Leemiso 3 - ጌሻ ማፃፋ

ጎዳን አማነታ

¹ ታ ናአዉ፥ ታ ትምርትያ ዶጎፓ፤ ታ ኪታ ነ ዎዛናን ዎ።

² ኤንቲ ነ ላይ አዱሳና፤ እንጀነ ሳሮተ ነዉ ጉጃና።

³ ሲቆይነ ቱማተ ኔፐ ሃኮፎ፤ ኤንታ ነ ቆን ቃቻ፤ ነ ዎዛናን ፃፋ።

⁴ ሄሳ ኦኮ ነ ፆሳነ አሳ ስንን ሳበታናነ ናሸታና።

⁵ ነ ኩመ ዎዛናን ጎዳ አማነታ፤ ነ አኬካን ዘምፖፋ።

⁶ ነ ኦሶ ኡባን እያ ስንያ፤ እ ነና ሱረ ኦገ ካለና።

⁷ ነና ነ ሁጰን ጭንጫ ኦፋ፤ ጎዳ ያያ፤ ኢታፐ ሃካ።

⁸ ሄስ ነ አሳተስ ፓያተ ኤሀና፤ ነ መቀካ ፃልሳና።

⁹ ነ ሻሉዋን ጎዳ ቦንቻ፤ ኮይሮ አይፍዳ ካፈ ባይራ እማዳ እያ ቦንቻ።

¹⁰ ሄሳ ነ ኦኮ፥ ነ ሻልያን ካ ኩማና፤ ነ ዳሎይ ዎይነ ኡሻን ኩምድ ፓላሀና።

¹¹ ታ ናአዉ፥ ጎዳ ሴራ ካፓ፤ እ ነና ሴርያ ዎደ ላንጮፋ።

¹² አዋይ ባ ዶስያ ናአ ሴረይሳዳ፥ ጎዳይ ባ ዶስያ ኡራ ሴሬስ።

¹³ ጭንጫተ ደመይነ፥ አኬካ ባዉ ሚሸ ኦያ ኡራይ አንጀትዳይሳ።

¹⁴ ጭንጫተ ብራፐ አድ ጎኤስ፤ ዎርቃፈ አድ ማዴስ።

¹⁵ ጭንጫተ ዎርቃፈ አድ አልኦ፤ ነ ደማናዉ አሞትያ ኡባይ ጭንጫተራ ግነና።

¹⁶ ጭንጫተ ኡሻቻ ኩሸን አዱሳ ላይ፥ ሀድርሳ ኩሸን ዱረተነ ቦንቾ ኦይካሱ።

¹⁷ እ ኦገት ኡፋይስያ ኦገታ፤ እ ሆሮጋይ ሳሮ ሆሮጋ።

¹⁸ እያ ባና ኦይከይሳታስ ደኦ ም፤ እዮ ምንድ ኦይክያ ኡባይ አንጀትዳይሳታ።

¹⁹ ጎዳይ ባ ጭንጫተን ሳኣ መስ፤ ባ አኬካን ሳሎታ ምንስ።

²⁰ እያ ኤራተን ሻፋት ጎጎሶና፤ ሻራታፐ እር ቡኬስ።

²¹ ታ ናአዉ፥ ሱረ ፕርዳነ ሻክድ ኤሮ ምንዳ ኦይካ ኤንቲ ኔፐ ሻከቶፎ።

²² ኤንቲ ነዉ ደኦ ግዳና፤ እንጀነ ኡፋይስ እማና።

²³ ሄ ዎደ ነ ህርግ ባይና ሄመታና፤ ነ ቶሆይ በተና።

²⁴ ኔኒ ዝንእያ ዎደ ያያካ፤ ቃማ ኩመ ማልኦ ስኮ ስካና።

²⁵ አኬኮና ጋክያ ጋዶስ ያያካ፤ ኢታት ይያ ዩዋን ዳጋማካ።

²⁶ ጎዳይ ነዉ ዘምፖ ግዳና፤ ነ ቶሆይ ፅሄን ኦይከቶናዳ እ ናጋና።

²⁷ ነዉ ዎልቅ ደእሽን፥ መቶትዳ ኡራስ ሎኦባ ኦሶ አጎፋ።

²⁸ ሀእ ማዳናዉ ዳንዳአሸ ነ ሾሩዋ፥ “ስማዳ ያ፤ ታ ነዉ ዎንቶ እማና” ያጎፓ።

²⁹ ነና አማነትድ፥ ነ ማታን ደእያ፥ ነ ሾሩዋ ቦላ ገነ ኦፋ።

³⁰ ነና ቆሆና ደእሽን፥ አሰ ጮ ሞቶፓ።

³¹ ገነ ኦያ አሳታ ቃናቶፓ፤ ኤንታ ኢታ ኦሱዋ ካሎፋ።

³² ጎዳይ ኢታ ኦያ አሳታ እፄስ፤ ሽን ሱረታ ዶሴስ።

³³ ጎዳይ ኢታ ኦያ አሳ ኬ ባዴስ፤ ሽን ሱረባ ኦያ አሳ ኬ አንጄስ።

³⁴ ኦቶሮን ቀልቅሰይሳታ ጎዳይ ቀልቅሴስ፤ ሽን ባንታና ካዉሸይሳታ ሳቤስ።

³⁵ ጭንጫት ቦንቾ ደማና፤ ሽን ኤያት ካዉያና።