Leeweta 8 - ጌሻ ማፃፋ

ካህነታ ሹሞ ዎጋ

¹ ጎዳይ ሙሰስ ሀይሳዳ ያግድ ኦድስ፤

² አሮናነ እያ አደ ናይታ፥ ኤንታራ እስፈ ካህነተ ማኡዋ፥ ትዮ ዛይትያ፥ ናጋራ ያርሹዋ ሹከትያ ኮርማ፥ ናምኡ ማራዘታነ፥ እርሾይ ገልቦና ኡከትዳ ኡይ ዎያ ጋይታ ኤካዳ ያ።

³ ቃስ እስራኤለ አሳ ኡባ ፄጋዳ ዱንካንያ ፐንገ ሺሻ።

⁴ ሙሰይ ጎዳይ ኪትዳይሳዳ ኦስ፤ አሳ ኡባይ ዱንካንያ ፐንገ ሺቅስ።

⁵ ሙሰይ አሳኮ፥ ታ ኦና መላ ጎዳይ ኪትዳይስ ሀይሳ።

⁶ ሙሰይ አሮናነ እያ አደ ናይታ ኤህድ ሃን ሜጭስ።

⁷ አሮና ማኡዋ ማይዝድ፥ ዳንጮ ዳንጭስስ፤ አዱሳ ማኡዋ ማይዝድ እያ ቦላ ኤፉደ ማኡዋ ማይዝስ። ኤፉድያ አሌቅስድ ዳድዳ ሳቅያን አሮና ፄሳራ ጋድ ቃችስ።

⁸ ኤፉድያ ቦላ ትራ ኪሰ ስክድ እያን ኡሪመነ ቱሚመ ዎስ።

⁹ አሮና ሁጰን ፃ ቃጨ ዎስ። ጎዳይ ሙሰ ኪትዳይሳዳ ፃ ቃጭያ ስን ባጋራ ጌሻ ዎርቃ ጉቸ ምስልያ ዎስ።

¹⁰ ሄሳፈ ጉየ ሙሰይ ትዮ ዛይትያ ኤክድ፥ ዱንካንያነ ዱንካንያ ግዶን ደእያ ሚሸ ኡባ ትይድ ዱማይስ።

¹¹ ሄ ዛይትያፐ ኤክድ ያርሾ በሳ ቦላ ላፑን ቶሆ ዉርፅስ፤ እያ ሚሸታ፥ ሜቻ ከርያነ እያ ኡቱዋ ዱማያናዉ ሄ ዛይትያራ ትይስ።

¹² ሄ ትዮ ዛይትያፐ ጉራ ኤክድ አሮና ሁጰን ትግድ እያ ዱማይስ።

¹³ ጎዳይ ሙሰ ኪትዳይሳዳ ሙሰይ አሮና አደ ናይታ ስን አድ ማኦ ማይዝድ ዳንጮ ዳንጭስስ። ኤንታ ሁጰን ፃ ቃጨ ዎስ።

¹⁴ ሙሰይ ናጋራ ያርሾስ ያርሸትያ ኮርማ ኤህስ፤ አሮንነ እያ አደ ናይት ሄ ኮርማ ሁጰን ባንታ ኩሽያ ዎዶሶና።

¹⁵ ሙሰይ ሄ ኮርማ ሹክድ እያ ሱን ባ ብራያ የድ ኤክድ፥ ያርሾ በሳን ደእያ ካጨታ ትይድ ያርሾ በሳ ጌሽስ። አትዳ ሱ ያርሾ በሳፈ ጋርሳን ጉስስ፤ ሄሳዳ ኦድ ያርሾ በሳ ፆሳስ ዱማይድ ጌሽስ።

¹⁶ ሙሰይ ኡሎ አሹዋ ካምዳ ሞዋ ኡባ፥ ትርያ ፄራ ባጋ፥ ክላሆታነ ኤንታ ካምዳ ሞዋ ኤክድ፥ ያርሾ በሳን ፁግስ።

¹⁷ ሽን ጎዳይ ሙሰ ኪትዳይሳዳ ኮርማ ጋልባ፥ አትዳ አሹዋነ ቶጭያ ጉታፐ ጋፃ ከስድ ፁግስ።

¹⁸ ሄሳፈ ጉየ ሙሰይ ፁሳ ያርሾስ ማራዘ ኤህስ፤ አሮንነ እያ አደ ናይት ሄ ማራዝያ ሁጰን ባንታ ኩሽያ ዎዶሶና።

¹⁹ ሙሰይ ሄ ማራዝያ ሹክስ፤ እያ ሱ ያርሾ በሳ ኦይዱ ማዛነታ ቦላ ዉርፅስ።

²⁰ ሙሰይ ማራዝያ አሹዋ ቆሞን ቆሞን ቃንፀረስ፤ ሁጵያ፥ አትዳ አሹዋነ ሞዋ ፁግስ።

²¹ ጎዳይ ሙሰ ኪትዳይሳዳ ኡሎ አሹዋነ ገዳታ ሜጭድ፥ ኩመ ዶርሳ ጎዳስ ሳዎ ቶንኩ ግያ ፁሳ ያርሾ ኦድ ያርሾ በሳን ፁግስ።

²² ካህነት ሹመትያ ዎደ ሺቅያ ናምአን ዶርሳ ሙሰይ ኤህስ፤ አሮንነ እያ አደ ናይት ሄ ዶርሳ ሁጰን ባንታ ኩሽያ ዎዶሶና።

²³ ሙሰይ ሄ ማራዝያ ሹክስ፤ እያ ሱፈ ኤክድ፥ አሮናስ ኡሻቻ ሀይ፥ ኡሻቻ ኩሽያ ዎጋ ብራያነ፥ ኡሻቻ ቶሁዋ ዎጋ ብራያ ትይስ።

²⁴ ቃስ ሙሰይ አሮና አደ ናይታ ስን አድ፥ ሄ ሱፈ ኤክድ፥ ኤንታ ኡሻቻ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ትይስ። ያትድ፥ ሙሰይ አትዳ ሱ ያርሾ በሳ ኦይዱ ማዛነታ ቦላ ዉርፅስ።

²⁵ ሞዋ፥ ጎይናፐ ብድ ዞኮ መቀ ጋካናዉ ደእያ ሞዋ፥ ትርያ ፄራ ባጋ፥ ክላሆታነ ኤንታ ካምዳ ሞዋነ ኡሻቻ ገዳ ኤክስ።

²⁶ ጎዳ ስንን ደእያ ጋይታፐ እርሾይ ባይና ኡከትዳ እስ ኡይ፥ ኡከትድ ዛይተን ትየትዳ እስ ኡይነ ሌኦን ኡከትዳ ኡይ ኤክድ ሞዋ ቦላነ ኡሻቻ ገዳ ቦላ ዎስ።

²⁷ እ ሄ ካ ኡባ አሮና ኩሸንነ እያ አደ ናይታ ኩሸን ዎን፥ ጎዳ ስንን ዩሾ ያርሾ ኦድ ያርሽዶሶና።

²⁸ ሙሰይ ሄ ካ ኤንታ ኩሸፐ ኤክድ፥ ፁሳ ያርሹዋራ ጋድ፥ ካህነታ ሹምያ ዎደ ጎዳስ ሳዎ ቶንኩ ግያ ያርሾ ኦድ ያርሾ በሳን ፁግስ።

²⁹ ቃስ ሙሰይ አንጋሱዋ ኤክድ፥ ዩሾ ያርሾ ኦድ ጎዳ ስንን ያርሽስ። ጎዳይ ሙሰ ኪትዳይሳዳ፥ ካህነታ ሹምያ ዎደ ያርሸትያ ማራዝያ አሹዋፐ ሄስ ሙሰ ጋክያ ግሾ።

³⁰ ሙሰይ ትዮ ዛይትያፐነ ያርሾ በሳን ደእያ ሱፈ ኤክድ፥ አሮና ቦላነ እያ ማኡዋ ቦላ፥ እያ አደ ናይታ ቦላነ፥ ኤንታ ማኡዋ ቦላ ዉርፅስ፤ አሮናነ እያ ማኡዋ፥ እያ ናይታነ ኤንታ ማኡዋ ዱማይስ።

³¹ ሙሰይ አሮናነ እያ አደ ናይታኮ ሀይሳዳ ያግስ፤ አሹዋ ዱንካንያ ፐንገን ካተ፤ አሮንነ እያ አደ ናይት ታ ኪትዳይሳዳ ጋይታን ደእያ ጌሻ ኡይራ ሚተ።

³² ሄ አሹዋፐነ ኡይፈ ፓላህዳይ ደእኮ ታማን ፁግተ።

³³ ካህነታ ሹምያ ዎጋይ ላፑን ጋላስ ኤክያ ግሾ ሄ ዎጋይ ፖለትያ ላፑን ጋላሳይ ዉራና ጋካናዉ ዱንካንያ ፐንገፈ ካረ ከዮፕተ።

³⁴ ጎዳይ ኪትን ሀች ፖለትዳ ዎጋይ ህንተ ናጋራ ቁቻናሳ።

³⁵ ዱንካንያ ፐንገን ላፑን ጋላስ ኩመ ጋላስነ ቃማ ጋምእተ፤ ጎዳ ዎጋ ናግተ፤ እፅኮ ህንተ ሀይቃና። ታና ጎዳይ ኪትዳይ ሀይሳ።

³⁶ አሮንነ እያ አደ ናይት ጎዳይ ሙሰ ባጋራ ኪትዳባ ኡባ ኦዶሶና።