Kessa 26 - ጌሻ ማፃፋ

ጌሻ ዱንካነ

¹ “ዱንካንያ ጋ ባጋስ አልኦ ሊኖፐ ኦሰትዳ፥ ታሙ ገሸ ጊግሳ። ኤንታ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ ክሩበታ ምስልያራ አሌቅሳ።

² ገሸት ኡባይ እስ ልከ ግዶ፤ አዱሳተይ ላታማነ ኦይዳ፥ ጎምፓይ ቃስ ኦይዱ ዋ ግዶ።

³ እቻሹ ገሸታ እስፈ ጋዳ ስካ፤ ሀንኮ አትዳ እቻሻታ ሄሳዳ ኦ።

⁴ እስፈ ጋሄትድ ስከትዳ ናምኡ ገሸታስ እሱዋ እሱዋ ጋፃን ካሎሰ አፍላፐ ኦሰትዳ ሳጋዮታ ኦ።

⁵ እስፈ ስከትዳ ኮይሮ ማጋራጁዋ ቦላ ኮይሮ ማራን ካሎሰ አፍላፐ ኦሰትዳ እሻታሙ ሳጋዮታ ኦ፤ ሄሳዳካ ናምአን ማጋራጁዋ ቦላ ዉርሰ ጋፃን እሻታሙ ሳጋዮታ ኦ።

⁶ ጌሻ ዱንካነይ እስኖ ግዳና መላ ናምኡን ሻከት ስከትዳ ገሸታ ዎል ጋድ ኦይሰናዉ፥ እሻታሙ ዎርቃፈ ኦሰትዳ ኦይክያባታ ኦ።

⁷ “ጌሻ ዱንካንያ ቦላራ ካማና መላ ታማነ እስ ገሸታ ዴሻ እክሰፐ ኦ።

⁸ ታማነ እስ ገሸት እስ ግና ግዶ፤ እስ እስ ማጋራጁዋ አዱሳተይ ሀስታሙ ዋ፥ ጎምፓይ ኦይዱ ዋ ግዶ።

⁹ እቻሹ ገሸታ እስ ባጋራ፥ ኡሱፑን ገሸታ ሀንኮ ባጋራ ጋዳ ስካ። ኡሱፑን ማጋራጆይ ዳኮየትድ፥ ዱንካንያስ ስን ባጋራ ዳቡለቶ።

¹⁰ ዎል ጋ ስክዳ ገሸታፐ እስ ማጋራጁዋስ ማጫራ ቦላ እሻታሙ ሳጋዮታ ኦ፤ ቃስ ሀንኮ ማጋራጁዋስ ማጫራ ቦላ እሻታሙ ሳጋዮታ ኦ።

¹¹ ናምኡን ሻከት ስከትዳ ገሸት እስ ካማ ግዳና መላ እሻታሙ ናሰ ብራታፐ ኦሰትዳ ኦይክያባታ ኦ።

¹² ሄ ዱንካንያ ገሸታፐ ፓላህዳ ባጋ ኤካዳ ጌሻ ዱንካንያስ ጉየ ባጋራ ካቃ።

¹³ ዱንካንያ ገሸታፐ አዱሳተ ባጋራ ፓላህዳ ጎምፓይ እስ እስ ዋ ግድዳ ገሸታ ጌሻ ዱንካንያስ ናምኡ ባጋራ ካቃ።

¹⁴ “ዱንካንያስ ቦላ ባጋራ ዳቡልድ ካማናዉ ዞኦ ቃላመን ትየትዳ ማራዘ እተነ ሎኦ ዶአ እተ ኦ።

¹⁵ ጌሻ ዱንካንያ ቱቀታ ሶቃላ ምፈ ኦ።

¹⁶ እስ እስ ቱቅያ አዱሳተይ ታሙ ዋ፥ ጎምፓይ እስ ዋነ ባጋ ግዶ።

¹⁷ ናምኡ ቱቀት እስፈ ኦይከታና መላ እስ እስ ቱቅያስ ኦይሰያባይ ደኦ። ጌሻ ዱንካንያ ቱቀታ ኡባ ሄሳዳ ኦ።

¹⁸ ጌሻ ዱንካንያ ዉሎሀ ባጋራ ላታሙ ቱቀታ ኦ።

¹⁹ ኤንታና ኤሳናዉ ኤንታ ጋርሳን ብራ ብራታፐ ኦሰትዳ ኦይታሙ ሉሆይ ደእያ ቶሆታ ኦ። እስ እስ ቱቅያስ ናምኡ ናምኡ ቶሆ ከሳ።

²⁰ ጌሻ ዱንካንያ ፑደሀ ባጋራ ላታሙ ቱቀታ ኦ።

²¹ ኤንታና ኤሳናዉ ኤንታ ጋርሳን ብራ ብራታፐ ኦሰትዳ ኦይታሙ ሉሆይ ደእያ ቶሆታ ኦ። እስ እስ ቱቅያስ ናምኡ ናምኡ ቶሆ ከሳ።

²² ጌሻ ዱንካንያስ ጉየራ ዉሎሀ ባጋራ ኡሱፑን ቱቀታ ኦ።

²³ ጉየ ባጋራ ደእያ ማዛነታስ ናምኡ ቱቀታ ኦ።

²⁴ ሄ ማዛንያን ደእያ ቱቀት ቶሆፐ ሁጰ ጋካናዉ ኦይከቶ። ናምኡ ማዛነታ መያ ናምኡ ቱቀታ ሄሳ ኦሰታናዉ በሴስ።

²⁵ ሄሳዳካ ናምኡ ናምኡ ቶሆይ ደእያ ሆስፑን ቱቀታ ኦዳ፥ ኤንታዉ ብራ ብራታፐ ኦሰትዳ ታማነ ኡሱፑን ሉሆይ ደእያ ቶሆታ ኦ።

²⁶ “ቱኡቀታ ሳድ ኦይያ ሶቃላ ምፈ ኦሰትዳ ታማነ እቻሹ ልዮታ ከሳ። ኤንታፈ እቻሻታ ጌሻ ዱንካንያስ እስ ባጋ ምየን ደእያ ቱቀታስ፥

²⁷ ቃስ እቻሻታ ሀንኮ ባጋ ምየን ደእያ ቱቀታስ፥ ሄሳዳካ አትዳ እቻሻታ ዉሎሀ ባጋን ደእያ ቱቀታስ ኦ።

²⁸ ሀ ጋፃ ቱቅያፐነ ያ ጋፃ ቱቅያፐ ይያ ልዮት ግዶ ቱቅያራ ኦይከቶ።

²⁹ ቱኡቀታ ዎርቃን ላንፃ፤ ልዮታ ኦይካናዉ ማድያ ሳጋዮታ ዎርቃፈ ኦ፤ ቃስ ልዮታ ዎርቃን ላንፃ።

³⁰ ጌሻ ዱንካንያ ዙማ ቦላ ታ ነና በስዳይሳዳ ኦ።

³¹ “አልኦ ሊኖፐ እስ ማጋራጆ ኦዳ፥ እያ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ ክሩበታ ምስለን አሌቅሳ።

³² እያ ሶቃላ ምፈ ኦዳ፥ ዎርቃን ሜሸትዳ ኮጫታንነ ብራ ብራታፐ ኦሰትዳ ኦይዱ ቶሆይ ደእያ ቱሳታ ቦላ ካቃ።

³³ ሄ ማጋራጁዋ ጌሻ ዱንካንያስ ካራን ደእያ ቃጰታፐ ጋርሳን ካቃ። ያታዳ ህገይ ፃፈትዳ ናምኡ ሎቸ ሹቻታ ኦይክዳ ጫቆ ታቦትያ ማጋራጁዋስ ጉየ ባጋን ዎ። ሄ ገሸይ፥ ጌሻ በሳነ ኡባፈ ጌሻ በሳፈ ሻኬስ።

³⁴ ናጋራ አቶተ ካማን ጫቆ ታቦትያ ካማ።

³⁵ ፃርጴዛ፥ ኡባፈ ጌሻ በሳፈ ካረራ፥ ጌሻ ዱንካንያፐ ፑደሀ ባጋን ዎ፤ ፆምፐ ዎያ ኮጫ ዱገሀ ባጋራ ዎ።

³⁶ “ዱንካንያ ፐንገ ማጋራጁዋ፥ አልኦ ሊኖፐ ጊግሳዳ፥ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ አሌቅሳ።

³⁷ ማጋራጁዋስ እቻሹ ቱሳታ ሶቃላ ምፈ ኦዳ ዎርቃን ላንፃ፤ ኮጫትካ ዎርቃፈ ኦሰትዳይሳታ ግዶ። ቱሳታስ ናሰ ብራታፐ እቻሹ ቶሆታ ጊግሳ።”