Kessa 6 - ጌሻ ማፃፋ

¹ ሄሳፈ ጉየ ጎዳይ ሙሰኮ፥ “ታኒ ግብፀ ካዉዋ ቦላ ኦናባ ሀእ ኔኒ በአና። እ ታ ደርያ የዳና መላ ታኒ ታ ዎልቃ እያ በሳና። እ ኤንታ ባ ቢታፈ ጎድድ ከሳና” ያግስ።

² ፆሳይ ሙሰ፥ “ታኒ ጎዳ።

³ ታኒ አብራሃመስ፥ ይሳቃስነ ያይቆባስ ኡባ ዳንዳእያ ፆሳ ግዳዳ ቆንጫስ። ሽን ታኒ፥ ‘ጎዳ’ ጌተትያ ታ ሱንን ታናተ ኤንታ ኤርሳብከ።

⁴ ቃስ ታኒ ኤንቲ በተተን ደእዳ ካናነ ቢታ እማና ጋዳ ኤንታራ ጫቃስ።

⁵ ቃስካ ግብፀ አሳት አይለይያ እስራኤለታ ዋሱዋ ታኒ ስአስ፤ ታ ጫቁዋካ ቆፓስ።

⁶ “ሄሳ ግሾ ኔኒ እስራኤለታኮ፥ ‘ታኒ ጎዳ። ታኒ ህንተና ግብፀ አይለተፈ አሻዳ ከሳና። ታኒ ኤንታ ታ ምኖ አፃን ኢታ ፕርዳ ፕርዳዳ ህንተና ዎዛና።

⁷ ታኒ ህንተና ታ ደረ ኦና፤ ታኒ ህንተ ፆሳ ግዳና። ግብፀ አይለተፈ ታኒ ህንተና ከስዳ ዎደ፥ ታኒ ጎዳ ህንተ ፆሳ ግደይሳ ህንተ ኤራና።

⁸ ታኒ አብራሃመስ፥ ይሳቃስነ ያይቆባስ እማና ጋዳ ጫቅዳ ቢታ ህንተና ኤሀና። ሄ ቢታ ታኒ ህንተዉ ላታ ቢታ ኦዳ እማና። ታኒ ጎዳ’ ያጋ” ያግስ።

⁹ ሙሰይ ሄሳ እስራኤለታስ ኦድስ፥ ሽን ኤንቲ አይለተ ኡንአፈ ደንዶይሳን ኡፋይስ ቃንፅዳ ግሾ እ ግያባ ስእቦኮና።

¹⁰ ሄሳፈ ጉየ ጎዳይ ሙሰ፥

¹¹ “ባዳ ግብፀ ካዋስ፥ ‘እስራኤለታ ነ ቢታፈ የዳ’ ያጋዳ ኦዳ” ያግስ።

¹² ሽን ሙሰይ፥ “ታ እንፃርሳይ ሉፋ። እስራኤለት ታና ስእቦኮና፥ ሽን ግብፀ ካዎይ ታና ዋንድ ስአኔ?” ያግስ።

¹³ ጎዳይ ሙሰነ አሮና፥ “ብድ፥ እስራኤላ አሳ ግብፀፈ ከሳና መላ፥ ታኒ ህንተና ኪትዳይሳ እስራኤለታስነ ግብፀ ካዋስ ኦድተ” ያግስ።

ሙሰነ አሮና የለታ

¹⁴ ሀይሳፈ ካልድ ፃፈትዳይሳት ኤንታ ማይዛታ፤ ያይቆባ ባይራ ናኣ ሮቤላ አደ ናይት፥ ሄኖከ፥ ፋሉ፥ ኤስሮመነ ካርማ። ሀይሳቲ ሮቤላ ሶ አሳስ ማይዛታ።

¹⁵ ስሞና አደ ናይት፥ ያሙኤላ፥ ያምና፥ ኦሀዳ፥ ያክና፥ ዞሃራነ ካናነ ቢታ ማጫሴፐ የለትዳ ሳኡላ። ሀይሳቲ ስሞና ሶ አሳስ ማይዛታ።

¹⁶ ሌወ አደ ናይት ገድሶና፥ ቃሃታነ ማራራ። ሌወይ ፄታነ ሀስታማነ ላፑን ላይ ደእስ።

¹⁷ ገድሶና አደ ናይት ልብናነ ሳመአ ጌተቶሶና። ሀይሳቲ ባንታ ሶ አሳስ ማይዛታ።

¹⁸ ቃሃታ አደ ናይት አምራማ፥ እዛራ፥ ከብሮናነ ኡዝኤላ። ቃሃት ፄታነ ሀስታማነ ሄ ላይ ደእስ።

¹⁹ ማራራ አደ ናይት ማህላነ ሙሰ። ባንታ የለተ ማራን ሀይሳፈ ቆሞን ፃፈትዳይሳት ሌወ ሼሻታ።

²⁰ አምራም ባ አዋ ምችዉ ዮከቤዶ ማችስ። እያ አሮናነ ሙሰ እያዉ የላሱ። አምራም ፄታነ ሀስታማነ ላፑን ላይ ደእስ።

²¹ እዛራዳ ናይት፥ ቆረ፥ ነፈጋነ ዝክራ።

²² ኡዝኤላ አደ ናይት፥ ምሳኤላ፥ ኤልዛፋናነ ስትራ።

²³ አሮን አምናዳበ ናእዉ፥ ናአሶና ምችዉ ኤልሰቦ ማችስ። እያ እያዉ ናዳበ፥ አብዮዳ፥ አላዛራነ እታማራ የላሱ።

²⁴ ቆረ አደ ናይት፥ አስራ፥ ኤልቃናነ አብያሳፋ።

²⁵ አሮና ናአይ አላዛር ፑትኤላ ናይታፐ እስንዉ ማችስ። እያ እያዉ ፕንሃሳ የላሱ። ሀይሳቲ ሌወ ሼሻታነ ኤንታ ማይዛታ።

²⁶ ጎዳይ፥ ሙሰነ አሮና እስራኤለ አሳ ያራን ያራን ኤንታ ሶ አሳራ ግብፀፈ ካለድ ከሳና መላ ኪትስ።

²⁷ እስራኤለታ ግብፀፈ ከስ የዳና መላ ግብፀ ካዋስ ኦድዳይ ኤንታ።

²⁸ ጎዳይ ግብፀን ሙሰስ ኦድዳ ዎደ፥

²⁹ “ታኒ ጎዳ፤ ታኒ ነዉ ኦድያባ ኡባ ግብፀ ካዋስ ኦዳ” ያግስ።

³⁰ ሽን ሙሰይ፥ “ታ ዶናይ ሉፋ ግደይሳ ነ ኤራሳ፥ ያትን ካዎይ ታኒ ኦድያባ ዋን ስአኔ?” ያግስ።