Leemiso 9 - ጌሻ ማፃፋ

ጭንጫተ፥ ኤራተነ ኤያተ

¹ ጭንጫተ ባ ኬ ኬፃሱ፤ ላፑን ቱሳታ ባ ኬስ ኤሳሱ።

² እያ ባ ጊግስያ ግብራስ ሞ መሄ ሹካሱ፤ ዎይነ አጋሱ፤ ጋይታ አሳ ስን አሱ።

³ አሳ ፄጋናዉ ባ አይለታ ኪታሱ፤ ኦሳንቾት ካታማ ቃ በሳን ኤቅድ፥

⁴ ህንተኖ፥ ኤር ፓጭዳይሳቶ ሃ ገልተ! ኤያታኮ ሀይሳዳ ያጋሱ።

⁵ “ሃ ዪተ፤ ታ ካ ሚተ፤ ታ አግዳ ዎይንያ ኡይተ።

⁶ ህንተ ኤያተ አግድ ደኦን ደእተ፤ አኬክድ ሄመትተ” ያጋሱ።

⁷ ቀልቅስያ ኡራ ሴርያ አስ ጫሸ ኤኬስ፤ ኢታ ኡራ ዞርያ አስ ባዉ ቆሄቴስ።

⁸ ቀልቅስያ ኡራ ዞሮፓ፤ እ ነና እፃና፤ ጭንጫ ኡራ ዞራ፤ እ ነና ዶሳና።

⁹ ጭንጫተ ኡራ ታማርሳ፤ እ ጭንጫ ግዳና፤ ፅሎ ኡራ ታማርሳ፤ እ ኤራ ጉጃና።

¹⁰ ጎዳስ ያሽ ጭንጫተስ ዶመ፥ ጌሻ ጎዳ ኤሮይ አኬካ።

¹¹ ታ ጋሶን ነ ላይይ ዳራና፤ ነ ደኦ ላይይ አዱቃና።

¹² ነ ጭንጫ ግድኮ፥ ጎኤተይ ነና፤ ነ ቀልቅስያ አስ ግድኮ ነና ቆሃሳ።

¹³ ኤያ ማጫስ ዋሶ ዳራዉሱ፤ እዉ ዬል ባዋ፤ እያ አይኮካ ኤሩኩ።

¹⁴ እያ ባ ካረን ዎይኮ ካታማ ቃ በሳን ኡታዉሱ።

¹⁵ ባንታ ኦግያ ብያ አሳ ፄጋዳ፥

¹⁶ “ህንተኖ፥ ኤር ፓጭዳይሳቶ ታኮ ሃ ዪተ” ያጋሱ። ኤር ባይናይሳታኮ፥

¹⁷ “ካይስድ ኡያ ሃ ማልኤስ፤ ጌማን ምያ ካ ሎኤስ” ያጋሱ።

¹⁸ ሽን ሀይቅዳ አሳይ ያን ደኤይሳ፥ እ እማትካ ዱፎን ደኤይሳ እ ኤረና።