Leemiso 7 - ጌሻ ማፃፋ

ላይማ ማጫሳፐ ናገታ

¹ ታ ናአዉ፥ ታ ቃላ ናጋ፤ ታ ኪታ ነ ዎዛናን ዎ።

² ደኦን ዳናዉ ታ ኪታ ኦ፤ ታ ትምርትያ ነ አይፈ ናኤዳ ናጋ።

³ ነ ኩሸን ኤንታ ቃቻ፤ ነ ዎዛናን ኤንታ ፃፋ።

⁴ ጭንጫተ ነ ምችዳ፥ አኬካ ነ ማታ ዳቦዳ ፄላ።

⁵ ኤንቲ ነና ላይማ ማጫሳፐነ ባ ቃላን ጭምያ ሀራ ማጫሳፐ ናጋና።

⁶ እስ ጋላስ ታ ማስኮተራ ካረ ፄላስ።

⁷ ኤራተ ፓጭዳ ናአተታ በአስ፤ ኤንታ ግዶፈ እሶይ ዳሮ ኤያ።

⁸ ሄ ናአተይ ኦገራ ብሸ፥ እስ ላይማ ማጫሰ ኬ ማታራ አስ፤ እ ሶ ኤፍያ ኦግያ ስሚድ እ ሶኮ ብስ።

⁹ ሄ ዎደ ሳእ ላዴስ።

¹⁰ ማጫስያ እያ ደማሱ፤ እያ ላይማ ግደይሳ እ ማኦይ ኤርሴስ፤ እያ አሳ ጭማናዉ ሀልቻዳ ከያሱ።

¹¹ እያ ፃልታማነ ዬል ባይና ማጫስ፤ ሶን ዎፑ ጋዳ ኡቱኩ።

¹² እያ እስ ቶሆ ኦገን፥ እስ ቶሆ ግያን፥ እስ ቶሆ ዳባባን ኤቃዳ ናጋዉሱ።

¹³ እያ ሄ ናአተ ቆማዳ ዬራሱ፤ እያ ትሽ ኦዳ ፄላሸ ሀይሳዳ ያጋሱ፤

¹⁴ “ታኒ ታ ያርሹዋ ያርሻዳ፥ ታ ቃንገ ሀች ጋስ።

¹⁵ ያታዳ ነና ሞካናዉ ከያስ፤ ነና ዳሮ ኮያስ፤ ህዛ ነና ደማስ።

¹⁶ ታኒ ግብፀፈ ይዳ፥ አሌቀትዳ አፍላ ሂፃስ።

¹⁷ ታኒ ታ ሂፃ፥ ካርበፈ፥ አልሙነፐነ ቃራፋፐ፥ ኦሰትዳ ሽቱዋ ፑካስ።

¹⁸ ሃያ፤ ዎንታና ጋካናዉ ሲቆ አሎስ፤ ቆመትድ ኡፋይቶስ።

¹⁹ ታ አዝናይ ሶን ዴና፤ ሃሆ ቢታ ብስ።

²⁰ ሚሸ ካርፂታ ኩንድ ብዳ ግሾ፥ አጌና ኩሞና ሶ ስመና” ያጋሱ።

²¹ ባ ማልኦ ኦዳን እያ ባለሱ፤ ባ ሊቆ እንፃርሳን እያ ጭማሱ።

²² ቦር ሹከታናዉ በይሳዳ፥ ጋር ኤሶትድ ፅሄን ገለይሳዳ፥ እ እዮ ካልድ ብስ።

²³ ቶር እያ ዎዛና ጫድዳዳ ሀንስ፤ ግተ ግዶ ገልዳ ካፎ ዳንስ፤ ሄስ ኡባይ እያ ሸምፑዋ ይሳናዉ ሀነይሳ ኤርቤና።

²⁴ ህዛ ታ ናአዉ፥ ታና ስአ፤ ታ ዶናፐ ከይያ ቃላ ሀይዛ።

²⁵ ነ ዎዛናይ ማጫሳ ጌዶ ቦፖ፤ እ ኦግያን ገላዳ ዮፓ።

²⁶ እያ ጫዳ የግዳይሳት ዳሮ፤ እያ ዎዳይሳት ጉ ግዶኮና።

²⁷ እ ሶይ ዱፎኮ ኤፍያ ኦገ፤ ሀይቆኮ ካለያ ሆሮጋ።