Kessa 20 - ጌሻ ማፃፋ

ታሙ ኪታታ

¹ ፆሳይ እስራኤለ አሳኮ ሀይሳዳ ያግስ፤

² “ነና ግብፀፈ አይለተፈ ከስዳ ጎዳይ ነ ፆሳይ ታና።

³ “ታፐ አትሽን፥ ሀራ ፆሰ ጎይኖፋ።

⁴ “ቦላ ሳሉዋን ደእያባ፥ ዎይኮ ጋርሳ ሳአን ደእያባ፥ ዎይኮ ሳአፐ ጋርሳን ሃ ግዶን ደእያባ አይባካ ነዉ ጎይንያ ኤቃ ዳንሳዳ ኦፋ።

⁵ ኤንታዉ ሆኮፋ ዎይኮ ኤንታ ጎይኖፋ። አይስ ጊኮ፥ ታኒ፥ ጎዳይ ነ ፆሳይ፥ ታ ቦንቹዋ ሀራ ፆሳታራ ኮፆና ፆሰ። ታና እፅያ አዋታ ናጋራ ግሾ ናይታ ሄን ዎይኮ ኦይዳን የለተ ጋካናዉ ሀንቃና።

⁶ ሽን ታና ሲቀይሳታነ ታ ኪታ ናገይሳታ ሼሻ ሙኩሉ የለተ ጋካናዉ ኬሀና።

⁷ “ፆሳ ነ ጎዳ ሱን ሀዳን ደንፋ። ጎዳይ ባ ሱን ሀዳን ደንይሳታ ሴሮና አገና።

⁸ “ሳምባታ ጌሻ ጋላስ ኦዳ ናጋ።

⁹ ኔኒ ኦሶ ኦናዉ በሲያ ኡሱፑን ጋላሳት ደኦሶና።

¹⁰ ሽን ላፑን ጋላሳይ ኔኒ ጎዳ ቦንችያ ሸምፖ ጋላስ። ሄ ጋላሳን አይባ ኦሶካ ኦፋ። ኔኒ፥ ዎይኮ ነ ናይት፥ ዎይኮ ነ አይለት፥ ዎይኮ ነ መሄይ፥ ዎይኮ ነ ቢታን ደእያ አሳ ጋደ አሳት ሄ ጋላሳን ኦሶ ኦፍተ።

¹¹ ኡሱፑን ጋላሳ ግዶን ጎዳይ ሳሎታ፥ ሳኣ፥ አባነ ኤንታ ግዶን ደእያ ኡባ መስ፥ ሽን ላፑን ጋላሳን ሸምፕስ። ሄሳ ግሾ ጎዳይ ሳምባታ ጋላሳ አንጅስነ ዱማይስ።

¹² “ጎዳይ ነ ፆሳይ ነዉ እምያ ቢታን ነ ላይይ አዱቃና መላ ነ አዋነ ነ አይዉ ቦንቻ።

¹³ “አሳ ዎፓ።

¹⁴ “ላሞፋ።

¹⁵ “ካይሶቶፓ።

¹⁶ “ነ ላግያ ቦላ ዎርዶ ማርካቶፋ።

¹⁷ “ነ ላግያ ኬ አሞቶፋ። ነ ላግያ ማችዉ፥ ዎይኮ እያ አይለታ፥ ዎይኮ እያ መህያ፥ ዎይኮ እያ ሀርያ፥ ዎይኮ እያዉ ደእያባ አይባካ አሞቶፋ” ያግስ።

¹⁸ አሳ ኡባይ ደሾይ ደቸይሳነ ሞይዘይ ፑነተይሳ ስእድ፥ ዎልአንይ ዎልአመይሳነ ደረይ ጩየይሳ በእድ ያሻን ኮኮርሸ ሃሆን ኤቅዶሶና።

¹⁹ ኤንቲ ሙሰኮ፥ “ኔኒ ኑስ ኦዳ፤ ኑኒ ስአና። ሽን ኑኒ ሀይቆና መላ ፆሳይ ኑስ ኦዶፖ” ያግዶሶና።

²⁰ ሙሰይ አሳኮ፥ “ያዮፍተ፤ ፆሳይ ህንተና ፓጫናዉነ ህንተ እያዉ ኪተትድ ናጋራ ኦና መላ እ ይስ” ያግስ።

²¹ አሳይ ባንታ ደእያሱዋን ሃክድ ኤቅዳሽን፥ ፆሳይ ደእያሱዋ ሙምዳ ሻራኮ ሙሰይ ሺቅስ።

ያርሾ በሳታነ ኤቃታ

²² ሄሳፈ ጉየ፥ ጎዳይ ሙሰኮ “እስራኤለ አሳስ ሀይሳዳ ያጋዳ ኦዳ፤ ‘ሳሎፐ ታኒ ህንተዉ ኦድሽን ህንተ ታና ህንተ ሁጰን በእደታ።

²³ ያንያ ግሾ፥ ብራ ኤቃ ዎይኮ ዎርቃ ኤቃ ህንተዉ ኦድ ታ ቦላ ጉጅድ ጎይኖፍተ።

²⁴ ነን ታዉ ያርሾ በሲ ኡርቃፈ ጊግሳ። ነ ዶርሳታፐነ ነ ቦራታፐ ኤካዳ ፁሳ ያርሾነ እስፈተ ያርሾ እያ ቦላ ያርሻ። ህንተ ታና ጎይናና መላ ታኒ ዶርዳ በሳ ኡባን ህንተኮ ያዳ ህንተና አንጃና።

²⁵ ህንተ ታዉ ያርሾ በሲ ሹቻፈ ኬፅያባ ግድኮ ማሰትዳ ሹቻፈ ኬፆፋ። ኔኒ ማስያ ሚሸን እያ ቦችኮ ቱንሳሳ።

²⁶ ህንተ ከይሸ ካሎቶና መላ ታዉ ያርሾ በሲ ኮዶራ ከይያ በሳን ኬፆፋ’ ” ያግስ።