Leeweta 1 - ጌሻ ማፃፋ

ፁሳ ያርሾ

¹ ጎዳ ፆሳይ፥ ጌሻ ዱንካንያ ግዶን ግድድ ሙሰ ፄግድ ያግስ፤

² እስራኤለ አሳስ ሀይሳዳ ያጋዳ ኦዳ፤ ህንተፈ ኦንካ ጎዳስ ያርሾ ያርሽያ ዎደ ባ መህያፐ፥ ባ ዶርሳፈነ ባ ዴሻፐ ኤሆ።

³ ሄ ያርሾይ መሄፐ ፁሳ ያርሾስ ግድኮ ቦረይ ባይና ዎፋኖ ግዶ። ጎዳይ ሄ ያርሹዋ ኤካና መላ ጌሻ ዱንካንያ ገልያ ፐንገን ያርሾ።

⁴ ያርሹዋ ያርሽያ ኡራይ ፁሳ ያርሾስ ኤህዳ መህያ ሁጰን ባ ኩሽያ ዎ። ሄስ እያ ናጋራ አቶተስ ጎዳይ ኤክዳ ያርሾ ግዳና።

⁵ እ ሄ ዎፋኑዋ ጎዳ ስንን ሹኮ፤ ካህነት፥ አሮና ናይት ሄ ሱ ኤክድ፥ ጌሻ ዱንካነ ገልያ ፐንገን ደእያ ያርሾ በሳ ኦይዱ ማዛነታ ቦላ ዉርፆ።

⁶ ሄ መህያ ጋልባ ቃርድ፥ አሹዋ ቆሞን ቆሞን ከሶ።

⁷ ካህንያ አሮና ናይት ያርሾ በሳን ም ዎድ ታማ ኤ።

⁸ ካህነት፥ አሮና ናይት ሄ ከስዳ አሹዋ ቦላ ሁጵያነ ሞዋ ጉጅድ፥ ያርሾ በሳን ታማን ደእያ ም ቦላ ማራይድ ዎ።

⁹ ሽን ሄ ኡራይ ኡሎ አሹዋነ ገዳታ ሃን ሜጮ። ካህነይ ሄ ኡባ ያርሾ በሳን ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።

¹⁰ ፁገትያ ያርሾስ እ እምያ እሞይ ዶርሳፈ ዎይኮ ዴሻፐ ግድኮ፥ ቦረይ ባይና ማራዘ ዎይኮ ኮለ ግዶ።

¹¹ ሄ መህያ ያርሾ በሳፈ ፑደሀ ባጋራ ጎዳ ስንን ሹኮ። ካህነት፥ አሮና ናይት ሄ ሱ ኤክድ ያርሾ በሳ ኦይዱ ማዛነታ ኡባ ቦላ ዉርፆ።

¹² ሄ ኡራይ አሹዋ ቆሞን ቆሞን ከሶ፤ ካህነይ ሄ ከስዳ አሹዋ ቦላ ሁጵያነ ሞዋ ጉጅድ፥ ያርሾ በሳን ታማን ደእያ ም ቦላ ማራይድ ዎ።

¹³ ሽን ሄ ኡራይ ኡሎ አሹዋነ ገዳታ ሃን ሜጮ፤ ካህነይ ሄ ኡባ ያርሾ በሳን ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።

¹⁴ ጎዳስ ያርሸትያ ፁሳ ያርሾይ ካፎ ግድኮ ሆለ ዎይኮ ኩራቾ ግዶ።

¹⁵ ካህነይ ሄሳ ኤክድ ቆያ ኩሸራ ዱ፤ ሁጵያ ያርሾ በሳ ቦላ ደእያ ታማን ፁጎ። እያ ሱይ ያርሾ በሳ ምየራ ጉኮ።

¹⁶ ኡሎ አሹዋነ ቀፍያ ከስድ፥ ያርሾ በሳፈ ዶሎሀ ባጋራ ብዶ ቆልያ በሳን የጎ።

¹⁷ እ ሄ ካፉዋ ቀፈታ ኦይክድ ሻኮ፥ ሽን ኩመ ሻኮፎ። ካህነይ ያርሾ በሳ ቦላ ደእያ ታማን ዎድ ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።