Kessa 3 - ጌሻ ማፃፋ

ሙሰ ፄገተ

¹ እስ ዎደ ሙሰይ ምድያመ ቢታ ካህንያ፥ ባ ቦሉዋ ዮቶራ ዶርሳነ ዴሻ ሄሜስ። እ ሄ ዉድያ ላግ ኤክድ መላ ቢታ ጋፃን ፆሳ ዙማ ጌተትድ ፄገትያ ኮሬባ ዙማ ቦላ ኤፍስ።

² ሄ በሳን ጎዳ ኪታንቾይ ቱሽያን ኤፅያ ታማ ላጩዋ ግዶን እያዉ በንትስ። ሙሰይ ቱሸይ ታማን ኦይከትንካ ታማይ ቱሽያ ሞናይሳ በእድ፥

³ “ታኒ ይያ ባዳ፥ ቱሸይ አይስ ታማን ሜተቶናኮ ሄ ኦራባ ሺቃዳ በአና” ግድ ቆፕስ።

⁴ እ በአናዉ ሺቅዳይሳ ጎዳይ በእድ፥ ቱሽያ ግዶፈ፥ “ሙሰ! ሙሰ!” ግድ ፄግስ። ሙሰይ፥ “ሄኮ፥ አበ ጎዳዉ” ግድ ኮይስ።

⁵ ፆሳይ እያኮ፥ “ሃ ሺቆፓ። ኔኒ ኤቅዳ ቢታይ ጌሽ ግድያ ግሾ፥ ነ ቶሁዋን ደእያ ጫማ ከሳ” ያግስ።

⁶ ጎዳይ እያኮ፥ “ታኒ ነ አዋታ፥ አብራሃመ፥ ይሳቃነ ያይቆባ ፆሳ” ያግስ። ሙሰይ ፆሳ ባአናዉ ያይዳ ግሾ፥ ባ ሶምኡዋ ካምስ።

⁷ ጎዳይ ቃስካ ሀይሳዳ ያግስ፤ “ታኒ ግብፀን ደእያ ታ አሳይ አይ መላ ዋያኮ በአስ። ኤንቲ ባንታና ኡንኤድ ሃረይሳታፐ አሻና መላ ታኮ ዋስያ ዋሱዋ ስአስ። ኤንታ ዋያካ ኤራይስ።

⁸ ሄሳ ግሾ፥ ታኒ ኤንታ ግብፀ አሳ ኩሸፐ አሻናዉነ ሄ ቢታፈ ኤንታ ከሳዳ፥ ሀእ ካናነት፥ ህተት፥ አሞረት፥ ፓርዘት፥ ህወትነ ያቡሰት ደእያ ቢታ፥ ማነ ኤስ ኩምዳ ሎኦ ቢታ ኤሀናዉ ዎስ።

⁹ ታ ደርያ ዋሶይ ሀእ ታና ጋክስ። ግብፀ አሳት ኤንታ ቆህዳ ቆሁዋ ታኒ በአስ።

¹⁰ ሄሳ ግሾ ሀእ ኔኒ ታ አሳ እያ ቢታፈ ከሳና መላ ግብፀ ካዋኮ ታኒ ነና ኪታይስ” ያግስ።

¹¹ ሽን ሙሰይ፥ “ካዋኮ ባናዉነ እስራኤለታ ግብፀፈ ከሳናዉ ታኒ ኦኔ?” ያግስ።

¹² ፆሳይ ዛሪድ፥ “ታኒ ኔራ ግዳና። ቃስ ታኒ ነና ኪትዳይሳስ ማላይ ሀይሳ፤ ኔኒ ታ አሳ ግብፀፈ ከስያ ዎደ ሀ ዙማ ቦላ ህንተ ታና ጎይናና” ያግስ።

¹³ ሙሰይ ፆሳኮ፥ “ግዶሽን፥ ታኒ እስራኤለታኮ ባዳ ኤንታኮ፥ ‘ህንተ አዋታ ፆሳይ ታና ህንተኮ ኪትስ’ ያግኮ፥ ኤንቲ ታና፥ ‘እያ ሱንይ ኦኔ?’ ያግድ ኦይችኮ፥ ታኒ ኤንታዉ ዎይጋዳ ዛሮ” ያግስ።

¹⁴ “ፆሳይ ሙሰኮ፥ ‘ደኤይስነ ዳናይስ፥ ታና’ ኔኒ እስራኤለታኮ፥ ‘ታን ታና ግድዳይስ’ ታና ህንተኮ ክትስ ያጋ” ያግስ።

¹⁵ ፆሳይ ዛሪድ፥ “ኔኒ እስራኤለታ ጎዳይ ህንተ አዋታ፥ አብራሃመ፥ ይሳቃነ ያይቆባ ፆሳይ፥ ታና ህንተኮ ኪትስ። ሀይስ ታ መርና ሱን፤ ያና የለተ ኡባይ ሀ ሱንን ታና ፄጋና።

¹⁶ “ባዳ እስራኤለ ጭማታ ሺሻዳ፥ ጎዳይ ህንተ አዋታ ፆሳይ፥ አብራሃመ፥ ይሳቃነ ያይቆባ ፆሳይ ነዉ ቆንጭዳይሳ ኦዳ። ግብፀን ኤንቲ ዋየትያ ዋይያ ታኒ ፆሞሳዳ በእዳይሳ ኤንታዉ ኦዳ።

¹⁷ ታኒ ኤንታና ግብፀ ዋያፐ ከሳዳ ማነ ኤስ ኩምዳ፥ ካናነታ፥ ህተታ፥ አሞረታ፥ ፓርዘታ፥ ህወታነ ያቡሰታ ቢታ ኤፋናዉ ቃላ ገላስ።

¹⁸ “እስራኤለ ጭማት ነ ግያባ ስአና። ሄሳፈ ጉየ ኔንነ እስራኤለ ጭማት ግብፀ ካዋኮ ብድ፥ ‘ጎዳይ፥ እብራወታ ፆሳይ፥ ኑስ ቆንጭስ። ሀእ ኑኒ ሄ ጋላሳ ኦገ መላ ቢታ ብድ፥ ጎዳስ፥ ኑ ፆሳስ ያርሾ ያርሻና መላ ኑና የዳ’ ያግተ።

¹⁹ ሽን ዎልቃን ግዶና እፅኮ፥ ግብፀ ካዎይ ህንተና የዶናይሳ ታኒ ኤራይስ።

²⁰ ሄሳ ግሾ ታኒ ታ ዎልቃን ዱማ ዱማ ማላታታ ኦዳ ግብፀታ ሾጫና። ሄሳፈ ጉየ እ ህንተና የዳና።

²¹ “ቃስ ታኒ ግብፀ አሳ ስንን ቴሞ ህንተዉ እማና። ያንያ ግሾ ህንተ ከይያ ዎደ መላ ኩሸ ከየከታ።

²² እብራወ ማጫስ ኡባይ ባ ሾሮን ደእያ ግብፀ ማጫሳኮነ ባ ሶን ደእያ ግብፀ ማጫሳኮ ብድ፥ ብራ አሌቆ፥ ዎርቃነ ማኦ እምተ ግድ ኦይቻና። ህንተ ሄሳ ኤክድ ህንተ ናይታ ማይዛና። ሄሳዳ ኦድ ህንተ ግብፀ ሻሎ ኡባ ኤክድ ባና” ያግስ።