Leemiso 30 - ጌሻ ማፃፋ

አጉራ ሌምሶታ

¹ ያቀ ናኣ አጉራ ሌምሶት ሀይሳፈ ካልድ ፃፈትዳይሳታ። አጉር እትኤላስነ ኡካላስ ሀይሳ ሃሳይስ።

² ታኒ አሳ ኡባፈ አዳ ኤያ፤ አሳስ ደእያ አኬክ ታዉ ዴና።

³ ታኒ ጭንጫተ ታማራብከ፤ ጌሻ ፆሳባካ ኤርከ።

⁴ ሳሎ ፑደ ከይድ ዱገ ዎዳይ ኦኔ? ጫርኮ ባ ኩሸን ኦይክዳይ፥ ሃ ባ አፍላን ዪጭዳይ፥ ሳኣ ጋፃ ምንድ ኤስዳይ ኦኔ? እያ ሱንይ ኦኔ? እያ ናኣ ሱንይ ኦኔ? እያ ኤርያ ግድኮ አነ ታዉ ኦዳ?

⁵ ፆሳ ቃላን ቦረይ ባዋ፤ ኡባይ ቱማ እያን አማነትያ ኡባስ እ ጎንዳለ።

⁶ እያ ቃላ ቦላ አይባካ ጉጆፋ፤ ጉጅኮ እ ነና ሴራና፤ ነ ዎርዳንቾ ግደይሳ እ ቆንጭሳና።

⁷ ጎዳዉ፥ ታ ነና ናምኡባ ኦይቻይስ፤ ታ ሀይቃና ጋካናዉ ኤንታ ታና ድጎፋ።

⁸ ታ አሰ ጭሞና መላነ ዎርዶ ሃሳዮና መላ ታና ናጋ፤ ታዉ ኮሽያ ካ እማፈ አትሽን፥ ታና ዱረ ዎይኮ ማንቆ ኦፋ።

⁹ ዱረ ግዳዳ፥ “ጎዳይ ኦኔ?” ጋዳ ነና ካዳና፤ ማንቆ ግዳዳ፥ ካይሳዳ ታ ፆሳ ሱን ጫይሳና።

¹⁰ ነና ባዶና መላነ እያ ባደይ ነዉ ጎመ ግዶና መላ፥ አይልያ እያ ጎዳራ ዝግሮፓ።

¹¹ ባ አዋ ባድያነ ባ አይዉ አንጆና የለተ ደኤስ።

¹² ዳሮ ቱና ግድ ኡትድ ባንታና ጌሽ ኦያ አሳት ደኦሶና።

¹³ ኦቶሮን ኩምዳ አሳትነ አሰ ካድ ፄልያ አሳት ደኦሶና።

¹⁴ ኤንታ አቻይ ማሸ ግድን፥ ኤንታ ጋጮይ ቶራ ግድን፥ ማንቆታነ መቶታንቾታ ናቅድ፥ ኤንታባ ቦንቅያ አሳት ደኦሶና።

¹⁵ ኡላስ ናምኡ ማጫ ናይት ደኦሶና፤ ኤንቲ፥ “ሀማ! ሀማ!” ያግድ ዋሶሶና። ካልድ ኤሮና ሄባት ደኦሶና፤ ኦይዳንይ ቃስ “ግዳና” ግድ ኤረና።

¹⁶ ሄሳት፥ ዱፎ፥ ማይንዳ ማጫስ፥ ሃ ካልድ ኤሮና መላ ቢታነ፥ “ግዳና!” ግድ ኤሮና ታማ።

¹⁷ ባ አዋ ለቅያ ናኣ አይፍያ፥ ባ አይያ ጭምን ካያ ናኣ አይፍያ፥ ዛንጋራን ደእያ ቁሮት ዎጫና፤ እያ አሹዋ አንኮት ማና።

¹⁸ ታና ሄባት ማላልሶሶና፤ ኦይዳንይ ኡባ ታዉ ገለና።

¹⁹ ሄሳት፥ ሳሎራ ፓልያ አርጋን፥ ዛላ ቦላራ ኮልፅያ ሾሽ አባ ቦላራ ብያ ማርካበነ ጌላኦራ ስቆ ኦይከትዳ አደ።

²⁰ ላይማ ማጫስ ሀንያ ሀኖይካ ሄሳ መላ፤ እያ ማሱ፤ ሽን ባ ዶና ቁቻዳ፥ “ታኒ አይኮካ ባላቢከ” ያጋዉሱ።

²¹ ሄባን ቢት ቃፄስ፤ ኦይዳንዋ ኡባ ቶካናዉ ዳንዳኤተና።

²² ሄሳትካ፥ አይለይ ካዎትዳ ዎደ፥ ኤያ አስ ካ ካልዳ ዎደ፥

²³ አስ እፅዳ ማጫስ አዝና ገልዳ ዎደነ ማጫ አይልያ ባ ጎዳትዉ ላትዳ ዎደ መትያ ሀኖታ።

²⁴ ሳአ ቦላ ኦይዱ ጉ መተት ደኦሶና፤ ሽን ኤንቲ አዳ ጭንጫ።

²⁵ ሄሳትካ፥ ጩንጫለይ ዎልቅ ባይና መተ፤ ሽን ባንታዉ ምያባ ቦነ ሺሽድ፥ ምንጆሶና።

²⁶ ጉፓለት ዎልቅ ባይናይሳታ፤ ሽን ባንታ ኬ ዛላ ቆጶን ኬፆሶና።

²⁷ ቦለታስ ካዎይ ባዋ፤ ሽን ኤንቲ ኡባይ ማራን ዛቶሶና።

²⁸ ዛረት ኩሸን ኦይከቶሶና፤ ሽን ካዎ ጋን ደኦሶና።

²⁹ ባንታ ማታ በስሸ ሄመትያ ሄ መተት ደኦሶና፤ ኦይዳንይ ሎኦ ሄመ ሄመቴስ።

³⁰ ሄስካ፥ ዶአ ኡባፈ ምኖነ ያሽ ኤሮና ጋሞ።

³¹ ማጫ ኩቶታ ግዶን ሄመትያ አደ ኩቶ፥ ዉደ ካለያ ዴሻ ኮለ፤ ባ ኦላንቾታ ግዶን ቆንጨን ኤቅያ ካዋ።

³² ኔኒ ኤያዳ ኦቶርትዳባ ግድኮካ፥ ኢታ ኦናዉ ሀልችዳባ ግድኮ፥ አነ ታክ ጋዳ ቆፓ።

³³ ማ ቡከይ ኦይሱ ከሰይሳዳ፥ ሲ ድችን ሱ የይሳዳ፥ ሀንቆ ደንይ ኦሹ ኤሄስ።