Leeweta 27 - ጌሻ ማፃፋ

ዎዞ ዎጋ

¹ ጎዳይ ሙሰኮ ሀይሳዳ ያግስ።

² እስራኤለ አሳስ ሀይሳዳ ያጋዳ ኦዳ፤ እስ አስ ጎዳስ አሰ እማናዉ ቃንግኮ፥ ዎዞ ጋትያ ነ ጋማትዳይሳ መላ ሄ ኡራ ግሾ ሚሸ ቃንፆ።

³ ላታሙ ላይፈ ብድ ኡሱፑን ታሙ ላይ ጋካናዉ ደእያ አደ ግድኮ ጌሻ ዱንካነን ኤረትዳ ምዛነን ኡሱፑን ፄቱ ብራ ሳንትመ ቃንፆ።

⁴ ማጫ ግድኮ ሀስታሙ ብራ ሳንትመ ቃንፆ።

⁵ እቻሹ ላይፈ ብድ ላታሙ ላይ ጋካናዉ ደእያ አደ ግድኮ ላታሙ ብራ ሳንትመ ቃንፆ፤ ቃስ ማጫስ ግድኮ ታሙ ብራ ሳንትመ ቃንፆ።

⁶ እስ አጌናፐ ብድ እቻሹ ላይ ጋካናዉ ደእያ አደ ግድኮ እቻሹ ብራ ሳንትመ ቃንፆ፤ ቃስ ማጫስ ግድኮ ሄ ብራ ሳንትመ ቃንፆ።

⁷ ላይ ኡሱፑን ታማነ እያፐ ቦላ ግድዳ አደ ግድኮ፥ ታማነ እቻሹ ብራ ሳንትመ፤ ቃስ ማጫስ ግድኮ ታሙ ብራ ሳንትመ ቃንፆ።

⁸ ቃንግዳ ኡራይ ኔኒ ጋማትዳይሳ ቃንፃናዉ ዳንዳኦና ማንቆ ግድኮ፥ እ ባ ቃንገ ጋናዉ እምዳ ኡራ ኤህድ ካህንያ ስንን ኤሶ፤ ቃንገትዳ ኡራይ ቃንፃናዉ ዳንዳኤይሳ ኬና ቆፕድ ካህነይ ጋማቶ።

⁹ እስ አስ ጎዳስ ያርሾ ኦድ እማናዉ ቃንግዳይ መሄ ግድኮ ጎዳስ እመትያ መሄ ኡባይ ጌሽ ግዴስ።

¹⁰ ሄ መህያ ግሾ ሀራ መሄ እሞፎ፤ ዎይኮ እያ ሀራ መሄራ ላሞፎ። ሎኡዋ ኢታራ ዎይኮ ኢታ ሎኡዋራ ላሞፎ፤ ሽን እ ላምኮ፥ ኮይሮ መሄይነ ላመ እምዳ መሄይ ናምአይካ ጌሽ ግዶ።

¹¹ እስ አስ ጎዳስ ያርሾ ኦድ እማናዉ ገፕዳ መሄይ ጌሽ ግዶና እፅኮ፥ ሄ ኡራይ ሄ መህያ ካህንያ ስን ኤሆ።

¹² ሎኦ ግድን፥ ኢታ ግድን ካህነይ ሄ መህያ ጋማቶ፤ ካህነይ ጋማትዳይስ እያዉ ጋተ ግዶ።

¹³ ሽን ሄ መህያ ጎዳይ ዛሪድ ዎዛናዉ ኮይኮ፥ ሄ መህያ ጋትያ ቦላ ፄታፐ ላታሙ ኩሸ ጉጆ።

¹⁴ እስ አስ ባ ኬ ጌሽ ኦድ ጎዳስ ዱማይኮ፥ ሎኦ ግድን፥ ኢታ ግድን ካህነይ ሄ ኬ ጋማቶ፤ ካህነይ ጋማትዳይስ እያዉ ጋተ ግዶ።

¹⁵ ባ ኬ ጌሽ ኦድ ጎዳስ ዱማይዳ ኡራይ ዛሪድ ዎዛናዉ ኮይኮ፥ ሄ ኬ ጋትያ ቦላ ፄታፐ ላታሙ ኩሸ ጉጆ፤ ስሚድ ኬይ እያባ ግዴስ።

¹⁶ እስ አስ ባ ላታ ጋድያፐ ሻክድ ጌሽ ኦድ ጎዳስ ዱማይኮ፥ ሄ ጋድያ ጋተይ እያን ዘረትያ ዘረን ጋማተቶ። ሄስካ ናምኡ ፄታነ ላታሙ ክሎ ግራመ ባንጋ ዘርያ ጋደ ግድኮ፥ እሻታሙ ሳቅለ ቃንፆ።

¹⁷ እ ባ ጋድያ እሻታማን ላይ ባለፐ ዶምድ ጌሽ ኦድ ጎዳስ ዱማይኮ፥ ሄ ጋድያ ኩመ ጋትያ ቃንፆ።

¹⁸ ሽን እ ባ ጋድያ እሻታማን ላይ ባለይ አን፥ ጌሽ ኦድ ጎዳስ ዱማይኮ፥ ካልድ ደእያ እሻታማን ላይ ባለይ ጋካናዉ ደእያ ላይታ ካህነይ ታይብድ፥ እያ ኩመ ጋትያፐ ዎ።

¹⁹ ሄ ጋድያ ጌሽ ኦድ ጎዳስ ዱማይዳ ኡራይ ዛሪድ ዎዛናዉ ኮይኮ፥ ጋማተትዳ ጋትያ ቦላ ፄታፐ ላታሙ ኩሸ ጉጆ፤ ስሚድ ጋደይ እያባ ግዴስ።

²⁰ ሽን እ ጋድያ ዛሪድ ዎዛናፐ ስን ሀራ አሳስ ባይዝኮ፥ ሄ ጋድያ ዎዛናዉ ዳንዳኤና።

²¹ እሻታማን ላይ ባለይ ጋክን ጋደይ የደትያ ዎደ ሄ ጋደይ ናምአን ጉየ ስሞና ጎዳስ ጌሽ ግዶ፤ ሄ ጋደይ ካህነታባ ግዴስ።

²² እስ አስ ሀራ አሳፐ ሻምዳ ጋድያ ጌሽ ኦድ ጎዳስ ዱማያናዉ ኮይኮ፥

²³ ካልያ እሻታማን ላይ ባለይ ጋካናዉ ደእያ ጋትያ ካህነይ ጋማትኮ፥ ኡራይ ሄ ጋላስ ጋማትዳ ጋትያ ቃንፆ፤ ሄ ሚሸይ ጎዳስ ዱማትዳ ሚሸ ግዳና።

²⁴ እሻታማን ላይ ባለይ ጋክያ ዎደ ሄ ጋደይ ኮይሮ ላታን ኤክድ ባይዝዳ ኡራስ ስሜስ።

²⁵ ኤንታ ጋተይ ጌሻ ዱንካንያን ኤረትዳ ምዛነን ጋማተቴስ። (እስ ሳቅለይ ላታሙ ጌራ ግዴስ)።

²⁶ ሽን ኦንካ ባይራ የለትዳ መሄ ጎዳስ ዱማይድ ሺሻናዉ ዳንዳኤና፤ እ ካሰካ ጎዳባ። ሚዝ ዎይኮ ዶርሰ ግድን ጎዳባ።

²⁷ ሄ መሄይ ጌሽ ግዶና እፅኮ፥ እ ጋማተትዳ ጋትያ ቦላ እቻሻፐ እስ ኩሸ ጉጅድ እያ ጎዳይ ዛሪድ ዎዞ። እ ዎዞና እፅኮ፥ ጋማተትዳ ጋትያን ሀራ አሳስ ባይዘቶ።

²⁸ እስ አስ ጎዳስ ዱማይድ እምዳባይ አይባ ግድኮካ፥ አሰ ዎይኮ መሄ ዎይኮ እያ ላታ ጋደ ግድን፥ ባይዘተናነ ዎዘተና። እ ዱማይዳባ ኡባይ ጎዳስ ኡባፈ ጌሽ።

²⁹ አሳ ግዶፈ ሀይቃና መላ ፕርደትዳ አስ ኦንካ ዎዘቶፎ፤ ሄ ኡራይ ሀይቆ።

³⁰ ጋደን ካፅዳ ካ ዎይኮ ም አይፈ ግድን ታማፈ እሶይ ጎዳባ። ሄስ ጎዳስ ጌሽ።

³¹ እስ አስ ባ አስራታ ዎዛናዉ ኮይኮ፥ እያ ጋትያ ቦላ ፄታፐ ላታሙ ኩሸ ጉጅድ ዎዞ።

³² ሚዛ አስራታ ዎይኮ ዶርሳ አስራታ ዎይኮ ዴሻ አስራታ ግድን፥ ሄንንቹዋ ፃምአፈ ጋርሳራ አያ ታማፈ እሶይ ጎዳስ ጌሽ።

³³ ታማን መሄይ ኢታ ግድን፥ ሎኦ ግድን ዶሮፖ፤ ዎይኮ እያ ሀራራ ላሞፎ። ላምኮ፥ ኮይሮይነ ላመ እምዳ ናምአይ ጎዳስ ጌሽ ግዶሶና፤ ዛሪድ ዎዛናዉ ዳንዳኤተና።

³⁴ ሲና ዙማ ቦላ ጎዳይ ሙሰ ባጋራ እስራኤለ አሳ ኪትዳ ኪታይ ሀይሳ።