Leeweta 7 - ጌሻ ማፃፋ

ናቆ ያርሾ

¹ ኡባፈ ጌሽ ግድያ ግሾ ናቆ ያርሾ ዎጋይ ሀይሳ፤

² ፁሳ ያርሾ መሄይ ሹከትያ በሳን ናቆ ያርሾ መሄይ ሹከቶ፤ እያ ሱይ ያርሾ በሳ ኦይዱ ባጋን ዉርፀቶ።

³ እያ ሞዋ ኡባ፥ ሄስካ ጎይናፐ ብድ ዞኮ መቀ ጋካናዉ ደእያ ሞዋ፥ ኡሎ አሹዋ ካምዳ ሞያ፥

⁴ ናምኡ ክላሆታ፥ ኤንታ ካምዳ ሞያነ ትርያ ፄራ ባጋ ኤክድ ያርሾ።

⁵ ካህነይ ሀይሳታ ታማን ፁሳ ያርሾ ኦድ ጎዳስ ያርሾ፤ ሄስ ናቆ ያርሾ።

⁶ ካህነ ያራ ግድዳ አደ ኡባይ ሄ ያርሾ አሹዋ ሞ። ሄ ያርሾይ ኡባፈ ጌሽ ግድያ ግሾ ጌሻ በሳን ሜተቶ።

⁷ ናቆ ያርሹዋነ ናጋራ ያርሹዋ ዎጋይ እስኖ። ሄ መህያ አሾይ ናጋራ አቶተስ ያርሽዳ ካህንያስ እመቴስ።

⁸ ኦንካ ፁሳ ያርሾ መሄ ኤህን ኤክድ ያርሽያ ካህነይ ሄ መህያ ጋልባ ባዉ ኤኮ።

⁹ ጮጨን ኮምፐትዳ ዎይኮ ኦቶን ካፅዳ ዎይኮ ባሸን ኡከትዳ ኡባይ ሄ ያርሹዋ ያርሽዳ ካህንያስ እመቴስ።

¹⁰ ቃስ ዛይተራ ሙኑቀትዳ ዎይኮ ሙኑቀቶና ካ ያርሾ ኡባይ አሮና አደ ናይታ ኡባስ እስ ግና ሻከትድ እመቴስ።

እስፈተ ያርሾ

¹¹ እስ አስ እስፈተ ያርሾ ጎዳስ ያርሽያ ዎደ እያዉ ደእያ ዎጋይ ሀይሳ፤

¹² እ ያርሸይ ጋላታ ያርሾ ግድኮ ሄ ያርሹዋራ እስፈ ዛይተራ ሙኑቅዳ ኡይ፥ እርሾይ ገሎና ኡከትድ ዛይተን ትየትዳ ሌኦ ኡይነ ሎኦ ለፈ ዛይተራ ሙኑቀትዳ ኡይ ሺሾ።

¹³ ሄ እስፈተ ያርሹዋራ እስፈ እርሾራ ኡከትዳ ኡይ እሞታ ኦድ ያርሾ።

¹⁴ ሄ እስ እስ ኡይፈ እሱዋ ደንድ ጎዳስ ያርሾ ኦድ ኤሆ። ሄስ እስፈተ ያርሹዋ ሱ ዉርፅዳ ካህንያስ እመቶ።

¹⁵ ሄ መህያ አሾይ ሄ ጋላስ ሜተቶ፤ ዎንታስ አይብካ አቶፎ።

¹⁶ ሽን እያ ያርሾይ ጋሶ ያርሾ ዎይኮ ዶሳ ያርሾ ግድኮ ሄ አሾይ ሄ ያርሸትዳ ጋላስ ሜተቶ፤ እያፐ አተይ ደእኮ ዎንተ ጋላስ ሜተቶ።

¹⁷ ሄ አሹዋፐ ፓላህድ ሄን ጋላስ ጋካናዉ ጋምእኮ ሄስ ታማን ፁገቶ።

¹⁸ እስ አስ ሺሽዳ እስፈተ ያርሾ አሾይ ሄን ጋላሳን ሜተትኮ እያ ያርሾይ ኤከተና፤ ያርሾይ ያርሸትዳዳ ታይበተና። ሄ ያርሾይ ቱና፤ እያፐ ምዳ ኦንካ ባ ናጋራን ኦይሸቴስ።

¹⁹ ቱናባ ቦችዳ አሾይ ሜተቶፎ፤ እ ታማን ፁገታናዉ ኮሼስ። ሀራ አሹዋ ዎጋን ቱና ግዶና አስ ኦንካ ማና ጊኮ ሞ።

²⁰ ሽን እስ አስ ቱና ግድ ኡትድ፥ ጎዳስ ሺቅዳ እስፈተ ያርሾ አሹዋፐ ምያባ ግድኮ፥ ሄ ኡራይ አሳ ግዶፈ ኩረቶ።

²¹ እስ አስ ቱናባ ቦችኮ፥ አሳ ቱናተ ግድን ዎይኮ ቱና መሄ ግድን ዎይኮ ሀራ እፀትያ ቱናባ ቦችድ፥ ጎዳስ ያርሸትዳ እስፈተ ያርሾ አሹዋፐ ሚኮ፥ ሄ ኡራይ ባ አሳ ግዶፈ ኩረቶ።

²² ጎዳይ ሙሰኮ ሀይሳዳ ያግስ፤

²³ እስራኤለ አሳስ ሀይሳዳ ያጋዳ ኦዳ፤ ኮርማ ዎይኮ ማራዘ ዎይኮ ኮለ ሞ አሹዋ ሞፕተ።

²⁴ ሀይቅዳ መሄ ዎይኮ ዶእ ዎዳ መህያ ሞዋ ሀራባስ ጎኤትተፐ አትን፥ እያፐ አይባካ ሞፕተ።

²⁵ ጎዳስ ታማን ፁሳ ያርሾስ ሺቅያ መህያ ሞ አሹዋ ምያ ኦንካ ባ አሳ ግዶፈ ኩረቶ።

²⁶ ህንተ ደእያ በሳን አዉን ግድኮካ፥ ካፎ ሱ ዎይኮ መሄ ሱ ሞፕተ።

²⁷ ሱ ምያ ኦንካ ባ አሳ ግዶፈ ኩረቶ።

ካህነታ ግሹዋ

²⁸ ጎዳይ ሙሰኮ ሀይሳዳ ያግስ፤

²⁹ እስራኤለ አሳስ ሀይሳዳ ያጋዳ ኦዳ፤ ጎዳስ እስፈተ ያርሾ ሺሽያ ኦንካ ሄ እስፈተ ያርሹዋፈ ሻክድ ባ እሞታ ኦድ ጎዳስ ዱማይድ ያርሾ።

³⁰ ሄሳ እ ጎዳስ ታማን ፁሳ ያርሾ ኦድ፥ ባ ኩሸን ኤክድ ኤሆ። ቃስ ሞዋ አንጋሱዋራ ጋ ኤህድ ዩሾ ያርሾ ኦድ ጎዳ ስንን ያርሾ።

³¹ ካህነይ ያርሾ በሳን ሞዋ ፁጎ፤ ሽን አንጋሶይ አሮናስነ እያ አደ ናይታስ እመቶ።

³² ህንተ እስፈተ ያርሹዋፈ ኡሻቻ ገዳ እሞታ ኦድ ካህንያስ እምተ።

³³ ሄ ኡሻቻ ገዳይ እስፈተ ያርሹዋ ሱነ ሞዋ ያርሽያ ካህንያ ጋክያ ግሾ ግዶ።

³⁴ ታኒ እስራኤለ አሳ እስፈተ ያርሹዋፈ ዩሾ አንጋሱዋን ሺቅዳ ገዳ እስራኤለ አሳፐ ኤካዳ፥ ካህንያ አሮናስነ እያ አደ ናይታስ ግሾ ኦዳ እማስ። ሄስ ኤንታ ጋክያ ኤንታ ግሾ ግድያ ግሾ እስራኤለ አሳይ መርናዉ ሄሳ ኤንታዉ እምሸ ዳና።

³⁵ አሮንነ እያ አደ ናይት ካህነ ግድድ ሹመትዳ ጋላስ ጎዳስ ሺቅዳ ፁሳ ያርሹዋፈ፥ ሄስካ ኤንታዉ ግሾ ግድድ እመትስ።

³⁶ ጎዳይ ኤንታ ካህነተስ ትይዳ ጋላስ፥ ሄሳ ኤንታዉ እማና መላ እስራኤለ አሳ ኪትስ፤ ሄስ ያና የለተን ኤቅድ ደእያ ዎጋ ግዳና።

³⁷ ህዛ ፁሳ ያርሹዋ፥ ካ ያርሹዋ፥ ናጋራ ያርሹዋ፥ ናቆ ያርሹዋ፥ ካህነት ትየትያ ዎደ ያርሸትያ ያርሹዋነ እስፈተ ያርሹዋ ዎጋይ ሀይሳ።

³⁸ እስራኤለ አሳይ ሲና መላ ቢታን ባንታ ያርሹዋ ጎዳስ ያርሻና መላ ጎዳይ ኪትዳ ጋላስ፥ ሲና ዙማ ቦላ ጎዳይ ሙሰ ኪትዳ ዎጋይ ሀይሳ።