Kessa 18 - ጌሻ ማፃፋ

ዮቶር ሙሰ ፆሞሱዋ

¹ ምድያመ ቢታ ካህነይ፥ ሙሰ ቦሎይ ዮቶር፥ ጎዳይ ሙሰስነ ባ አሳ እስራኤለታስ ኦዳባነ ኤንታና ግብፀፈ ከስዳባ ስእስ።

² ሄ ዎደ ሙሰ ቦሎይ ዮቶር፥ እያ ማታን ሙሰይ አግድ ብዳ እያ ማችዉ ስፖሮነ፥

³ እ ናምኡ ናይታ ኤክድ ይስ። ሙሰይ፥ “ታኒ አላጋ ቢታን በተ አስ ግዳስ” ግድ ባይራ ናኣ ገርሳማ ግድ ሱንስ።

⁴ ካሉዋ ቃስ፥ “ታ አዋ ፆሳይ፥ ታና ግብፀ ካዉዋ ማሻፈ አሽስ” ግድ አላዛራ ግድ ሱንስ።

⁵ ሙሰ ቦሎይ ዮቶር፥ እያ ማችዉነ እ አደ ናይታ ባራ ኤክድ፥ መላ ቢታን፥ ፆሳ ዙማ ማታን ደእያ ሙሰኮ ይስ።

⁶ እ ባንታ ዩሳ ኤርሳናዉ ሙሰኮ ኪትስ።

⁷ ሄሳ ግሾ፥ ሙሰይ ባ ቦሉዋ ሞካናዉ ከይድ፥ እያ ዝግ ሳሮድ እያ ዬርስ። ኤንቲ እሶይ እሱዋ ሳሮ ስሚድ ሙሰ ዱንካንያ ግዶ ገልዶሶና።

⁸ ጎዳይ እስራኤለታ አሻናዉ ግብፀ አሳ ቦላነ ኤንታ ካዉዋ ቦላ ኦዳባ ኡባነ ኦገን ኤንታ ጋክዳ መቱዋ ኡባን ጎዳይ ዋት ማድዳኮ ሙሰይ ባ ቦሉዋስ ኦድስ።

⁹ ዮቶር ጎዳይ እስራኤለ አሳ ግብፀታ ኩሸፐ አሻናዉ ኦዳ ሎኦ ኦሶታባ ስእድ ኡፋይትስ።

¹⁰ እ፥ “ህንተና ግብፀታፐ ኤንታ ካዉዋ ኩሽያፐ አሽድ፥ ግብፀ አይለተፈ ከስዳ ጎዳይ፥ እ ጋላተቶ።

¹¹ ኦቶሮን ኤንታ ቦላ ኢታባ ኦዳ ግብፀታፐ እስራኤለታ አሻናዉ ሄሳ ኦዳ ግሾ፥ ጎዳይ ፆሳታ ኡባፈ ግታ ግደይሳ ታኒ ሀእ ኤራስ” ያግስ።

¹² ሄሳፈ ጉየ ዮቶር፥ ሙሰ ቦሎይ፥ ፁሳ ያርሾነ ሀራ ያርሾ ፆሳስ ያርሽስ። አሮንነ እስራኤለ ጭማት ኡባይ ፆሳ ስንን እያራ ጌሻ ካ ማናዉ ይዶሶና።

¹³ ዎንተ ጋላስ ሙሰይ አሳስ ፕርዳናዉ ኡትስ። አሳይ ሙሰ ዩሹዋን ዎንታፈ ኦማርስ ጋካናዉ ኤቅድ ደኤስ።

¹⁴ ሙሰ ቦሎይ ሙሰይ አሳስ ኦይሳ ኡባ በእድ፥ “ኔኒ ነ ፃላላ ሀይሳ አይስ ኦይ? አሳይ ዎንታፈ ኦማርስ ጋካናዉ ነ ዩሹዋን ኤሳዳ አይስ ነርካ ኦይ?” ያግስ።

¹⁵ ሙሰይ ባ ቦሉዋኮ፥ “አሳይ ፆሳ ሸንያ ኦይቻናዉ ኮይድ ታኮ ይያ ግሾሳ።

¹⁶ ኤንታ ግዶን ኦድ ደእኮ ታኮ ዮሶና። ታ ኤንታ ግዶን ባልነ ቱም ኦነኮ ሻካይስ፤ ፆሳ ኪታነ ህግያ ኤንታዉ ኦዳይስ” ያግስ።

¹⁷ ሙሰ ቦሎይ፥ “ሀይስ ነ ኦይስ ሎኦ ግደና።

¹⁸ ነካ ኔኮ ይያ አሳ ኡባይ ዳቡረታ። ሀ ኦሶይ እስ አሳፐ ዳሮ ግድያ ግሾ፥ ኔኒ ነርካ ኦናዉ ዳንዳአካ።

¹⁹ ሀእ ታኒ ነና ዞረይሳ ስአ፤ ፆሳይ ኔራ ግዳና። ኔኒ ሀ አሳ በሳን ግዳዳ ኤንታባ ፆሳስ ኦዳ።

²⁰ ፆሳ ኪታነ ህግያ ኤንታ ታማርሳ። ኤንቲ ዋን ዳነኮነ አይ ኦነኮ ኤንታ በሳ።

²¹ ቃስ አሳ ግዶን ኦዳ ሻክድ ኤርያ አሳታ፥ ፆሳ ያየይሳታ፥ አማንይሳታነ ዎፈ ኤኮናይሳት ዶራ። ኤንታና አሳ ቦላ ሻላቃታ፥ ማቶ ሀላቃታ፥ ሀምሳላቃታነ አስራላቃታ ኦዳ ሹማ።

²² ኤንቲ ኡባ ዎደ ካዉሻ ኦዳታ ባንታዉ ፕርዶ፥ ሽን ዴፆ ኦዳታ ኔኮ ኤሆ። ሄሳዳ ነ ኦኮ ቶሆይ ነዉ ካዉያና።

²³ ነ ኦና መላ ፆሲ ኮየይ ሄሳ። ቃስ ነ ዳቡራካ ሀ አሳ ኡባይ ባ አላለይ ፖለትን ባ ሶ ባ ሶ ስማና” ያግስ።

²⁴ ሙሰይ ዮቶራ ዞርያ ስእስ፤ እ ግዳባ ኡባ ኦስ።

²⁵ ሙሰይ እስራኤለታ ግዶፈ ኦዳ ሻክ ኤርያ አሳታ ዶርስ። ኤንታና አሳ ቦላ ሻላቃታ፥ ማቶ ሀላቃታ፥ ሀምሳላቃታነ አስራላቃታ ኦድ ሹምስ።

²⁶ ሹማት ካዉሻ ኦዳታ ባንታዉ ፕርድዶሶና፥ ሽን ዴፆ ኦዳታ ሙሰኮ ኤሆሶና።

²⁷ ሄሳፈ ጉየ ሙሰይ ባ ቦሉዋ ሞይዝን፥ እ ባ ቢታ ስምስ።