Kessa 34 - ጌሻ ማፃፋ

ዛሪድ ኦሰትዳ ሎቸ ሹቻታ

¹ ጎዳይ ሙሰኮ፥ “ኮይሮይሳታ ዳንያ ናምኡ ሎቸ ሹቻታ ማሳዳ ጊግሳ። ታኒ ሄ ሹቻታ ቦላ ካሰ ኔኒ መንዳ ሹቻታ ቦላ ደእያ ቃላታ ፃፋና።

² ዎንቶ ዎንታ ጉራ ታራ ጋሄታናዉ ሲና ዙማ ሁጵያ ከያ።

³ ኔራ ኦንካ ከዮፖ ዎይኮ ዙማ ቦላ አዉንካ በንቶፎ። ሀር አቶሽን ዶርሳ ዎይኮ መሄ ዉደይ ዙማ ፃጶን ሄመቶፎ ዎይኮ ሞፖ” ያግስ።

⁴ ሄሳ ግሾ፥ ሙሰይ ኮይሮ ሹቻታ ዳንያ ናምኡ ሹቻታ ማስድ፥ ጎዳይ ኪትዳይሳዳ፥ ሹቻታ ኦይክድ ዎንታ ጉራ ሲና ዙማ ቦላ ከይስ።

⁵ ጎዳይ ሻራራ ዎድ፥ እያራ ያን ኤቅድ፥ “ታኒ ጎዳ” ያግድ ባ ጌሻ ሱን አዋጅስ።

⁶ ጎዳይ ሙሰ ስንራ አሸ ሀይሳዳ ያግድ አዋጅስ፤ “ታኒ ፆሳ፥ ታ ሱንይ ጎዳ። ታኒ፥ ቃይነ ማሮታይ ኩምዳ ፆሳ። ታኒ ዳንዳአንነ መርና ሲቆን ኩምዳይሳነ ዳሮ አማንይሳ።

⁷ ታኒ፥ ታ አሳስ ገልያ ቃላ ሙኩሉ የለተ ጋካናዉ ናገይሳነ ኢታተ፥ ማካላነ ናጋራ አቶ ገይሳ። ሽን ሄንነ ኦይዳን የለተ ጋካናዉ አዋታ ናጋራ ግሾ ናይታ ሴሮና አግከ” ያግስ።

⁸ ሙሰይ ኤለስድ ቢታን ጉፋንድ ጎይንስ።

⁹ እ ዛሪድ፥ “አቤት ጎዳዉ፥ ኔኒ ታናን ኡፋይትያባ ግድኮ፥ ኑራ እስፈ የ። ሀይስ አሳይ ስኦና አስ፤ ኑ ኢታተነ ኑ ናጋራ አቶ ያጋዳ፥ ኑና ነ አሰ ኦ” ያግስ።

¹⁰ ጎዳይ ሙሰኮ፥ “ታኒ እስራኤለ አሳራ ጫቃና። ሀይሳፈ ካሰ ቢታ ቦላ አዉንካ ሀን ኤሮና ማላልስያባ ነ አሳ ስንን ኦና። ታኒ ጎዳይ፥ አይ መላ ማላልስያባ ኦያኮ፥ ኔኒ ኤንታ ግዶን ደእያ አሳይ በአና።

¹¹ ሀች ታኒ ህንተና ኪትያ ኪታ ናግተ። ህንተ ስንፈ አሞረታ፥ ካናነታ፥ ህተታ፥ ፓርዘታ፥ ህወታነ ያቡሰታ ታኒ ጎዳና።

¹² ኤንቲ ህንተዉ ፅሄ ግዶና መላ ህንተ ገልያ ቢታን ደእያ አሳራ ጫቆፍተ።

¹³ ኤንታ ያርሾ በሳታ ላልተ፤ ጎይኖ ቱሳታ መንረተ። አሼራ ጌተትያ ማጫ ፆሰ ምስለ ቱሳታ ቃንፀረተ።

¹⁴ ታኒ ጎዳይ፥ ታ ቦንቹዋ ሀራ ፆሳታራ ኮፆና ፆሰ ግድያ ግሾ፥ ታፐ ሀራ ፆሳታስ ጎይኖፍተ።

¹⁵ ሄ ቢታን ደእያ አሳታራ አይባ ጫቆካ ጫቆፍተ። ኤንቲ ባንታ ፆሳታ ጎይንያ ዎደነ ኤንታዉ ያርሽያ ዎደ፥ ኤንቲ ህንተና ባንታራ እስፋና መላ ኦይችኮ፥ ህንተ ኤንቲ ባንታ ፆሳታስ ያርሽያ ካ ማናዉ ፓጨትድ፥ ታዉ አማነቶና እፃና።

¹⁶ ቃስ ህንተ ኤንታ ማጫ ናይታፐ ህንተ አደ ናይታስ እምኮ፥ ሄ ዎደ ሄ ማጫ ናይት ባንታ ፆሳታ ጎይንድ፥ ህንተ አደ ናይትካ ታዉ አማነቶና እፅድ፥ ባንታ ፆሳታ ጎይናና መላ ኦና።

¹⁷ “ብራታፐ ቆፀትድ፥ መትዳ ፆሳታ ጎይኖፍተ።

¹⁸ “ኡይ ባኣለ ቦንችተ። ህንተ ግብፀፈ ከይዳይ፥ አቢባ አጌናን ግድያ ግሾ፥ ታኒ ህንተና ኪትዳይሳዳ፥ ሄ አጌናን፥ ላፑን ጋላስ ጋካናዉ ኡይ ሚተ።

¹⁹ “ባይራ የለትያ አደ ናእ ኡባይነ ባይራ የለትያ መሄ አደ ኡባይ ታባ።

²⁰ ኮይሮ የለትዳ ሀረ ማር ዶርሳ ማራራ ላማዳ ዎዛ። ዎዞና እፅኮ፥ እያ ሞርግያ መን። ባይራ የለትዳ አደ ናአ ኡባ ዎዛ። “ኦንካ እምያባ ኦይኮና መላ ኩሸ ታ ስንን ሺቆፖ።

²¹ “ኡሱፑን ጋላስ ኦተ፥ ሽን ላፑን ጋላሳን ሸምፕተ። ዘርያ ዎደ ግድን ዎይኮ ካ ጫክያ ዎደ ላፑን ጋላሳን ሸምፕተ።

²² “ኮይሮ ህንተ ግስትያ ጫኮ ዶምያ ዎደ፥ ካ ሺሾ ባኣለ ቦንችተ። ቃስ ላይ ዉርሰ ካ ሺሽያ ዎደ፥ ሻቃራ ባኣለ ቦንችተ።

²³ ላይን ሄ ቶሆ እስራኤለ አደ ኡባይ መተ ጎዳ፥ እስራኤለ ፆሳ ጎይናናዉ ዮ።

²⁴ ካዎተታ ታኒ ህንተ ስንፈ የደ ከሳዳ ህንተ ዛዋ አሳና። ህንተ ታና ጎይናናዉ ላይን ሄ ቶሆ ይያ ዎደ፥ ኦንካ ህንተ ቢታ ኦልድ ኤካናዉ አሞተና።

²⁵ “ህንተ ታዉ መሄ ያርሽያ ዎደ፥ እርሾ የግድ ኡክዳ ኡይራ ሽሾፕተ። ፓስካ ቦንችያ ጋላሳስ ያርሽዳ ያርሹዋፈ ዎንታስ አይባካ አሾፍተ።

²⁶ “ህንተ ጋደን ባይራ ካፅዳ ካፈ ኮይሮ አይፍያ ጎዳ ህንተ ፆሳ ኬ ኤህተ። “ዴሻ ማር እያ አየ ማን ዶይሶፕተ” ያግስ።

²⁷ ጎዳይ ሙሰኮ፥ “ታኒ ኔራነ እስራኤለ አሳራ ጫቆ ገለይ ሀ ቃላታን ግድያ ግሾ፥ ሀ ቃላታ ፃፋ” ያግስ።

²⁸ ሙሰይ ሞናነ ኡዮና፥ ኦይታሙ ጋላስነ ኦይታሙ ቃማ ጎዳራ ዙማ ቦላ ጋምእስ። እ፥ ጫቆ ቃላ ገልዳ ታሙ ኪታታ ሎቸ ሹቻታን ፃፍስ።

ሙሰይ ሲና ዙማፐ ዎ

²⁹ ሙሰይ ጎዳራ ኦደትሸ ጋምእድ፥ ታሙ ኪታታ ኦይክዳ ናምኡ ሎቸ ሹቻታ ኤክድ ሲና ዙማፐ ዎያ ዎደ እያ ሶምኦይ ጶሌስ፥ ሽን እ ሄሳ ኤርቤና።

³⁰ አሮንነ እስራኤለ አሳ ኡባይ ሙሰ ፄልድ፥ እያ ሶምኦይ ጶለይሳ በእድ፥ እያኮ ሺቃናዉ ያይዶሶና።

³¹ ሽን ሙሰይ ኤንታ ፄግስ። አሮንነ እስራኤለ ሀላቃት ኡባይ እያኮ ሺቅን፥ እ ኤንታ ኦድስስ።

³² ሄሳፈ ጉየ፥ እስራኤለ አሳ ኡባይ እያኮ ሺቅን፥ ጎዳይ እያዉ ሲና ዙማ ቦላ እምዳ ኪታ ኡባ እ ኤንታዉ እሚስ።

³³ ሙሰይ ኤንታራ ኦደተይሳ ዉርስዳ ዎደ ባ ሶምኡዋ ላፃናን ካምስ።

³⁴ ሽን ሙሰይ ጎዳ ስን፥ እያራ ኦደታናዉ ገልያ ዎደ ላፃና ባ ሶምኡዋፈ ቃሬስ። ያፐ ከይያ ዎደ፥ ጎዳይ እያ ኪትዳባ ኡባ እስራኤለ አሳስ ኦዴስ።

³⁵ ሄ ኡባን ኤንቲ እያ ሶምኦይ ጶለይሳ በኦሶና። ሄሳ ግሾ፥ ሙሰይ ጎዳራ ኦደታናዉ ባና ጋካናዉ፥ ባ ሶምኡዋ ላፃናን ካሜስ።