Leeweta 4 - ጌሻ ማፃፋ

ናጋራ ያርሾ

¹ ጎዳይ ሙሰኮ ሀይሳዳ ያግስ፤

² ኔኒ እስራኤለ አሳስ ሀይሳዳ ያጋዳ ኦዳ፤ ኦንካ ቆፖና ናጋራ ኦኮ ዎይኮ ጎዳ ኪታታፐ እሱዋ መንኮ፥

³ ዶረትዳ ካህነይ ናጋራ ኦድ አሳ ጎመን ጋኮ፥ እ ባ ኦዳ ናጋራ ግሾ ቦረይ ባይና ዎፋኖ ጎዳስ ናጋራ ያርሾ ኦድ ኤሆ።

⁴ ሄ ዎፋኑዋ ጌሻ ዱንካንያ ፐንገ ኤህድ፥ ሁጰን ባ ኩሽያ ዎድ ጎዳ ስንን ሹኮ።

⁵ ዶረትዳ ካህነይ ዎፋኑዋ ሱፈ ጉራ ኤክድ ጌሻ ዱንካንያ ገልስድ፥

⁶ ባ ብራያ ሱን የድ ኤክድ ጌሻ ዱንካንያ ማጋራጁዋ ስንን ጎዳ ስንን ላፑን ቶሆ ዉርፆ።

⁷ ካህነይ ጉ ሱ ኤክድ ጌሻ ዱንካንያን ጎዳ ስንን ሳውያ እፃነ ጩይስያ በሳን ደእያ ካጨታ ትዮ። አትዳ ሱ ጌሻ ዱንካንያ ገልያ ፐንገ ባጋራ ደእያ ፁሳ ያርሾ በሳ ጋርሳን ጉሶ።

⁸ ናጋራ ያርሾስ ሹከትዳ ዎፋኑዋ ሞዋ ኡባ፥ ኡሎ አሹዋ ማእዳ ሞዋ፥

⁹ ናምኡ ክላሆታ፥ ኤንታ ካምዳ ሞያነ ትርያ ፄራ ባጋ ኤኮ።

¹⁰ እስፈተ ያርሾስ ሹከትዳ ዎፋኑዋ ሞዋ ከስዳይሳዳ እያፐ ሞዋ ከሶ። ካህነይ ፁሳ ያርሾ ኦድ ያርሾ በሳን ፁጎ።

¹¹ ሽን ዎፋኑዋ ጋልባ፥ እያ አሹዋ ኡባ፥ እያ ሁጵያ፥ እያ ቶሆታ፥ ኡሎ አሹዋ፥ ቶጭያ፥

¹² አሹዋፐ አትዳይሳ ኡባ ጉታፐ ካረ ከስድ ብዶ የግያ ዎጋ መላ ጌሻ በሲ ኤፍድ ያን ታማን ፁጎ።

¹³ እስራኤለ ማባራ ኡባይ ቆፖና ናጋራ ኦኮነ ጎዳ ኪታታፐ እሱዋ መንኮ ሄስ ኤንታፈ ቆሰትኮካ ኤንታዉ ባላ ግድድ ታይበታና።

¹⁴ ኤንቲ ኦዳ ናጋራ አኬክያ ዎደ ናጋራ ያርሾስ ሀንያ ዎፋኖ ጌሻ ዱንካንያ ስን ኤሆ።

¹⁵ ማባራ ጭማት ባንታ ኩሽያ ዎፋኑዋ ሁጰን ዎድ ጎዳ ስንን ሹኮ።

¹⁶ ዶረትዳ ካህነይ ዎፋኑዋ ሱፈ ጉራ ኤክድ ጌሻ ዱንካንያ ግዶ ገሎ።

¹⁷ እ ባ ብራያ ሱን የድ ኤክድ ማጋራጁዋ ስን ባጋራ ጎዳ ስንን ላፑን ቶሆ ዉርፆ።

¹⁸ ቃስ ጉ ሱ ኤክድ፥ ጌሻ ዱንካንያ ግዶን ጎዳ ስንን እፃነ ጩይስያ በሳን ደእያ ካጨታ ቦላ ትዮ። አትዳ ሱ ጌሻ ዱንካንያ ገልያ ፐንግያ ባጋራ ደእያ ፁሳ ያርሾ በሳ ጋርሳን ጉሶ።

¹⁹ ሞ ኡባ ኤክድ ያርሾ በሳን ፁጎ።

²⁰ ሀ ዎፋኑዋካ ናጋራ ያርሾስ ሹከትዳ ዎፋኑዋ መላ ኦዳ ሺሻ። ሄሳዳ ኦድ፥ ካህነይ ናጋራ አቶተ ዎጋ ፖላና፤ አሳ ናጋራይ አቶ ጌተታና።

²¹ ካህነይ ዎፋኑዋ ጉታፐ ካረ ከስድ፥ ኮይሮ ዎፋኖይ ፁገትዳይሳዳ እያካ ፁጎ፤ ሄስ ማባራስ ያርሸትያ ናጋራ ያርሾ።

²² አሳ ካለያ ሹማታፐ እሶይ ቆፖና ናጋራ ኦኮነ ጎዳ ፆሳ ኪታፐ እሱዋ መንኮ ሄ ኡራይ ባላ።

²³ እ ባ ኦዳ ናጋራ አኬክዳፐ ጉየ፥ ቦረይ ባይና እስ ኮለ ኤሆ።

²⁴ ሄ ኮልያ ሁጰን ባ ኩሽያ ዎድ ፁሳ ያርሾይ ያርሸትያ በሳን ጎዳ ስንን ሹኮ፤ ሄስ ናጋራ ያርሾ።

²⁵ ካህነይ ባ ብራያ ሱን የድ ኤክድ፥ ፁሳ ያርሾ በሳን ደእያ ካጨታ ቦላ ትዮ፤ አትዳ ሱ ቃስ ፁሳ ያርሾ በሳ ጋርሳን ጉሶ።

²⁶ እስፈተ ያርሾስ ሺቅዳ ሞዋ ኡባ ፁግዳይሳዳ ሀ ኮልያ ሞዋ ፁጎ። ሄሳዳ ኦድ፥ ካህነይ ሄ ኡራ ናጋራ ቁሽሴስ፤ ሄ ኡራ ናጋራይ አቶ ጌተታና።

²⁷ ማባራፐ እስ አስ ቆፖና ናጋራ ኦኮነ ጎዳ ኪታፐ እሱዋ መንኮ ሄ ኡራይ ባላ ግዴስ።

²⁸ እ ባ ኦዳ ናጋራ አኬክዳፐ ጉየ ቦረይ ባይና ማጫ ዴሽ ባ ናጋራ ግሾ ኤሆ።

²⁹ ባ ኩሽያ ሄ ዴሸ ሁጰን ዎ፤ ያትድ ፁሳ ያርሾ በሳን ናጋራ ያርሾ ኦድ ሹኮ።

³⁰ ሄሳፈ ጉየ፥ ካህነይ ሄ ዴሸ ሱን ባ ብራያ የድ ኤክድ ፁሳ ያርሾ በሳን ደእያ ካጨታ ቦላ ትዮ። አትዳ ሱ ኡባ ያርሾ በሳፈ ጋርሳን ጉሶ።

³¹ እስፈተ ያርሾስ ሹከትዳ መህያፐ ሞዋ ከስዳይሳ መላ ሄ ዴሸ ሞዋ ቃር ከስድ፥ ያርሾ በሳን ጎዳስ ሳዎ ቶንኩ ግያ ያርሾ ኦድ ፁጎ። ሄሳዳ ኦድ፥ ካህነይ ሄ ኡራ ናጋራ ቁሽሴስ፤ እያ ናጋራይ አቶ ጌተታና።

³² ሄ ኡራይ ባ ናጋራ ግሾ ያርሸይ ዶርሰ ግድኮ፥ ቦረይ ባይና ማጫ ዶርሰ ግዶ።

³³ እ ባ ኩሽያ ሄ ዶርሰ ሁጰን ዎ፤ ያትድ፥ ፁሳ ያርሾ መሄ ሹክያ በሳን ሹኮ።

³⁴ ሄሳፈ ጉየ፥ ካህነይ ዶርሰ ሱን ባ ብራያ የድ ኤክድ ፁሳ ያርሾይ ያርሸትያ በሳን ደእያ ካጨታ ቦላ ትዮ። አትዳ ሱ ያርሾ በሳፈ ጋርሳን ጉሶ።

³⁵ እስፈተ ያርሾስ ሹከትዳ መህያፐ ሞዋ ከስዳይሳዳ ሄ ዶርሰ ሞዋ ቆር ከስድ፥ ያርሾ በሳን ጎዳስ ፁሳ ያርሾ ኦድ ፁጎ። ሄሳዳ ኦድ፥ ካህነይ ሄ ኡራ ናጋራ ቁሽሴስ፤ እያ ናጋራይ አቶ ጌተታና።