Kessa 7 - ጌሻ ማፃፋ

¹ ጎዳይ ሙሰኮ፥ “ሄኮ ታኒ ነና ግብፀ ካዋስ ፆሳ መላ ኦስ። ነ እሻ አሮን ነ ናበ ግድድ እያዉ ኦዳና።

² ታኒ ነና ኪትዳ ኪታ ኡባ አሮናስ ኦዳ። እ፥ እስራኤለታ ባ ቢታፈ ከስ የዳና መላ ካዋስ ኦዳና።

³ ሽን ታኒ ካዉዋ ዎዛና ሙምሳና። ታኒ ግብፀ ቢታን ማላታታነ ማላልስያባታ ኦኮካ፥

⁴ እ ህንተ ኦድያባ ስኤና። ሄ ዎደ ታኒ ግብፀታ ፕርዳና፤ ታ ደርያ እስራኤለ ግብፀፈ ከሳና።

⁵ ሄስ ሀንያ ዎደ ታኒ ጎዳ ግድዳይሳ ግብፀት ኤራና” ያግስ።

⁶ ሙሰይነ አሮን ጎዳይ ኪትዳይሳዳ ኦዶሶና።

⁷ ኤንቲ ካዋስ ኦድያ ዎደ፥ ሙሰስ ሆስፑን ታሙ ላይ፤ አሮናስ ቃስ ሆስፑን ታማነ ሄ ላይ።

አሮና ፃምአ

⁸ ጎዳይ ሙሰነ አሮና፥

⁹ “ካዎይ ህንተና፥ ማላታ ኦድ ታና በስተ ጊኮ፥ አሮን ባ ፃምአ ኤክድ ካዉዋ ስንን የጋና መላ እያዉ ኦዳ፤ ሄ ፃምአይ ሾሽ ግዳና” ያግስ።

¹⁰ ሙሰይነ አሮን ካዋኮ ብድ ጎዳይ ኤንታ ኪትዳይሳዳ ኦዶሶና። አሮን ባ ፃምኣ ካዉዋ ስንንነ እያ ሞርናታ ስንን የግን ፃምአይ ሾሹ ግድስ።

¹¹ ሄሳፈ ጉየ ካዎይ ማሮታነ ብታንቾታ ፄግስስ። ኤንትካ ባንታ ብታን ሄሳዳ ኦዶሶና።

¹² ኤንቲ ኡባይ ባንታ ፃምኣ ሳአን የግዳ ዎደ ፃምአት ሾሽ ግድዶሶና። ሽን አሮና ፃምአይ ኤንታ ፃምአታ ምትስ

¹³ ግዶሽን ጎዳይ ግዳይሳ መላ ካዋ ዎዛናይ ሙምስ። እ ኤንቲ ገይሳ ስኦና እፅስ።

ሃ ሱ ላመተ

¹⁴ ጎዳይ ሙሰ፥ “ካዋ ዎዛናይ ሙምስ፤ እ አሳ የዶና እፅስ።

¹⁵ ዎንቶ ዎንታ ጉራ ሾሽ ላመትዳ ፃምኣ ኤካዳ፥ ናይለ ሻፋ ማታን ኤቃዳ፥ ካዉዋራ ጋሄታናዉ ናጋ።

¹⁶ እያኮ፥ ‘ጎዳይ፥ እብራወታ ፆሳይ ታ አሳይ መላ ቢታን ታዉ ጎይናና መላ የዳ’ ያግድ ታና ኔኮ ኪትስ። ሽን ኔኒ ሀኖ ጋካናዉ እፃዳሳ።

¹⁷ ጎዳይ፥ እ፥ ጎዳ ግደይሳ እ ኦያባን ኔኒ ኤራና። ታኒ ናይለ ሻፋ ሃ ታ ኩሸን ደእያ ፃምአን ሾጭኮ ሃይ ሱ ላመታና።

¹⁸ ናይለ ሻፋን ደእያ ሞሎይ ሀይቃና፤ ሻፋይካ ፅንቃና። ግብፀት ሄ ሻፋ ሃ ኡያናዉ ዳንዳኦኮና” ያጋዳ ኦዳ።

¹⁹ ጎዳይ ሙሰኮ፥ “አሮን ግብፀን ደእያ ሃታ ቦላ፥ ሻፋታ ቦላ፥ ዛራ ሃታ ቦላ፥ ተቀ ሃ ቦላነ ዱቀትዳ ሃ ኡባ ቦላ ባ ፃምኣ ደንና መላ ኦዳ። ሄ ዎደ ሃ ኡባይ ሱ ላመታና። ሀር አቶሽን ግብፀ ቢታን ምፈነ ሹቻፈ ኦሰትዳ ሃ ትክያ ሚሸታን ደእያ ሃይ ኡባይ ሱ ላመታና ያጋ” ያግስ።

²⁰ ሙሰይነ አሮን ጎዳይ ኪትዳይሳዳ ኦዶሶና። ካዉዋ ስንንነ እያ ሞርናታ ስንን ባ ፃምኣ ደንድ፥ ናይለ ሻፋ ሃ ሾጭስ። ሃ ኡባይ ሱ ላመትስ።

²¹ ሄ ሻፋ ሃን ደእያ ሞሎት ሀይቅዶሶና። ሻፋ ሃይ ኢታ ፅንቅዳ ግሾ፥ ግብፀ አሳይ ኡያናዉ ዳንዳእቦኮና። ግብፀ ቢታ ኡባን ሱ ኩምስ።

²² ሽን ግብፀ ብታንቾት ባንታ ብታን ሄሳዳ ኦዶሶና። ጎዳይ ግዳይሳዳ ካዉዋ ዎዛናይ ሙምን፥ ሙሰይነ አሮን ኦድዳይሳ ስኦና እፅስ።

²³ ካዎይ ሄ ሀንዳባ አይብንካ ታይቦና የግ አግድ ባ ጋ ስሚድ ብስ።

²⁴ ግብፀ አሳይ ናይለ ሻፋ ሃ ኡያናዉ ዳንዳእቦና ግሾ፥ ኡይያ ሃ ደማናዉ ሻፋ ጋፃን ኦላ ቦክዶሶና።

²⁵ ጎዳይ ሃ ሾጭ ስምን ላፑን ጋላስ ግድስ።