Leemiso 29 - ጌሻ ማፃፋ

¹ ዳሮ ዎደ ሴረትድ ስሞና አስ ሀሳዮና መቃና፤ ሄ ኡራስ ፓፆይ ባዋ።

² ፅሎ አሳት ሹመትያ ዎደ አሳይ ኡፋይቴስ፤ ሽን ኢታት ቢታ ሃርያ ዎደ አሳይ ኡንኤቴስ።

³ ጭንጫተ ዶስያ አስ ባ አዋ ኡፋይሴስ፤ ሽን ላይማ ማጫሳ ሄራን ዩይያ አስ ባ ሚሽያ ዉርሴስ።

⁴ ቱማ ፕርዳን ካዎይ ባ ካዎተ ዎፑ ኦስ፤ ሽን ዎፈ ኤክያ ካዎይ ባ ካዎተ ይሴስ።

⁵ ባ ሾሩዋ ጭሞን ሳቢያ አስ፥ ባ ቶሆስ ፅሄ የጌስ።

⁶ ኢታ አስ ባ ናጋራን ኦይከቴስ፤ ሽን ፅሎ አስ ኡፋይቴስ፥ የፄስ።

⁷ ፅሎ አስ ማንቆታስ ሱረ ፕርዴስ፤ ሽን ኢታ አሳት ሄሳ ኤሮኮና።

⁸ ጫይያ አሳት ካታማን ኦሹ ደንሶና፤ ሽን ጭንጫ አሳት ሀንቆ እርፅሶሶና።

⁹ ጭንጫ አስ ኤያ አሳ ፕርደ ኬ ኤፍኮ፥ ኤያይ ሀንቀቴስ፤ ቅስ፤ እያዉ ሳሮይ ባዋ።

¹⁰ ሱ ጉሳናዉ ሳሞትያ አሳት ሱረ አስ እፆሶና፤ ፅሎ አሳ ዎናዉ ኮዮሶና።

¹¹ ኤያ አስ ባ ሀንቁዋ የድ በሴስ፤ ሽን ጭንጫ አስ ባና ሃሬስ።

¹² ሹማይ ዎርዶ ኦዳ ስእያባ ግድኮ፥ እያ ሞርናት ኡባይ ኢታ ግዶሶና።

¹³ ማንቆይነ አሰ ናቅያ አስ እስባ ኮፆሶና፤ ኤንታ ናምኣስ አይፈ እምዳይ ጎዳ።

¹⁴ ካዎይ ማንቆታስ ሱረ ፕርድኮ፥ እ ባ አራታን ጋምአና።

¹⁵ ፕርጮን ሴር ናይታስ ጭንጫተ እሜስ፤ ሽን የዳን ድጭዳ ናእ ባ አይዉ ካዉሼስ።

¹⁶ ኢታ አሳት ዳርያ ዎደ ናጋር ዳሬስ፤ ሽን ፅሎት ኤንታ ኩንደ በአና።

¹⁷ ነ ናኣ ሴራ፤ እ ነዉ ሳሮ እማና፤ እ ነና ኡፋይሳና።

¹⁸ ቆንጨ ባይና እፅኮ ደረይ የዳ ግዴስ፤ ሽን ህገ ናግያ አስ አንጀትዳይሳ።

¹⁹ አይለይ ጮ ኦዳ ፃላላን ሴረተና፤ እያዉ ገልያኮካ እ ኪተተና።

²⁰ ኤሶን ሃሳያ አስ በአ ኤራይ? እያፐ ኤያ አሳስ ኡፋይስ ደኤስ።

²¹ ነ አይልያ ናአ የዳ ድችኮ፥ እያ ዉርሰይ አዛኖ ግዳና።

²² ሀንቀትያ አስ ኦሹ ደንስ፤ ኤለ ይሎትያ አስ ዳሮ ናጋራ ኦስ።

²³ ኦቶሮይ አሰ ካዉሼስ፤ ሽን አሽከ አያን ደእያ አስ ቦንቸቴስ።

²⁴ ካይሶራ ላገትያ አስ ባና እፅያ አስ፤ እ ዳባባን ቱማ ኦድኮ ሴረቴስ፤ እ ቱማ ኦዶና እፅኮ ጎዳን ባደታና።

²⁵ አሳስ ያሽ ሄ ኡራስ ፅሄ ግዴስ፤ ሽን ጎዳን አማነትያ አስ ሳሮ ደኤስ።

²⁶ ዳሮት ማት ደእያ አሳፐ ማደ ኮዮሶና፤ ሽን ሱረ ፕርድ ጎዳፐ በንቴስ።

²⁷ ፅሎት ናጋራንቾታ ሻተቶሶና፤ ኢታት ሱረ አሳ እፆሶና።