Kessa 32 - ጌሻ ማፃፋ

ዎርቃ ማራ ምስለ

¹ አሳይ፥ ሙሰይ ዙማ ቦላፈ ዎናዉ ጋምእዳይሳ በእዳ ዎደ አሮናኮ ይድ፥ “ኑና ካለሸ ናጋና ፆሳታ ኑስ ኦ። ግብፀ ቢታፈ ኑና ከስዳ ሙሰይ ዋንዳኮ ኤሮኮ” ያግዶሶና።

² አሮን ኤንታኮ፥ “ህንተ ማቸታ፥ ህንተ አደ ናይታነ ህንተ ማጫ ናይታ ሀይን ደእያ ዎርቃ ከስድ፥ ታዉ ሃ ኤክድ ዪተ” ያግስ።

³ አሳ ኡባይ ባንታ ሀይ ዎርቃ ከስድ፥ አሮናስ ኤህዶሶና።

⁴ እ ሄሳ ኤንታፈ ኤክድ፥ ታማን ሼሽዳፐ ጉየ፥ ቆፅድ፥ ዎርቃ ማራ ምስለ ኦድ መስ። ኤንቲ፥ “እስራኤለቶ፥ ኑና ግብፀ ቢታፈ ካለድ ከስዳ ኑ ፆሳት ሀይሳታ” ያግዶሶና።

⁵ አሮን ሄሳ በእዳ ዎደ፥ ሄ ማራ ስንን ያርሾ በሰ ጊግስድ፥ “ዎንቶ ጎዳ ቦንችያ ባኣለ ጋላስ ግዳና” ያግድ ኤርስስ።

⁶ ዎንተ ጋላስ ጉራ አሳይ ደንድድ፥ ፁሳ ያርሾነ እስፈተ ያርሾ ያርሽዶሶና። ያትድ፥ አሳይ ማናዉነ ኡያናዉ ኡትዶሶና። ም ኡይ ስሚድ፥ ዱራናዉነ ፖኮባ ሀናናዉ ደንድዶሶና።

⁷ ጎዳይ ሙሰኮ፥ “ኔኒ ግብፀፈ ከሳዳ፥ ኤህዳ ነ አሳይ ናጋራ ኦድ፥ ባንታና ቱንስዳ ግሾ ኤለሳዳ ዱገ ዎ።

⁸ ታኒ ኤንታ ኪትዳ ኦግያፐ ኤንቲ ኤለስድ ሽረትዶሶና። ዎርቃ ሼሽድ ማራ ምስለ ኦድ፥ ባንታዉ ኤቃ መድ እያ ጎይንዶሶና። እያዉ ያርሽድ፥ ‘ኑና ግብፀ ቢታፈ ከስዳ ኑ ፆሳይ ሀይሳ’ ያግዶሶና።

⁹ ጎዳይ ሙሰኮ፥ ሀ አሳይ አይ መላ ዎዛና ሙመኮ ታ በአስ።

¹⁰ ሀእ ታ ሀንቆይ ኤንታ ቦላ ኤፅን፥ ታኒ ኤንታ ይሳናዉ ጊገትዳ ግሾ፥ ኔኒ ታና ድጎፋ። ያታዳ፥ ታኒ ነና ግታ ደረ ኦና” ያግስ።

¹¹ ሽን ሙሰይ ባ ጎዳ፥ ፆሳ ሀይሳዳ ያግድ ዎስስ፤ “አቤት ጎዳዉ፥ ኔኒ ነ ግታ ዎልቃንነ ነ ምኖ ኩሽያን ግብፀፈ ከሳዳ ኤህዳ ነ አሳ ቦላ ነ ሀንቆይ አይስ ኤፂ?

¹² ነ ሄሳ ኦያባ ግድኮ፥ ግብፀት፥ ‘ጎዳይ ኤንታና ደረታ ቦላ ዎናዉነ ቢታፈ ፕትድ ይሳናዉ ከስስ’ አይስ ጋኔ? ነ ያሽያ ሀንቁዋፈ ስማ። ነ አሳ ይሳናዉ ቆፕዳይሳ አጋ።

¹³ ነ አይለታ አብራሃመ፥ ይሳቃነ ያይቆባ ሀሳያ። ኔኒ ኤንታዉ፥ ‘ታኒ ህንተ ሼሻ ሳሎ ፆልንቶዳ ዳርሳና፤ ታኒ ህንተዉ እማና ግዳ ሀ ቢታ ኡባ ህንተ ሼሻታስ እማና፤ ኤንቲ ሄ ቢታ መርናዉ ላታና’ ጋዳ ነ ሁጰን ነ ጫቅዳ ጫቁዋ ቆፓ” ያግስ።

¹⁴ ሄሳ ግሾ፥ ጎዳይ ባ ደርያ ቦላ ኢታባ ኤሀናዉ ቆፕዳይሳ አግድ፥ ኤንታ ማርስ።

¹⁵ ሙሰይ ናምኡ ባጋራ ፃፈትዳ፥ ታሙ ኪታት ደእያ ናምኡ ሎቸ ሹቻታ ባ ኩሸን ኦይክድ፥ ዙማፐ ዱገ ዎስ።

¹⁶ ሄ ማሰትዳ ሹቻታ ጊግስዳይ ፆሳ፤ ሹቻታ ቦላ ዎጭድ ፃፍዳይካ ፆሳ።

¹⁷ እያሱይ አሳ ኮሽንቻ ስእዳ ዎደ፥ ሙሰኮ፥ “አሳይ ሲራትዳ በሳን ኦላ ዋሶይ ስኤቴስ” ያግስ።

¹⁸ ሙሰይ ዛሪድ፥ “ሀይስ ፆንዳ አሳ ጬቆ ዎይኮ ፆነትዳ አሳ ዬሆ ግዶናሽን፥ የ ዋሶ” ያግስ።

¹⁹ ሙሰይ ጉታኮ ማትዳ ዎደ ማራነ ዱርሳ በእድ ዳሮ ሀንቀትስ። ሄ ዎደ ባ ኩሸን ኦይክድ ይዳ፥ ማሰትዳ ሹቻታ ዙማ ፃጶን ሆልድ መንረስ።

²⁰ ኤንቲ መዳ ማራ ኤክድ፥ ታማን ፁግስ። ሄሳፈ ጉየ፥ ሊቃና ጋካናዉ ጋጭድ ሃራ ማድ፥ እስራኤለ አሳይ ኡያናዳ ኦስ።

²¹ ሙሰይ አሮናኮ፥ “ሀ አሳይ ነዉ አይ ኦን፥ ኤንታ ሀይሳ መላ ኢታ ናጋራ ባንታ ቦላ ኦና መላ ኦዲ?” ያግስ።

²² አሮን ዛሪድ፥ “ታ ጎዳዉ፥ ታና ሀንቀቶፋ። ሀ አሳይ ኢታባ ኦናዉ አይ መላ ኮያኮ ነ ኤራሳ።

²³ ኤንቲ፥ ‘ኑና ግብፀፈ ከስድ ኤህዳ፥ ሙሰይ ዋንዳኮ ኑ ኤሮኮ። ሄሳ ግሾ፥ ካለያ ፆሳታ ኑስ ኦ’ ያግዶሶና።

²⁴ ታኒ ኤንታኮ፥ ‘ህንተ ሀይን ደእያ ዎርቃ ከስድ፥ ሀምተ’ ያጋስ። ኤንቲ ታዉ እምዳ ዎርቃ ታኒ ታማን የግን፥ ሀ ማራ ምስለይ ከይስ” ያግስ።

²⁵ አሮን አሳ ጮ የድ አግን፥ አሳይ ባ ሞርከታ ስንን ካዉይድ፥ ካትዳይሳ ሙሰይ በእስ።

²⁶ ሄሳ ግሾ፥ ሙሰይ ጉታ ገልያ ፐንግያን ኤቅድ፥ “ጎዳ ባጋ ግድያ አስ ኦንካ ታኮ ዮ” ያግስ። ሄ ዎደ ሌወት ኡባይ እያኮ ሺቅዶሶና።

²⁷ እ፥ ኤንታኮ፥ “ጎዳይ፥ እስራኤለ ፆሳይ፥ ህንተ እሶይ እሶይ ህንተ ማሻ ሾድድ፥ ጉታስ ሀ ፐንገፈ ህን ፐንገ ጋካናዉ ብድ፥ ህንተ እሻታ፥ ህንተ ላገታነ ህንተ ሾሮታ ዎተ” ያግስ።

²⁸ ሌወት ሙሰይ ኪትዳይሳዳ ኦድ፥ ሄ ጋላስ ሄ ሙኩሉ ግድያ አሳ ዎዶሶና።

²⁹ ሙሰይ ሌወታኮ፥ “ሀች ህንተ፥ ህንተ ናይታነ ህንተ እሻታ ዎናዉ ኪተትድ ህንተና ጎዳስ ዱማይደታ። ጎዳይ ህንተና አንጅስ” ያግስ።

³⁰ ዎንተ ጋላስ ሙሰይ አሳኮ፥ “ህንተ ኢታ ናጋራ ኦደታ፤ ሽን ሀእ ታኒ ጎዳኮ ዙማ ቦላ ከያዳ፥ ኦን ኤር ህንተ ናጋራስ አቶተ ደሞና አግከ” ያግስ።

³¹ ያትን ሙሰይ ጎዳኮ ስሚድ ብድ፥ “ሀ አሳይ ኢታ ናጋራ ኦዶሶና፤ ኤንቲ ባንታዉ ዎርቃፈ ፆሰ መዶሶና።

³² ሽን ሀያና፥ ሀእ ኤንታ ናጋራ አቶ ያጋ። ሄስ ሀኖናባ ጊኮ፥ ነ አሳ ነ ፃፍዳ ማዝጋብያፐ ታ ሱን ቁቻ” ያግስ።

³³ ጎዳይ ዛሪድ ሙሰኮ፥ “ታኒ ታ ማዝጋብያፐ ቁቻና አሳ ሱንይ፥ ታ ቦላ ናጋራ ኦዳይሳታ ሱን።

³⁴ ሀእ ባዳ፥ ሀ አሳ ታኒ ነዉ ኦድዳ በሳ ካለ። ታ ኪታንቾይካ ነና ካለናይሳ አኬካ፥ ሽን ታኒ ሀ አሳ ኤንታ ናጋራ ግሾ ሴራና ዎደይ ያናይስ አተና” ያግስ።

³⁵ አሮን ዎርቃፈ ማራ ምስልያ መናዳ ኦዳይ አሳ ግድያ ግሾ፥ ጎዳይ አሳ ቦላ ዎልቃማ ጋዶ የድስ።