Kessa 9 - ጌሻ ማፃፋ

መሄ ቦላ ይዳ ጋዶ

¹ ጎዳይ ሙሰኮ፥ “ግብፀ ካዋኮ ባዳ፥ ጎዳይ፥ እብራወታ ፆሳይ ኔኮ፥ ‘ኤንቲ ታዉ ጎይናና መላ ታ አሳ የዳ።

² ኔኒ የዶና ኤንታ እፅኮ፥

³ ታኒ ነ ፓራታ ቦላ፥ ነ ሀረታ ቦላ፥ ነ ግማለታ ቦላ፥ ነ መህያ ቦላ፥ ነ ዶርሳታ ቦላነ ነ ዴሻታ ቦላ ኢታ ጋዶ የጋና።

⁴ ሽን ታኒ ጎዳይ እስራኤለ አሳ መህያ ግዶንነ ግብፀ አሳ መህያ ግዶን ዱማተ መና። እስራኤለ አሳ መህያፐ እሶይካ ሀይቀና።

⁵ ዎንቶ ታኒ ሄሳ ኦና ግድ ጎዳይ ዎደ ቃንፅስ’ ያጋ” ያግስ።

⁶ ዎንተ ጋላስ ጎዳይ ግዳይሳዳ ኦስ። ግብፀ አሳ መሄ ኡባይ ሀይቅስ፥ ሽን እስራኤለ አሳ መህያፐ እሶይካ ሀይቅቤና።

⁷ ካዎይ ሀንዳባነ እስራኤለታ መህያፐ ሀር አቶሽን እሶይካ ሀይቆናይሳ አሰ ኪትድ፥ ኦይችድ ኤርስ። ሽን ሀእካ እያ ዎዛናይ ሙምዳ ግሾ አሳ የዶና እፅስ።

ክፃ ጋዶ

⁸ ሄሳፈ ጉየ፥ ጎዳይ ሙሰነ አሮና፥ “ጮጨፐ ብዶ ኩጭ ኤክድ፥ ካዎይ በእሽን ቦላ ርጭተ።

⁹ ሄስ ግብፀ ቢታ ኡባ ቦላ ባና ግድድ ላለታና። ግብፀ ቢታን ደእያ አሳ ቦላነ መሄይ ቦላ ክፃ ጋዶ ኤሀና” ያግስ።

¹⁰ ኤንቲ ጮጨፐ ጉ ብዶ ኤክድ ካዉዋ ስንን ኤቅዶሶና። ሙሰይ ሄሳ ቦላ ላልን፥ አሳ ቦላነ መህያ ቦላ ክፃ ጋዶይ ዎ አግስ።

¹¹ ግብፀ አሳ ቦላ ዎዳ ክፃይ ማሮታ ቦላካ ዎዳ ግሾ ሙሰ ስንን ኤቃናዉ ዳንዳእቦኮና።

¹² ሽን ጎዳይ ሙሰስ ግዳይሳ መላ፥ ካዎይ ባ ዎዛና ሙምስዳ ግሾ፥ ሙሰነ አሮና ስኦና እፅስ።

ሻቻ ጋዶ

¹³ ሄሳፈ ጉየ፥ ጎዳይ ሙሰኮ፥ “ካዋኮ ጉራ ደንዳ ባዳ፥ ‘ጎዳይ፥ እብራወታ ፆሳይ፥ ታዉ ጎይናና መላ ታ አሳ የዳ።

¹⁴ ሀእ ነ እፃስ ጊኮ፥ ነ ሞርናታነ ነ አሳ ፃላላ ግዶናሽን ነ ቦላካ ኢታ ጋዶ ኤሀና። ሄ ዎደ አላመ ኡባን ጎድ ታ ፃላላ ግደይሳ ኔኒ ኤራና።

¹⁵ ታኒ ታ ኩሽያ ደንዳ ነናነ ነ አሳ ጋዶን ሾጭዳባ ግድያኮ ሀእ ጋካናስ ህንተ ቢታ ቦላ ደኤከታሽን።

¹⁶ ሽን ታ ሱንይ ቢታ ኡባን ኤረታና መላ ታኒ ታ ዎልቃ በሳናዉ ነና ደኦን ዎስ።

¹⁷ ኔኒ ሀእካ ኦቶርታዳ ታ አሳ የዶና እፃዳሳ።

¹⁸ ታኒ ዎንቶ ሀኖደ ግብፀ ቢታይ መቶሳፐ ሀች ጋካናዉ ቡክ ኤሮና ዎልቃማ ሻች ቡክሳና።

¹⁹ ሀእ ኔኒ ነ መህያነ ካረን ደእያባ ኡባ ኤለ ሶ ገልሳና መላ ኪታ። ሶ ገሎና አሳ ቦላነ መህያ ኡባ ቦላ ሻች ቡክድ፥ ኤንታ ዎና ያጌስ’ ያጋ” ያግስ።

²⁰ ካዉዋ ሞርናታፐ እሶት እሶት ጎዳይ ግዳይሳ ስእድ ያይዳ ግሾ፥ ባንታ አይለታነ ባንታ መሄታ ሶ ገልስዶሶና።

²¹ ሽን ሀራት ጎዳይ ግዳይሳ ስኦና እፅድ ባንታ አይለታነ ባንታ መህያ ካረን አጋግዶሶና።

²² ሄሳፈ ጉየ፥ ጎዳይ ሙሰ፥ “ግብፀ ቢታ ኡባ ቦላ፥ አሳ ቦላ፥ መህያ ቦላነ ጋደን ደእያ ካ ቦላ ሻች ቡካና መላ ነ ኩሽያ ሳሎ ደን” ያግስ።

²³ ሙሰይ ባ ፃምኣ ሳሎ ደንዳ ዎደ፥ ጎዳይ ዎልቃማ ደሾነ ዎልአን የድስ። ሄሳዳ ኦድ ጎዳይ ግብፀን ሻች ቡክስስ።

²⁴ ጎዳይ ገደራ ሃራ ዎልቃማ ዎልአን የድስ። ሄሳ መላባይ ግብፀ ቢታን አስ ዱሱ ኦይኮደፐ ሀን ኤረና።

²⁵ ሄ ሻቻይ ግብፀን ደእያ አሳነ መህያ ሾጭስ። ጋደን ደእያባ፥ ምነ ማታ ኡባ ይስስ።

²⁶ እስራኤለት ደእያ ጌሳመ ቢታ ፃላላን ሻች ቡክቤና።

²⁷ ካዎይ ሙሰነ አሮና ፄግስድ፥ “ታኒ ሀእ ናጋራ ኦስ። ጎዳይ ቱማንቾ፤ ታንነ ታ አሳይ ባላ።

²⁸ ደሾይነ ሻቻይ ኑ ቦላ ዳርድ ኡንኤዳ ግሾ ኑስ ጎዳ ዎስተ። ታኒ ህንተና የዳና፤ ህዛፐ ህንተ ሀይሳን ጋምኤከታ” ያግስ።

²⁹ ሙሰይ እያኮ፥ “ታኒ ሀ ካታማፐ ከይዳ ዎደ ታ ኩሽያ ደንዳ ጎዳ ዎሳና። ደሾይነ ሻቻይ ኤቅያ ዎደ ሳአይ ጎዳባ ግደይሳ ኔኒ ሄሳን ኤራና።

³⁰ ሽን ነነ ነ ሞርናት ሀእካ ጎዳ ፆሳ ያዮናይሳ ታኒ ኤራይስ” ያግስ።

³¹ ታልባይ ጪሸ፥ ባንጋይ ቆርፃ ግድያ ግሾ ኡባይ ሻቻን ይስ።

³² ሽን ግስተይነ ሙርቃይ ጋክቦና ግሾ ሻቻን ይቤና።

³³ ሙሰይ ካዉዋ ማታፐ ከይድ፥ ካታማፐ ጋፃ ብድ ባ ኩሽያ ደንድ ጎዳ ዎስስ። ያትን ደሾይ፥ ሻቻይነ እራይ ኤለስድ ኤቅ አግስ።

³⁴ ሽን ካዎይ ሄ ኡባይ ኤቅዳይሳ በእዳ ዎደ ዛሪድ ናጋራ ኦስ። እያራነ እያ ሞርናታራ ባንታ ዎዛና ጉጅድ ምንዶሶና።

³⁵ ጎዳይ ሙሰ ባጋራ ኦድዳይሳ መላ ካዉዋ ዎዛናይ ሙምን፥ እስራኤለታ የዶና እፅስ።