Leemiso 18 - ጌሻ ማፃፋ

¹ ሻሄተ ኮይያ አስ ባ አሙዋ ካሌስ፤ ሱረ ቆፋ ኡባ እፄስ።

² ኤያ አስ ባ ቆፋ ፃላላ ቆንጭሳናዉ ዶሴስ፤ ሀራ አሳፐ ኤራ ኤካናዉ ዶሰና።

³ ኢታተ ያ ዎደ ካይ ዬስ፤ ካዉሻተ ያ ዎደ ዬል ዬስ።

⁴ አሳ ዶናፐ ከያ ኦድ፥ ጪሞ ሃ መላ፤ ጭንጫተ ጎግያ ፑልቶ መላ።

⁵ ናቅዳ ኡራ ማድድ፥ ፅሉዋ ፕርዳ ጌላየይስ ሎኦ ግደና።

⁶ ኤያ አሳ ኦድ ኦሹ ደንስ፤ እያ ዶናይ ዋ ፄጌስ።

⁷ ኤያ አሳ ኦድ ባና ቆሄስ፤ እያ ኦዳይ ፅሄ ግድድ እያ ኦይኬስ።

⁸ ዝግርስ ማልኦ ካ መላ፤ ኡፋይስሸ ዱገ ጋንጀ ጋኬስ።

⁹ አዛላ አስ ይስያ አሳፐ አይባካ ዱማተና።

¹⁰ ጎዳ ሱንይ ምኖ ግምበ መላ፤ ፅሎ አስ ያ ዎፅድ ሳሮ አቴስ።

¹¹ ዱረ አሳታ ዱረተይ ግምበትዳ ካታማ መላ፤ ኤንታ ቆፋን ኤንታ ዱረተይ ምኖ ድርሳዳ ኤንታ ናግያባ ዳኔስ።

¹² ኦቶሮይ ኩንደፈ ስንቴስ፤ አሽከተ ቦንቾ ኤሄስ።

¹³ ስኦና ደእሸ ዛሮ እሞይ፥ ሄ ኡራስ ኤያተነ ዬላ።

¹⁴ ዳና ግድ ቆፕኮ፥ እያ አያናይ ሀርገ ዳንዳእሴስ፤ ሽን ኡፋይስ ቃንፅኮ እያ ማደይ ባዋ።

¹⁵ አኬካ አስ ኤራተ ኮዬስ፤ ጭንጫ አሳ ሀይ ጭንጫተ ስኤስ።

¹⁶ እሞት እመይሳስ ኦገ ዶዬስ፤ ግታ አሳታራ ኤርሴስ።

¹⁷ ዳይና ስንን ኮይሮ ሺቅድ ሞትያ ኡራይ፥ እያ ሞርከይ ይን፥ እያ ኦይቻና ጋካናዉ፥ ኡባ ዎደ ባና ፅሎ ግድ ቆፔስ።

¹⁸ ሳማ የገ ፓላማ ተቄስ፤ ናምኡ ፓላምያ አሳታ ሻኬስ።

¹⁹ ቆሄትዳ እሻይ ግምበትዳ ካታማፐ አድ ምኔስ፤ እያ ፓላማይ ብራታ ጎርደ መላ።

²⁰ አስ ባ ዶና ኦዳን ባ ኡሎ ኩንስ፤ ባ እንፃርሳ አይፈን ካሌስ።

²¹ ሀይቆይነ ደኦይ እንፃርሳና፤ ኔኒ ነ እንፃርሳ አይፍያ ማና።

²² ማቾ ደምዳይ ሎኦባ ደምስ፤ እ፥ ጎዳፐ ቴማ ደሜስ።

²³ ማንቆ አስ አዳሽድ ኦደቴስ፤ ሽን ዱረ አስ ኦቶሮን ዛሬስ።

²⁴ ዳሮ ላገይ ደእያ አስ ባ ቦላ መቶ ኤሄስ፤ ሽን እሻፐ አድ ማታትያ ላገይ ደኤስ።