Leeweta 2 - ጌሻ ማፃፋ

ካ ያርሾ

¹ ኦንካ ካ ያርሾ ጎዳስ ያርሽያ ዎደ ሄ ያርሾይ ሎኦ ለ ግዶ፤ እያ ቦላ ዛይተነ እፃነ ጉጆ።

² ሄሳ ካህነ ግድዳ አሮና ናይታኮ ኤሆ፤ ካህነት ሄ ሎኦ ልያፈ እስ ኩጫ ኤክድ፥ ዛይተነ እፃነ ኡባ ጉጅድ ያርሾ በሳ ቦላ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና።

³ ካ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።

⁴ ያርሸትያ ኡይይ ጮጨን ኮምፐትዳ ግድኮ፥ ዛይተራ ሙኑቀትዳ ሎኦ ለ ግዶ። ሄ ኡይይ እርሾይ ባይና ዛይተን ሙኑቀትዳይሳ ዎይኮ ሌኦን ኡከትድ ዛይተን ትየትዳይሳ ግዶ።

⁵ ያርሸትያ ኡይይ በሸን ኡከትዳባ ግድኮ፥ እርሾይ ባይና ዛይተን ሙኑቀትዳ ሎኦ ለ ግዶ።

⁶ እያ መንዳ እያ ቦላ ዛይተ ትጋዳ ካ ያርሾ ኦዳ ያርሻ።

⁷ ነ ያርሽያ ካይ ኦቶን ካፅዳባ ግድኮ ዛይተን ሙኑቀትዳ ሎኦ ለ ግዶ።

⁸ ሄሳዳ ሀንድ ጊግዳ ካ ያርሹዋ ጎዳስ ኤሀዳ ካህንያስ እማ፤ ካህነይ ሄሳ ኤክድ ያርሾ በሳን ያርሾ።

⁹ ካህነይ ሄ ካ ያርሹዋ ኤክድ፥ ያርሾ በሳን ፁሳ ያርሾ ኦድ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና።

¹⁰ ካ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።

¹¹ ኔኒ እርሾ ዎይኮ ኤስ ጎዳስ ታማን ፁጋዳ ያርሻናዉ በሶና ግሾ ጎዳስ ህንተ ኤህያ ካ ያርሾይ እርሾይ ደእያባ ግዶፖ።

¹² ሀይሳታ ባይራ ያርሾ ኦድ ጎዳስ ያርሻናዉ ዳንዳኤታ፥ ሽን ሳዎ ቶንኩ ግያ ያርሾ ኦድ ጎዳስ ያርሾ በሳን ፁጎፍተ።

¹³ ማፅነይ፥ ኔኒ ነ ፆሳራ ጫቅዳ ጫቁዋስ ማላ ግድያ ግሾ ነ ካ ያርሾ ኡባን ማፅነ የጋ። ነ ካ ያርሾ ኡባ ማፅነን ማልኤ።

¹⁴ ኔኒ ካፈ ባይራ ጎዳስ ኤህያ ዎደ ጫጨትድ ሽርከትዳ ትያ ግዳናዉ በሴስ።

¹⁵ ሄስ ካ ያርሾ ግድያ ግሾ እያ ቦላ ዛይተ ትጋ፤ እፃነ ዎ።

¹⁶ ካህነይ ሄ ጫጨትድ ሽርከትዳነ ዛይተይ ትገትዳ ካ ያርሹዋፈ ባጋ ኤክድ እፃነ ኡባራ ቆፍሶ ያርሾ ኦድ ጎዳስ ታማን ፁጎ።