Leemiso 5 - ጌሻ ማፃፋ

ላይማተፈ ሃካ

¹ ታ ናአዉ፥ ታ ጭንጫተ ሀይዛ ስአ፤ ነ ሀይ ታ ትምርትያኮ ዛራ።

² ሄስ ነና ዎዛናማ ኦና፤ ነ ኦዳይ ነ ኤራተ ቆንጭሳና።

³ ላይማ ማጫሳ እንፃርሳፈ እልሎ ኤስ ፆኬስ፤ እ ኦዳይ ኦይሳፐ አድ ሎፅኬስ።

⁴ ሽን ዉርሰን እያ ጎዳረ ኡዳ ጫማዉሱ፤ ናምኡ ባጋራ ቃንፅያ ማሻዳ ቃራ።

⁵ እ ቶሆይ ሀይቆኮ ቤስ፤ እ ታንጎይ ዱፎ ጋስ።

⁶ እያ ደኦ ኦገ ቆፑኩ፤ እ ኦገይ ጌላ፤ ሽን ጌላ ግደይሳ እያ ኤሩኩ።

⁷ ታ ናአዉ፥ ታና ስአ፤ ታ ኦደይሳፈ ከዮፓ።

⁸ ላይማ ማጫሳ ሄራ ቦፕተ፤ እ ኬ ፐንግያኮ ሺቆፕተ።

⁹ ሄስ ሀኖና እፅኮ ህንተ ቦንቹዋ ሀራት ኤካና፤ ናአተን ዎዛና ምኖ አሳ ኩሸን ህንተ ሀይቃና።

¹⁰ ህንተ አቁዋ አላጋት ኤካና፤ ህንተ ዳቡራድ ሺሽዳባይ ሀራ አሳስ ግዳና።

¹¹ ዉርሰን ህንተ አሾይነ ህንተ አሳተይ ዉርን ህንተ ዬካና።

¹² ህንተ ያጋና፤ “ታ አይስ ትምርተ እፃድና? ታ ዎዛናይ ሴራ አይስ ካዴ?

¹³ ታኒ ታ አስታማረታ ስአብከ፤ ታና ዞረይሳታ ዞርያ ኤካብከ።

¹⁴ ሄሳ ግሾ፥ ታ አሳይ ሺቅዳ ሺቁዋን፥ ካዉያናዉ ማታስ” ያጋና።

¹⁵ ኔኒ ነ ፑልቱዋፈ ሃ ኡያ፤ ነ ማቸ ፃላላ ሲቃ።

¹⁶ ነ ፑልቱዋ ዳባባን፥ ነ ኦላ ሃ ደንባን አይስ ጉሳይ?

¹⁷ ኤንታ ነዉ ቡዞ ኦ፤ ሀራ አላጋ ኡራራ ኮፆፋ።

¹⁸ ነ ፑልቶይ ነዉ አንጀቶ፤ ነ ናአተ ማቸራ ኡፋይታ።

¹⁹ ሎእያ ጋረዳንነ ኡፋይስያ ገንኤዳ እ ንይ ኡባ ዎደ ነና አሎ፤ ኡባ ዎደ እ ሲቆይ ነና ድኦ።

²⁰ ታ ናአዉ፥ ላይማ ማጫሳን አይስ ድኤታይ? ሀራ አሳ ማቾ አይስ ቆማይ?

²¹ አስ ኦያባ ኡባ ጎዳይ በኤስ፤ እ ሄመትያ ሆሮጋ ኡባ ፄሌስ።

²² ናጋራንቹዋ እ ኦዳ ናጋራይ ኦይኬስ፤ እያ ናጋራ ግተይ እያ ቃቼስ።

²³ እ ባ ኤያተን ይስ፤ ባና ናግቦና ግሾ ሀይቅስ።