Leeweta 17 - ጌሻ ማፃፋ

ሱ ሞና መላ ድገትስ

¹ ጎዳይ ሙሰኮ ሀይሳዳ ያግስ፤

² “አሮናስ እያ አደ ናይታስነ እስራኤለ አሳ ኡባስ ሀይሳዳ ያጋዳ ኦዳ፤ ጎዳይ ኪትዳይስ ሀይሳ፤

³ እስራኤለ አሳፐ ኦንካ ቦር ዎይኮ ማራዘ ዎይኮ ኮለ ጉታን ዎይኮ ጉታፐ ጋፃን ሹክድ፥

⁴ ጎዳስ እሞታ ኦድ እማናዉ ጌሻ ዱንካንያ ፐንገ ጎዳ ስን ኤሆና እፅኮ፥ እ ሄ ሱን ኦይሸቴስ። ሄ ኡራይ ሱ ጉስዳ ግሾ ባ አሳ ግዶፈ ኩረቶ።

⁵ ሄሳ ግሾ፥ እስራኤለ አሳይ ያርሾ መሄ ጮ ደንባን ሹከይሳ አግድ፥ ጎዳ ስንን ጌሻ ዱንካንያ ፐንገን ደእያ ካህንያኮ ኤሆ። ካህነይ ሄሳ ኤክድ፥ ጎዳስ እስፈተ ያርሾ ኦድ ሹኮ።

⁶ ካህነይ ጌሻ ዱንካንያ ፐንገን ደእያ ያርሾ በሳ ቦላ ሄ ሱ ዉርፆ። ሞዋ ጎዳስ ሳዎ ቶንኩ ግያ ያርሾ ኦድ ፁጎ።

⁷ እስራኤለ አሳይ ጎዳ አግድ ካልዳ ቱና አያናታስ ዛሪድ ባንታ ያርሹዋ ያርሾፎ። ሄስ ኤንታዉነ ያና የለተ ኡባስ መርና ዎጋ ግዶ።

⁸ “ኤንታኮ ሀይሳዳ ያጋ፤ እስራኤለ አሳፐ ግድን ዎይኮ ኤንታ ግዶን ደእያ አላጋ ቢታ አሳፐ ግድን፥ ኦንካ ፁሳ ያርሾ ዎይኮ ሀራ ያርሾ ሺሽያ ዎደ፥

⁹ ጎዳስ ያርሻናዉ ጌሻ ዱንካንያ ፐንገ ኤሆና እፅኮ፥ ሄ ኡራይ ባ አሳ ግዶፈ ኩረቶ።

¹⁰ “እስራኤለ አሳፐ ዎይኮ ኤንታ ግዶን ደእያ አላጋ ቢታ አሳፐ ኦንካ ሱ ሚኮ፥ ሄ ሱ ምያ ኡራ ቦላ ታ ዞኮ ዛራና፤ ታኒ ሄ ኡራ አሳ ግዶፈ ኩራና።

¹¹ አይስ ጊኮ አሾ ማእዳ ኡባ ደኦይ እያ ሱ ግዶን ደኤስ፤ ሱ ደኦይ እያ ግዶን ደእያ ግሾ ናጋራ አቶ ጊሴስ። ህንተ ናጋራ አቶተስ ሱ ያርሻና መላ ህንተዉ እማስ።

¹² ታኒ እስራኤለ አሳኮ፥ ህንተፈ ዎይኮ ህንተ ግዶን ደእያ አላጋ ቢታ አሳፐ ኦንካ ሱ ሞፖ ያግዳይ ሄሳ ግሾሳ።

¹³ “እስራኤለ አሳፐ ዎይኮ ኤንታ ግዶን ደእያ አላጋ ቢታ አሳፐ ኦንካ ሜተትያ ዶአ ዎይኮ ካፎ ሻንካትድ ዎኮ፥ እያ ሱ ሳአን ጉስድ ቢታ ካሞ።

¹⁴ አይስ ጊኮ አሾ ማእዳ ኡባ ደኦይ እያ ሱ ግዶና። አሾ ማእዳ መተታ ኡባ ደኦይ እያ ሱ ግዶን ደእያ ግሾ፥ ሱ ሞፕተ፤ ቃስ ምያ ኦንካ ባ አሳ ግዶፈ ኩረቶ ያጋዳ እስራኤለ አሳስ ኦዳስ።

¹⁵ “እስራኤለ አሳ ግድን ዎይኮ ኤንታ ግዶን ደእያ አላጋ ቢታ አሳ ግድን፥ ኦንካ ባዉታ ዎይኮ ዶእ ዎዳባ ሚኮ፥ ባ ማኡዋ ሜጮ፤ ባ አሳተ ሜጨቶ፤ ያትድ ኦማርስ ጋካናዉ ቱና ግዴስ። ሄሳፈ ጉየ፥ እ ጌሽ ግዳና።

¹⁶ ባ ማኡዋ ሜጮና እፅኮ፥ ባ አሳተ ሜጨቶና አግኮ፥ እ ባ ናጋራ ባዉ ቶኬስ።”