Leeweta 9 - ጌሻ ማፃፋ

አሮና ኮይሮ ያርሹዋ

¹ ሆስፑን ጋላስ ሙሰይ አሮና፥ እያ አደ ናይታነ እስራኤለ ጭማታ ፄግስ።

² አሮናኮ ሀይሳዳ ያግስ፤ ቦረይ ባይና እስ ኮርማ ናጋራ ያርሾስ፥ ቃስ እስ ማራዘ ፁሳ ያርሾስ ጎዳ ስን ሺሻ።

³ ቦረይ ባይና እስ ኮለ ናጋራ ያርሾስ፥ እስ ላይ ኩምዳ ማርነ ዶርሳ ኡርገ ፁሳ ያርሾስ ባንታዉ ኤሀና መላ እስራኤለ አሳስ ኦዳ።

⁴ ቃስ እስፈተ ያርሾስ እስ ኮርማ፥ እስ ማራዘነ ካ ያርሾስ ዛይተራ ሙኑቀትዳ ለ ኤሀና መላ ኤንታዉ ኦዳ። ሀች ጎዳይ ህንተዉ ቆንጫና ግሾ ሄሳ ኦተ።

⁵ ኤንቲ ሙሰይ ኪትዳባ ኡባ ጌሻ ዱንካንያ ስን ኤህዶሶና፤ ማባራ ኡባይ ሺቅድ ጎዳ ስንን ኤቅዶሶና።

⁶ ሙሰይ ኤንታኮ፥ ጎዳ ቦንቾይ ህንተዉ ቆንጫና መላ ህንተ ኦና መላ ጎዳይ ኪትዳይ ሀይሳ።

⁷ ሙሰይ አሮናኮ ሀይሳዳ ያግስ፤ “ያርሾ በሳኮ ሺቃዳ ነ ናጋራ ግሾ ናጋራ ያርሾነ ፁሳ ያርሾ ያርሻ። ጎዳይ ኪትዳይሳዳ አሳ ናጋራ አቶተስ ያርሾ ያርሻ።”

⁸ አሮን ያርሾ በሳኮ ይድ፥ ባ ናጋራ ግሾ ያርሸትያ ማራ ሹክስ።

⁹ አሮና ናይት ሱ ኤክድ እያዉ ኤህዶሶና፤ እ፥ ባ ብራያ ሄ ሱን የድ ኤክድ፥ ያርሾ በሳን ደእያ ካጨታ ትይስ፤ አትዳ ሱ ያርሾ በሳፈ ጋርሳን ጉስስ።

¹⁰ ጎዳይ ሙሰ ኪትዳይሳዳ፥ አሹዋፐ ሞዋ፥ ክላሆታነ ትርያ ፄራ ባጋ ኤክድ ያርሾ በሳን ፁግስ።

¹¹ ሽን አትዳ አሹዋነ ጋልባ ጉታፐ ካረ ከስድ ፁግስ።

¹² አሮን ፁሳ ያርሾስ ሺቅዳ መህያ ሹክስ፤ እያ ናይት ሱ ኤክድ እያዉ ኤህዶሶና። እ ያርሾ በሳ ኦይዱ ማዛነታ ቦላ ዉርፅስ።

¹³ ኤንቲ አሹዋ ቆሞን ቆሞን ከስድ፥ ሁጵያራ ዎላ እያዉ ኤህዶሶና፤ እ ኤክድ ያርሾ በሳን ፁግስ።

¹⁴ ኡሎ አሹዋነ ገዳታ ሃን ሜጭድ፥ ያርሾ በሳን ደእያ ፁሳ ያርሹዋ ቦላ ዎድ ፁግስ።

¹⁵ ሄሳፈ ጉየ፥ አሮን አሳ ግሾ ያርሾ ያርሽስ። እ አሳ ናጋራ ግሾ ያርሸትያ ኮልያ ኤክድ ሹክስ፤ እ ካሰ ባ ናጋራ ያርሽዳይሳዳ ኤንታ ናጋራ ግሾ ያርሽስ።

¹⁶ ዎጋይ ኪተይሳዳ ፁሳ ያርሾስ ሺቅያ መህያ ኤህድ ያርሽስ።

¹⁷ ካ ያርሹዋ ኤህድ፥ እያፐ እስ ኩጫ ኤክድ፥ ዎንታ ዎንታ ፁሳ ያርሹዋ ቦላ ጉጅድ ያርሾ በሳን ፁግስ።

¹⁸ አሮን ኮርማነ ማራዝያ አሳስ እስፈተ ያርሾ ኦድ ሹክስ፤ እያ አደ ናይት ሱ እያዉ ኤህዶሶና፤ እ ሄ ሱ ኤክድ ያርሾ በሳ ኦይዱ ማዛነታ ቦላ ዉርፅስ።

¹⁹ ኮርማነ ማራዝያ አሹዋፐ ሞዋ፥ ጎይናፐ ብድ ዞኮ መቀ ጋካናዉ ደእያ ሞዋ፥ ኡሎ አሹዋ ካምዳ ሞዋ፥ ክላሆታነ ትርያ ፄራ ባጋ ኤክድ፥

²⁰ ኤንቲ አንጋይሱዋ ቦላ ዎን፥ አሮን ያርሾ በሳን ፁግስ።

²¹ ጎዳይ ሙሰ ኪትዳይሳዳ፥ አሮን አንጋይሱዋነ ኡሻቻ ገዳ ዩሾ ያርሾ ኦድ ጎዳ ስንን ዩሽስ።

²² ሄሳፈ ጉየ፥ አሮን ባ ኩሽያ አሳኮ ደንድ ኤንታ አንጅስ። እ ናጋራ ያርሹዋ፥ ፁሳ ያርሹዋነ እስፈተ ያርሹዋ ያርሽዳፐ ጉየ ያርሾ በሳፈ ዎስ።

²³ ሙሰይነ አሮን ጌሻ ዱንካንያ ግዶ ገልዶሶና፤ ኤንቲ ያፐ ከይድ አሳ አንጅዶሶና። ሄ ዎደ ጎዳ ቦንቾይ አሳ ኡባስ ቆንጭስ።

²⁴ ጎዳ ማታፐ ታም ዎድ፥ ያርሾ በሳን ደእያ ፁሳ ያርሹዋነ ሞዋ ምስ። አሳ ኡባይ ሄሳ በእዳ ዎደ እልልዶሶና፤ ጉፋንድ ቦንችዶሶና።