Leeweta 14 - ጌሻ ማፃፋ

ጎጋ ሀርገፈ ጌሾ ዎጋ

¹ ጎዳይ ሙሰኮ ሀይሳዳ ያግስ፤

² ጎጋ ሀርገይ ኦይክዳ ኡራይ ጌይያ ጋላስ ኦናዉ ኮሽያ ዎጋይ ሀይሳ። ሄ ኡራ ካህንያኮ ኤሀናዉ ኮሼስ።

³ ካህነይ ጉታፐ ጋፃ ከይድ እያ ሀርግያ በኦ። እ በእያ ዎደ ጎጋ ሀርገይ ኡራ አሳተፈ ይዳባ ግድኮ፥

⁴ ካህነይ ናምኡ ቱና ግዶና ካፎታ፥ ዝጋ ም ቃንፆ፥ ዞኦ ቃጭናነ ህሶጰ ቦንጮ ሄ ሀርግያፈ ጌይያ ኡራ ግሾ ኤሀና መላ ኪቶ።

⁵ ሄሳፈ ጉየ፥ ካህነይ ናምኡ ካፎታፐ እሱዋ ፑልቶፈ ዱቅድ ከረን ቆልዳ ሃ ቦላ ሹካና መላ ኪቶ።

⁶ ሀንኮ ካፉዋ ዞኦ ቃጭናራነ ህሶጰ ቦንጮራ ኤክድ፥ ከረን ደእያ ፑልቶ ሃ ቦላ ሹክዳ ካፉዋ ሱን ናቆ።

⁷ ሄ ሱ፥ ሄ ጎጋ ሀርግያፈ ጌይያ ኡራ ቦላ ላፑን ቶሆ ዉርፆ፤ ሄ ኡራይ ቱና ግዶናይሳ ኤርሶ፤ ፓፃ ደእያ ካፉዋ ደምባ የዶ።

⁸ ሄ ሀርግያፈ ጌይያ ኡራይ ባ ማኡዋ ሜጮ፤ ባ አሳተ ቦላ ደእያ እክሰ ኡባ ሜደቶ፤ ባ አሳተ ሜጨቶ። ሄሳፈ ጉየ፥ እ ጌይድ ጉታ ገሎ፥ ሽን ባ ዱንካንያ ግዶ ገሎና ላፑን ጋላስ ካረን ጋምኦ።

⁹ ላፑን ጋላስ ባ ሁጵያ፥ ቡቻ፥ ዴሙዋነ ባ አሳተ ቦላ ደእያ ሀራ እክሰ ኡባ ሜደቶ፤ ቃስ ባ ማኡዋ ሜጮ፤ ባ አሳተካ ሜጨቶ፤ ሄሳፈ ጉየ፥ እ ጌሽ ግዳና።

¹⁰ ሆስፑን ጋላሳን ቦረይ ባይና ናምኡ ኡርገ ዶርሳታነ እስ ላይ ግድዳ እስ ማጫ ዶርሰ ኤሆ። ቃስ ካ ያርሾስ ዛይተራ ሙኑቀትዳ ሄ ክሎ ግራመ ሎኦ ለነ እስ ልትሮ ዛይተፐ ስኮ ኤሆ።

¹¹ እያ ጌሽያ ካህነይ ኡራነ እ ኤህዳ ያርሾታራ እስፈ ጌሻ ዱንካንያ ፐንገን ጎዳ ስንን ሺሾ።

¹² ካህነይ ናምኡ ዶርሳ ኡርገታፐ እሱዋ ኤክድ፥ እስ ልትሮስ ስኮ ዛይተራ እስፈ ናቆ ያርሾ ኦድ ሺሾ፤ ሄ ሺቅዳ ያርሹዋ ዩሾ ያርሾ ኦድ ጎዳ ስንን ሺሾ።

¹³ ያትድ፥ እ ሄ ዶርሳ ኡርግያ ናጋራ ያርሾነ ፁሳ ያርሾ ሹክያ ጌሻ በሳን ሹኮ። ናጋራ ያርሹዋ መላ ናቆ ያርሾይካ ካህንያስ እመቴስ፤ እካ ኡባፈ አዳ ጌሽ።

¹⁴ ካህነይ ናቆ ያርሹዋ ሱፈ ጉ ኤክድ፥ ሄ ጌይያ ኡራስ ኡሻቻ ባጋ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ትዮ።

¹⁵ ሄሳፈ ጉየ፥ ካህነይ ዛይትያፐ ጉራ ኤክድ፥ ባ ሀድርሳ ኩሽያ ቃቃን ትጎ።

¹⁶ ሄ ሀድርሳ ኩሽያ ቃቃን ደእያ ዛይትያ ባ ኡሻቻ ኩሸ ብራያ የድ የድ ኤክድ፥ ጎዳ ስንን ላፑን ቶሆ ዉርፆ።

¹⁷ ያትድ፥ ባ ኩሽያ ቃቃን ደእያ ዛይትያፐ ኤክድ፥ ጌይያ ኡራስ ኡሻቻ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ካሰ ናቆ ያርሹዋ ሱ ትይዳ በሳን ትዮ።

¹⁸ ቃስ ባ ኩሽያ ቃቃን አትዳ ዛይትያ ካህነይ ጌይያ ኡራ ሁጰን ጉሶ፤ ያትድ ጎዳ ስንን ሄ ኡራ ናጋራ አቶ ያግሶ።

¹⁹ ሄሳፈ ጉየ ካህነይ ጌይያ ኡራ ናጋራ አቶተስ ሺቅዳ ያርሹዋ ያርሼስ፤ ካልድ ቃስ ፁሳ ያርሾስ ሺቅዳ መህያ ሹኬስ።

²⁰ ካህነይ ፁሳ ያርሹዋ ካ ያርሹዋራ እስፈ ያርሾ በሳን ዎድ ፁጌስ፤ ያትድ ኡራ ናጋራ አቶ ያግሴስ፤ ሄ ኡራይ ጌዬስ።

²¹ ሽን ኡራይ ሄሳ ኡባ ኤሀናዉ ዳንዳኦና ማንቆ ግድኮ፥ ጎዳ ስንን እያ ናጋራ አቶተስ ዩሻናዉ ናቆ ያርሾስ እስ ዶርሳ ኡርገ ኤሆ። ካ ያርሾስ ዛይተራ ሙኑቀትዳ እስ ክሎ ግራመ ሎኦ ለነ እስ ልትሮ ዛይተፐ ስኩዋ ኤሆ።

²² ባዉ ዳንዳኤትዳ መላ ናምኡ ሆለ ዎይኮ ናምኡ ኩራቾ እሱዋ ናጋራ ያርሾስ፥ እሱዋ ፁሳ ያርሾስ ኤሆ።

²³ ሆስፑን ጋላስ ባ ቱናተፈ ጌይያ ኡራይ ጌሻ ዱንካንያ ፐንገን ጎዳ ስን ኤህድ ካህንያስ እሞ።

²⁴ ካህነይ ናቆ ያርሾስ ይዳ ዶርሳ ኡርግያነ ዛይትያ ኤክድ፥ ዩሾ ያርሾ ኦድ ጎዳ ስንን ዩሾ።

²⁵ ናቆ ያርሾስ ይዳ ዶርሳ ኡርግያ ሹኮ፤ ሄ ኡርግያ ሱፈ ጉራ ኤክድ፥ ሀ ጌይያ ኡራ ኡሻቻ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ትዮ።

²⁶ ካህነይ ዛይትያፐ ጉራ ባ ሀድርሳ ኩሽያ ቃቃን ትጎ።

²⁷ ሀድርሳ ኩሽያ ቃቃን ደእያ ዛይትያፐ ኡሻቻ ኩሽያ ብራያ የድ ኤክድ፥ ጎዳ ስንን ላፑን ቶሆ ዉርፆ።

²⁸ ካህነይ ባ ኩሽያ ቃቃን ደእያ ዛይትያፐ ጉራ ኤክድ፥ ጌይያ ኡራስ ኡሻቻ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ካሰ ናቆ ያርሾ ሱ ትይዳ በሳን ትዮ።

²⁹ ጎዳ ስንን ኡራ ናጋራ አቶተስ ካህነይ ባ ኩሸን አትዳ ዛይትያ ጌይያ ኡራ ሁጰን ትጎ።

³⁰ ሄሳፈ ጉየ፥ ጌይያ ኡራይ ባዉ ዳንዳኤትዳይሳ መላ ሆለ ዎይኮ ኩራቾ ኤሆ።

³¹ እሱዋ ናጋራ ያርሾስ ናምአንዋ ፁሳ ያርሾስ ካ ያርሹዋራ እስፈ ሺሾ። ካህነይ ጌይያ ኡራ ናጋራ ጎዳ ስንን እያ ናጋራ አቶ ያግሶ።

³² ባ አሳተ ቦላ ደእያ ጎጋ ሀርግያፈ ጌያናዉ ማንቆተ ድግዳ ኡራስ ደእያ ዎጋይ ሀይሳ።

ኬ ቦላ ከይያ ቡቃ

³³ ጎዳይ ሙሰኮነ አሮናኮ ሀይሳዳ ያግስ፤

³⁴ “ታኒ ህንተዉ እምያ ካናነ ቢታ ህንተ ገልያ ዎደ ሄ ቢታን ደእያ ህንተ ኬፈ እሱዋን ታኒ ቡቃ የድያ ዎደ፥

³⁵ ሄ ኡራይ ካህንያኮ ብድ፥ ‘ታ ኬ ቦላ ቡቃ ዳንያባይ ደኤስ’ ያግድ ኦዶ።

³⁶ ካህነይ ሶ ገልድ ቡቃ ቆሙዋ በአናፐ ካሰትድ፥ ሶን ደእያባይ ኡባይ ቱና ጌተቶና መላ ሶን ደእያባ ኡባ ካረ ከሳና መላ ኪቶ፤ ሄሳፈ ጉየ፥ ካህነይ በአናዉ ሶ ገሎ።

³⁷ እ ገልድ በእያ ዎደ ቡቃይ ጎዳ ቦላ ጭሊሎ ዎይኮ ዞኦ ማላ በስኮነ ቃስ ጎዳ ምድ ኦላይድ ግዶ ገልኮ፥

³⁸ ካህነይ ካረ ከይድ፥ ኬ ላፑን ጋላስ ጋካናዉ ጎርዶ።

³⁹ ላፑን ጋላሳን ካህነይ ሄ ኬ ዛሪድ ፄልያ ዎደ ሄ ቡቃይ ኬ ጎዳ ቦላ ዳልግኮ፥

⁴⁰ ቡቃይ ደእያ ሹቻ ኡባ ጎዳፐ ሾድድ፥ ካታማፐ ጋፃ ከስድ ቱና በሳን የጋና መላ ኪቶ።

⁴¹ ካልድ ጎዳ ሜሽዳ ኡርቃ ሶ ባጋራ ቦክድ፥ ዩሽ አድ ቆቆፋና መላ ኦ፤ ያትድ ሄ ኡርቃ ካታማፐ ጋፃን ደእያ ቱና በሳን የጎ።

⁴² ሄሳፈ ጉየ፥ ሄ ሾደትዳ ሹቻታ በሳን ሀራ ሹቻታ ዎ፤ ሀራ ኡርቃን ኬ ሜሾ።

⁴³ “ሹቻይ ሾደትን፥ ኡርቃይ ቆቆፈትን፥ ሀራ ኡርቃ ሜሽ ስምን፥ ቡቃይ ኬ ግዶን ዛር በንትኮ፥

⁴⁴ ካህነይ ሄሳ በኦ። እ በእያ ዎደ ቡቃይ ሄ ኬ ግዶን ዳልግኮ፥ ሄስ አሳፐ አሰ ኦይክያ ቡቃ ሀርገ ግድያ ግሾ ሄ ካይ ቱና።

⁴⁵ ሄሳ ግሾ ሄ ኬ፥ እያ ሹቻ፥ እያ ምነ እ ሜሸትዳ ኡርቃ ኡባ ላልድ ካታማፐ ጋፃ ኤፍድ፥ ቱና በሳን የጎ።

⁴⁶ ሄ ኬይ ጎርዳን ጋምእያ ዎደ እያ ግዶ ገልያ ኦንካ ኦማርስ ጋካናዉ ቱና።

⁴⁷ ሄ ኬን አቅያ ዎይኮ ካ ምያ ኡራይ ባ ማኡዋ ሜጮ።

⁴⁸ “ሽን ካህነይ ይድ ፄልያ ዎደ ኬይ ሜሸትድ ስምን፥ ዛሪድ ዳልጎና እፅኮ፥ ቡቃይ ይዳ ግሾ፥ ሄ ኬይ ቱና ግዶናይሳ ካህነይ ኤርሶ።

⁴⁹ ኬ ጌሻናዉ ናምኡ ካፎታ፥ ዝጋ ም ቃንፆ፥ ዞኦ ቃጭናነ ህሶጰ ቦንጮ ኤሆ።

⁵⁰ ካፎታፐ እሱዋ ፑልቶፈ ዱቅድ ከረን ቆልዳ ሃን ሹኮ።

⁵¹ ሄሳፈ ጉየ፥ ዝጋ፥ ህሶጰ ቦንጩዋ፥ ዞኦ ቃጭናነ ፓፃ ደእያ ካፉዋ ኤክድ፥ ከረን ደእያ ሹከትዳ ካፉዋ ሱንነ ፑልቶ ሃን የድ ኤክድ ላፑን ቶሆ ሄ ኬ ዉርፆ።

⁵² ያትድ፥ ካህነይ ሄ ኬ ካፉዋ ሱን፥ ፑልቶ ሃን፥ ፓፃ ደእያ ካፉዋን፥ ዝጋ ምን፥ ህሶጰ ቦንጩዋንነ ዞኦ ቃጭናን ጌሾ።

⁵³ ፓፃ ደእያ ካፉዋ ካታማፐ ጋፃ የዶ። ሄሳዳ ኦድ፥ ኬ ጌሽያ ዎጋ ፖሌስ፤ ኬይ ጌሽ ግዴስ።

⁵⁴ “ዱማ ዱማ ጎጋ ሀርጌስነ ጎኦ ሀርጌስ እመትዳ ዎጋይ ሀይሳ።

⁵⁵ ማኦ ቦላ ዎይኮ ኬ ቦላ ከይያ ቡቃ ሀርገ ግድን፥

⁵⁶ ክፃ ግድን፥ መርኮ ግድን፥ እራለ ግድን፥

⁵⁷ እስባይ ቱና ግደይሳነ ቱና ግዶናይሳ ኤርስያ ዎጋይ ሀይሳ።”