Kessa 5 - ጌሻ ማፃፋ

ሙሰይነ አሮን ግብፀ ካዉዋ ስንን

¹ ሄሳፈ ጉየ ሙሰይነ አሮን ግብፀ ካዋኮ ብድ፥ “ጎዳይ፥ እስራኤለ ፆሳይ፥ ‘ታ አሳይ ታና ቦንቻናዉ መላ ቢታን፥ ባኣለ ኦና መላ ኤንታ የዳ’ ያጌስ” ያግዶሶና።

² ካዎይ፥ “ታኒ እያዉ ኪተታዳ እስራኤለ የዳናዉ እ፥ ጎዳይ ኦኔ? ታኒ ጎዳ ኤርከ፤ እስራኤላካ የድከ” ያግስ።

³ ኤንቲ ዛሪድ፥ “እብራወታ ፆሳይ ኑስ ቆንጭስ። ሀእ ኑኒ ጎዳስ፥ ኑ ፆሳስ፥ ያርሾ ያርሻናዉ ሄ ጋላሳ ኦገ መላ ቢታ ባና መላ ኑና የዳርክ። ሄሳ ኑ ኦና እፅኮ እ ኑና ሀርገን ዎይኮ ኦላን ይሳና” ያግዶሶና።

⁴ ሽን ግብፀ ካዎይ፥ “ሙሰ፥ አሮና፥ አሳ አይስ ኦሶ ድገቲ? ጉየ ብድ ህንተ ኦሱዋ ኦተ።

⁵ ሄኮ፥ ሀ ቢታን ህንተ ዳርደታ፤ ቃስ ህንተ አሳ ኦሶ ድገታ” ያግስ።

⁶ ካዎይ ሄ ጋላስ ግብፀ ካፖታነ እስራኤለታ ኦስሰይሳታ ሀይሳዳ ያግድ ኪትስ፤

⁷ “ካሰይሳዳ ፁበ ኦናው አሳስ ኡቱላ እሞፍተ። ኤንቲ ኡቱላ ባንታዉ ኮይድ ሺሾ።

⁸ ሽን ካሰይሳፈ ታይቡዋ ጉና ኤንቲ ፁበ መድ ሺሻና መላ ኪትተ፤ እስኖካ ፓጭሶፕተ። ኤንቲ፥ ‘ኑኒ ኑ ፆሳስ ያርሾ ያርሻና መላ ኑና የዳ’ ያግድ ታና ኦይቸይ ኤንታዉ ኦሶይ ጉፅዳ ግሾሳ።

⁹ ኤንቲ ኦሶን ጉንዳና መላነ ዎርዶ ኦዳ ስኦናዉ ኤንታዉ ዎደይ ዶና መላ ኦሶ ዴፅስተ” ያግድ ኪትስ።

¹⁰ ግብፀ ካፖትነ እስራኤለታ ኦስሰይሳት ከይድ፥ አሳኮ፥ “ካዎይ፥ ‘ታኒ ህንተዉ ኡቱላ እምከ።

¹¹ ህንተ ብድ አዉፐካ ኮይድ ደምተ። ሽን ህንተ ኦያ ፁበ ታይቡዋፐ እሶይካ ፓጨና’ ያግስ” ያግዶሶና።

¹² ሄሳ ግሾ አሳይ ኡቱላ ኮያናዉ ግብፀ ቢታ ኡባን ላለትዶሶና።

¹³ ግብፀ ካፖት ኤንታዉ ኡቱል እመትን ኤንቲ ኦያ ፁበ ታይቡዋ ኬና ኦድ ሺሻና መላ ኤንታ ኡንኤዶሶና።

¹⁴ ግብፀ ካፖት ባንታፈ ጋርሳራ ደእያ እስራኤለ ካፖታ፥ “ህንተ ካሰ ኦያ ፁበ ኬና አይስ ኦ ሺሽበከቲ?” ያግድ ዋዶሶና።

¹⁵ ሄሳፈ ጉየ እስራኤለ ካፖት ካዋኮ ብድ፥ “አቤት ጎዳዉ፥ ኔኒ ነ አይለታ ሀይሳዳ አይስ ኦይ? ያግድ ማጋንዶሶና።

¹⁶ ነ አይለታስ ኡቱል እመተና፥ ሽን ፁበ ኦና መላ ኪተትዳ። ሄሳ ቦላ ኑና ዋሶና፤ ሽን ባላይ ነ አሳ ቦላና” ያግዶሶና።

¹⁷ ሽን ካዎይ፥ “ህንተ ኦሶ ዶሶና አዛላታ፤ ህንተ ዎራ ዎዳ አዛላታ። ህንተ፥ ‘ኑኒ ጎዳስ ያርሻናዉ ባና፤ ኑና የዳ’ ያግድ ዛር ዛር ታና ኦይቸይ ሄሳ ግሾሳ።

¹⁸ ሀእ ጉየ ብድ ኦተ። ህንተዉ አይባ ኡቱልካ እመተና፥ ሽን ህንተ ካሰይሳ ኬና ፁበ ኦናዉ በሴስ” ያግስ።

¹⁹ እስራኤለ ካፖት፥ ኤንቲ ካሰይሳ ኬና ፁበ ኦና መላ ኪተትዳ ዎደ ኤንቲ መቶን ገልዳይሳ ኤርዶሶና።

²⁰ ኤንቲ ካዉዋ ማታፐ ከይድ፥ ባንታና ካረን ናግያ ሙሰኮነ አሮናኮ ብዶሶና።

²¹ ኤንቲ ሙሰኮነ አሮናኮ፥ “ህንተ ኑና ካዎይነ እያ ሞርናት እፃና መላነ ዎና መላ ህንተ ኦዳይሳ ፆሳይ ፄሎ፤ እ ፕርዶ” ያግዶሶና።

ሙሰ ዎሳ

²² ሙሰይ ጎዳኮ ስሚድ፥ “ጎዳዉ፥ ኔኒ ሀ አሳ ቦላ መቶ አይስ ኤሀዲ? ኔኒ ታና ኪትዳይ ሄሳሴ?

²³ ታኒ ነ ሱንን ካዋስ ኦዳናዉ ብዳ ዎደፐ ዶምን እ ሀ አሳ ቦላ መቶ ሀ ዳርስስ። ቃስ ነካ ነ አሳ አሻባካ” ያግስ።