥ “ስእ ጋዳ ሀ ኡራፐ ከያ” ያግድ ሀንቅስ። ቱና አያናይ ኡራ አሳ ኡባ ስንን ሆል የግድ አይኮካ ቆሆና የድድ ከይስ።

³⁶ አሳ ኡባይ ማላለትዶሶና። ዎልኮ፥ “ሀኖስ፥ ሀይስ አይብ ትምርቴ? ቱና አያናታ ማታንነ ዎልቃን ኪቴስ፤ ኤንትካ ከዮሶና” ያግዶሶና።

³⁷ እያ ሱንይ ሄራ ኡባን ከይስ።

የሱሲ ዳሮ ሀርጋንቾታ ፓስ

³⁸ ሄሳፈ ጉየ፥ የሱሲ አይሁደ ዎሳ ኬፈ ከይድ ስሞና ሶ ገልስ። ስሞና ማቸ አይያ ምኖ ቆፆ ምሻ ሀርገን ሳከታሱ። እዮ ፓና መላ የሱሳ ዎስዶሶና።

³⁹ እ ሂፃኮ ሺቅ ሆክድ እ ሀርግያ ሀንቅስ። ምሻይ አግን ኤለሳ ደንዳዳ ኤንታ ሞካሱ።

⁴⁰ አዋይ ዉላና ሀንሽን ዱማ ዱማ ሀርግያን ኦይከትዳ አሳ እያኮ ኤህዶሶና። እ እሱዋ እሱዋ ቦላ ባ ኩሽያ ዎድ ፓስ።

⁴¹ ቱና አያናት ቃስ፥ “ኔኒ፥ ፆሳ ናኣ” ግድ ዋስሸ ዳሮ አሳፐ ከይዶሶና። ሽን እ ኤንታና ሀንቅስ። እ ክርስቶሳ ግደይሳ ኤንቲ ኤርያ ግሾ፥ እስባካ ኦደቶና መላ ድግስ።

⁴² ቡሮ ዎንትያ ዎደ የሱሲ እስ ጌማ በሲ ብስ። አሳይ ኮይሸ እ ደእያ በሳ ይዶሶና። ኤንታፈ እ ሻከትድ ቦና መላ ድጋናዉ ኮይዶሶና።

⁴³ ሽን እ፥ “ታኒ ሀራ ካታማታ ባዳ ፆሳ ካዎተ ዎንገላ ማርካታናዉ በሴስ። ታ ኪተትዳይ ሄሳሳ” ያግስ።

⁴⁴ ይሁዳ ቢታን ደእያ አይሁደ ዎሳ ኬን ሳባክስ።