Kessa 30 - ጌሻ ማፃፋ

እፃነ ያርሽያ በሲ

¹ “እፃነ ጩይስያ በሳ ሶቃላ ምፈ መ።

² እያዉ ኦይዱ ማዛነይ ደኦ። አዱሳተይነ ጎምፓይ እስ እስ ዋ፥ ጌሳይ ናምኡ ዋ ግዶ። ኦይዱ ማዛንያን ደእያ ካጨት እያራ ኦይከትድ ኦሰቶና።

³ እያዉ ቦላ ባጋ፥ እያ ኦይዱ ማዛነታነ እያ ካጨታ ዋላህ ባይና ዎርቃን ላንፃ። እያ ዩሹዋካ ዎርቃን ላንፃ።

⁴ ናምኡ ዎርቃ ሳጋዮታ ኦዳ፥ ፃርጴዛ ቶካናዉ ማድያ ካሶ ምታ አናዉ ጎሳስ ናምኡ ባጋራ ኦይ።

⁵ ካሶ ምታ ሶቃላ ምፈ ከሳዳ፥ ኤንታ ዎርቃን ላንፃ።

⁶ ሄ እፃነ ያርሾ ፃርጴዛ፥ ጫቆ ታቦትያ ስንን ካቀትዳ ማጋራጁዋፈ ካረ ባጋራ ዎ። ያን ታኒ ኔራ ጋሄታና።

⁷ “አሮን ዎንታ ዎንታ ፆምፐታ ጊግሳናዉ ይያ ዎደ፥ ሳውያ እፃነ ያርሽያ በሳን ጩይሶ።

⁸ ሄሳዳ፥ አሮን ኦማርስ ፆምፐታ ፆምፕያ ዎደካ እፃነ ጩይሶ። ሄ እፃንያ ያርሾይ ያና ላይ ኡባን ጎዳ ስንን ጩዮ።

⁹ ሀ ያርሾ በሳን ሀራ ድገትዳ እፃነ፥ ካ ያርሾ፥ መሄ ያርሾነ ዎይነ ያርሾ ያርሾፋ።

¹⁰ አሮን፥ ናጋራ አቶተስ ላይፈ እስ ቶሆ ሹከትያ መህያ ሱፈ ኤክድ፥ ሄ ያርሾ በሳ ማዛነታ ቦላ ደእያ ካጨታ ዎድ ጌሾ ዎጋ ፖሎ። ሀ ዎጋይ ስንራ ያና ዎደ ኡባን ላይን ላይን ፖለቶ። ሄ ያርሾ በሳይ ጌሽ ግድያ ግሾ ጎዳስ ዱማትስ” ያግስ።

ናጋራ አቶተ ሚሸ

¹¹ ሄሳፈ ጉየ፥ ጎዳይ ሙሰኮ ሀይሳዳ ያግስ፤

¹² “ኔኒ እስራኤለ አሳ ታይብያ ዎደ፥ እስ እስ አስ ባ ሸምፑዋ ዎዛናዉ ጎዳስ ሚሸ ቃንፆ። ያትኮ ኔኒ ኤንታ ታይብያ ዎደ ጋዶይ ኤንታ ቦላ ዬና።

¹³ ታይቦን ገልያ አስ ኦንካ ሁጰን ሁጰን ጌሻ ዱንካነን ኤረትዳ ምዛነ ግናን ብራ ጭጎ። እስ እስ አስ ሄሳ ታዉ ያርሾ ኦድ እሞ።

¹⁴ ታይቦን ገልያ አስ ኦንካ ላይ ላታማነ እያፐ ቦላ ግድዳ ኡባይ ጎዳስ ሄሳ ኤሆ።

¹⁵ ኤንቲ ባንታ ሸምፑዋ ዎዛናዉ ጎዳስ እሞታ እምያ ዎደ፥ ዱረይካ ማንቆይካ እስ ግና እሞፈ አትሽን፥ ዱረይ ዳርስድ ዎይኮ ማንቆይ ጉድ እሞፎ።

¹⁶ ሄ ሚሽያ እስራኤለ አሳፐ ኤካዳ፥ ጌሻ ዱንካንያ ናጋናዉ ፔሻ። ሄ ሚሸይ ኤንታ ሸምፑዋ ዎዛናዉነ ታ ኤንታ ናጋና መላ ቆፍስያባ ግዳና” ያግስ።

ሜቻ ከረ

¹⁷ ጎዳይ ሙሰኮ ሀይሳዳ ያግስ፤

¹⁸ “ሜቻ ከርያነ እያ ቶሁዋ ናሰ ብራታፐ መ። እያን ሃ ትጋዳ ጌሻ ዱንካንያፐነ ያርሾ በሳፈ ግዶን ዎ።

¹⁹ አሮንነ እያ ናይት ባንታ ኩሽያነ ባንታ ቶሁዋ ያን ሜጨቶ።

²⁰ ኤንቲ ጌሻ ዱንካንያ ገላናፐነ ያርሾ ያርሻናፐ ስን ሄሳ ኦናዉ በሴስ። ሄሳ ኤንቲ ኦኮ ሀይቆፐ አቶሶና።

²¹ ኤንቲ ሀይቆና መላ፥ ባንታ ኩሽያነ ባንታ ቶሁዋ ሜጨታናዉ በሴስ። ሄስ አሮናስነ እያ ሼሻታስ፥ ይያ የለተ ኡባስ መርና ዎጋ ግዳና” ያግስ።

ሹማተ ዛይተ

²² ጎዳይ ሙሰኮ ሀይሳዳ ያግስ፤

²³ “ጌሻ ሳዎታ፥ ሄሳትካ፤ ኡሱፑን ክሎ ግራመ ጉክያ ካርበ፥ ሄ ክሎ ግራመ ሳውያ ቃራፋ፥ ሄ ክሎ ግራመ ሳውያ ማታ፥

²⁴ ኡሱፑን ክሎ ግራመ ቡርጉደ ኤካ። ሄ ኡባይካ ጌሻ ዱንካነን ኤረትዳ ምዛንያ ግና ግዶ። ሄሳታ ቦላ ኦይዱ ልትሮ ዛይተ ጉጃ።

²⁵ ሄሳታ ሽቶዳ ዋላካዳ፥ ሳውያ ጌሻ ዛይተ ኦዳ፥

²⁶ ጌሻ ዱንካንያነ ጫቆ ታቦትያ ትያ።

²⁷ ፃርጴዛነ እያ ሚሸታ፥ ፆምፐ ዎያ ኮጫነ እያ ሚሸታ፥ እፃነ ጩይስያ ፃርጴዛ፥

²⁸ ፁሳ ያርሾ በስነ እያን ቦላ ደእያ ሚሸታ ኡባ፥ ሜቻ ከርያነ እያ ቶሁዋ ትያ።

²⁹ ኤንቲ ፖሎ ጌሽ ግዳና መላ ኤንታ ዱማያ። ኤንታ ቦችያ ኦንካ ጌሽ ግዳና።

³⁰ “ሄሳፈ ጉየ፥ አሮንነ እያ ናይት ካህነ ግድድ ታዉ ሀጋዛና መላ ኤንታ ትያዳ ዱማያ።

³¹ እስራኤለ አሳስ፥ ‘ሀይስ ጌሻ ሹማተ ዛይተይ ይያ የለተስ ታና ሀጋዛናዉ ማድያ ዛይተ ግዶ።

³² ሄ ዛይትያ ጮ አሳ ቦላ ጉሶፋ፤ ቃስ አይ ዛይተካ እያ ኦዳ ኦግያን ኦፋ። ዛይተይ ጌሽ ግድዳ ግሾ፥ ህንተካ እያ ጌሻተ ኤርተ።

³³ ሄ ሽቱዋ ጊግስያ አስ፥ ዎይኮ ካህነ ግዶና ሀራ አስ ትይያ ኦንካ ታ አሳ ግዶፈ ህለቶ’ ያጋ” ያግስ።

እፃነ

³⁴ ጎዳይ ሙሰኮ ሀይሳዳ ያግስ፤ “ጌሻ ሳዎታ፥ ፆክያ ም ማደ፥  ኬን ደእያ ሽቶ፥ ሳውያ ማደነ ሳውያ እፃነ ኤካ፤ ኤንታ ኡባ ምዛነይ እስ ግና ግዶ።

³⁵ ሽቶዳ ዋላሄትዳ እፃነ ኦዳ ኤንታ ጎኤታ። ዋላህ ባይናነ ጌሽ ግዳና መላ እያን ማፅነ የጋ።

³⁶ እያፐ ጉራ ኤካዳ ሊቅሳ ጫዳዳ፥ ታኒ ኔራ ጋሄትያ ጌሻ ዱንካንያ ግዶን፥ ጫቆ ታቦትያ ስንን ዉርፃ። ሄ እፃነይ ነዉ ፖሎ ጌሽ ግዶ።

³⁷ ህንተዉ ጎኤታናዉ ሄ እፃንያ አይ ኦገንካ ጊግሶፕተ። ሄስ ታዉ ዱማትዳይሳ ግደይሳ ኤርተ።

³⁸ ሄሳ ኦድ፥ እያ ሳዉዋ ስንግድ ኡፋይታናዉ ኮይያ ኦንካ፥ ታ አሳ ግዶፈ ያና” ያግስ።