Kessa 4 - ጌሻ ማፃፋ

ፆሳይ ሙሰስ እምዳ ዎልቃ

¹ ሙሰይ፥ “ኤንቲ ታና አማኖና እፅድ፥ ዎይኮ ታኒ ግያባ ስኦና እፅድ፥ ‘ጎዳይ ነዉ ቆንጭቤና’ ጊኮ ዎይጎ?” ያግድ ኦይችስ።

² ጎዳይ ሙሰኮ፥ “ነ ኩሽያን ደኤይስ አይቤ?” ያግድ ኦይችስ። “ፃምአ” ያግስ።

³ ጎዳይ እያኮ፥ “አነ ሳአን የጋ” ያግስ። ሙሰይ ሄ ፃምኣ ሳአን የግን፥ ሾሽ ግድን፥ ሙሰይ እያፐ ዎፅስ።

⁴ ሄሳፈ ጉየ ጎዳይ፥ “ነ ኩሽያ የዳዳ እያ ጎይና ኦይካ” ያግስ። ሙሰይ ባ ኩሽያ የድድ ሾሻ ኦይክ ደንን ሾሻይ እያ ኩሸን ስሚድ፥ ፃምአ ግድስ።

⁵ ጎዳይ፥ “ነ አዋታ ፆሳይ፥ አብራሃመ፥ ይሳቃነ ያይቆባ ፆሳይ ነዉ ቆንጭዳይሳ ኤንቲ አማናና መላ ሀይሳ ኦ” ያግስ።

⁶ ካልድ ጎዳይ ሙሰኮ፥ “ነ ኩሽያ ነ ሾጰን ናቃ” ያግስ። ሙሰይ ባ ኩሽያ ሾጰን ናቅስ። እ ከስያ ዎደ እያ ኩሸይ ባሮ ሀርገን ኦይከትዳዳ ቦፅስ።

⁷ ጎዳይ እያኮ፥ “ነ ኩሽያ ነ ሾጰን ዛራዳ ናቃ” ያግስ። ሙሰይ ባ ኩሽያ ባ ሾጰን ዛር ናቅድ ከስያ ዎደ እያ ኩሸይ ስሚድ ሀንኮ አሳተ መላ ግድስ።

⁸ ጎዳይ፥ “ኤንቲ ነና ዎይኮ ኮይሮ ማላታ አማኖና እፅኮ፥ ናምአን ማላታ አማናና።

⁹ ሽን ኤንቲ ሀ ናምኡ ማላታታ አማኖና እፅኮ፥ ዎይኮ ኔኒ ግያባ ስኦና እፅኮ፥ ናይለ ሻፋፐ ሃ ኤካዳ፥ መላ ቢታ ቦላ ጉሳ። ሄ ሃይ ቢታ ቦላ ሱን ላመታና” ያግስ።

¹⁰ ሙሰይ ጎዳኮ፥ “አቤት ጎዳዉ፥ ካሰካ ዎይኮ ሀእ ነ ታና ኦድሶ ኦይክዳይሳፈ ዶምን ኦድድ አማንይ ታዉ ሀነና። ታ ጌሻዳ ኦደታናዉ ዳንዳእከ፤ ታ እንፃርሳይ ሉፋ” ያግስ።

¹¹ ጎዳይ እያኮ፥ “አሳስ ዶና እምዳይ ኦኔ? ሙመ ዎይኮ ቱለ ኦይ ኦኔ? ፄልሰይነ ቆቅሰይ ኦኔ? ታና ጎዳ ግድክናዬ?

¹² ሀእ ኔኒ ባ፤ ኔኒ ኦደታና መላ ታ ነና ማዳና። ነ ጋናባ ታ ነዉ እማና” ያግስ።

¹³ ሽን ሙሰይ፥ “ጎዳዉ፥ ሀያና፥ ሀራ አስ ኪታ” ያግስ።

¹⁴ ሄሳፈ ጉየ ጎዳይ ሙሰ ቦላ ዳሮ ሀንቀትድ እያኮ፥ “ሌወ ግድዳ ነ እሻ አሮን ባዌ? እ ኦዳ ሎይድ ኤረይሳ ታ ኤራይስ። ሀእ እ ኔራ ጋሄታናዉ ይሸ ኦገ ቦላ ደኤስ፤ እ ነና በእያ ዎደ ዎዛናፐ ኡፋይታና።

¹⁵ ኔኒ፥ ‘ያጋ’፥ ጋዳ እያዉ ኦዳና። ታኒ ህንተ ናምአይካ ዎይግ ኦዳነኮነ ዋትድ ኦነኮ ህንተና ታማርሳና።

¹⁶ እ ነ ዶና ግድድ አሳስ ነ ግሾ ኦዳና። ኔኒ ፆሳ በሳን ግዳዳ እ ጋናባ እያዉ ኦዳና።

¹⁷ ሀ ፃምአ ኤካ ባዳ እያራ ማላታ ኦዳ በሳ” ያግስ።

ሙሰይ ግብፀ ስሙዋ

¹⁸ ሄሳፈ ጉየ ሙሰይ ባ ቦሉዋ ዮታራኮ ስም ብድ፥ “ሀኖ ጋካናዉ አሳይ ፓፃ ደእያኮ በአናዉ፥ ታኒ ጉየ ግብፀ ታ አሳኮ ቦ?” ያግስ። ዮቶር ሙሰኮ፥ “ኤ ባ፤ ሳሮ ጋካ” ያግስ።

¹⁹ ሙሰይ ምድያመ ቢታን ደእሽን ጎዳይ እያኮ፥ “ነና ዎናዉ ኮይዳ አሳት ኡባይ ሀይቅዳ ግሾ ጉየ ግብፀ ስማዳ ባ” ያግስ።

²⁰ ሙሰይ ባ ማችዉነ ባ አደ ናይታ ሀረ ቶግስድ ጉየ ግብፀ ስምስ። ሙሰይ ፆሳ ፃምአ ባ ኩሸን ኦይክድ ብስ።

²¹ ጎዳይ ሙሰ፥ “ኔኒ ግብፀ ስማዳ ብያ ዎደ፥ ታኒ ነዉ እምዳ ዎልቃን ግብፀ ካዉዋ ስንን ማላታታ ኦናይሳ ባሎፓ። ሽን ሄሳንካ እ አሳ የዶና መላ ታኒ እያ ዎዛና ሙምሳና።

²² ሄ ዎደ ታኒ ጎዳይ ግያባ ካዋስ ሀሳዳ ያጋዳ ኦዳ። ‘እስራኤል ታ ባይራ ናአ።

²³ እ ታዉ ጎይናና መላ እያ የዳ ጋዳ ታኒ ነዉ ኦዳስ። ሽን ኔኒ የዶና እፃዳሳ። ሄሳ ግሾ፥ ታኒ ነ ባይራ አደ ናኣ ዎና’ ያጌስ ጋዳ ኦዳ” ያግስ።

²⁴ ኦገን ሸምፖ በሳን ጎዳይ ሙሰራ ጋሄትድ እያ ዎናዉ ኮይስ።

²⁵ እያ ማችያ ስፖራ ቃራ ሹቹ ኤካዳ፥ ባ ናኣ ቃፃራሱ። ቃፃራ ሾሁዋራ ሙሰ ቶሁዋ ቦቻሱ። እያ ሙሰኮ፥ “ኔኒ ታዉ ቱማ ሱ መዳ” ያጋሱ።

²⁶ ሄሳ ግሾ፥ ጎዳይ እያ ዎና አግስ። ሄ ዎደ እያ ሙሰኮ፥ “ሀ ቃፃሩዋ ጋሶን ኔኒ አታዳሳ” ያጋሱ።

²⁷ ሄ ዎደ ጎዳይ አሮናኮ፥ “ሙሰራ ጋሄታናዉ መላ ቢታ ባ” ያግስ። እ ብድ፥ ፆሳ ዙማ ቦላ ሙሰራ ጋሄትድ እያ ዬርስ።

²⁸ ሙሰይ ግብፀ ብድ ጋናባነ ኦና ማላታታ ኡባ ጎዳይ እያ ኪትዳይሳ አሮናስ ኦድስ።

²⁹ ሙሰራነ አሮናራ ግብፀ ብድ፥ እስራኤለ ጭማታ ኡባ ሺሽዶሶና።

³⁰ አሮን ጎዳይ ሙሰስ ኦድዳ ቃላ ኡባ ኤንታዉ ኦድስ። ቃስ ሙሰይ ማላታታ ሄ አሳ ስንን ኦስ።

³¹ ኤንትካ አማንዶሶና። ጎዳይ ኤንታዉ ቆፕዳይሳነ ኤንታ ዋይያ በእዳይሳ ስእዳ ዎደ ጉፋንድ ጎይንዶሶና።