Kessa 17 - ጌሻ ማፃፋ

ዛላፈ ፑልትዳ ሃ

¹ እስራኤለ አሳ ኡባይ ጎዳይ ኪትዳይሳዳ እስ በሳፈ ሀራ በሲ ዩይሸ፥ ሲን መላ ቢታፈ ደንድድ ራፍድማ ጌተትያ በሳን ኡትዶሶና። ሽን ኤንቲ ኡያናዉ ሃ ሄ በሳን ይስ።

² ኤንቲ፥ “ኑስ ኡያናዉ ሃ እማ” ያግድ ሙሰራ ካጨትዶሶና። ሙሰይ ዛሪድ፥ “ህንተ ታራ አይስ ካጨቴቲ? ጎዳ አይስ ፓጨቲ?” ያግስ።

³ ሽን አሳይ ያን ሃ ሳሞትድ፥ “ኔኒ ኑና፥ ኑ ናይታነ ኑ መህያ ሳሞን ዎናዉ ግብፀፈ ከሳዳ ሀይሳ አይስ ኤሀዲ?” ያግድ ሙሰ ቦላ ዛር ዛር ዙዙምዶሶና።

⁴ ያትን ሙሰይ፥ “ታኒ ሀ አሳ ዋቶ? ኤንቲ ታና ሹቻን ጫዳና ሀኖሶና” ያግድ ጎዳ ዎስስ።

⁵ ጎዳይ ሙሰኮ፥ “ኔኒ እስራኤለ አሳፐ ጭማታ ኔራ ኤካዳ አሳፐ ስን አዳ ሄመታ። ቃስ ናይለ ሻፋ ሾጭዳ ፃምኣ ነ ኩሸን ኦይካዳ ባ።

⁶ ታኒ ኮሬባ ዙማን ዛላ ቦላ ነ ስንን ኤቃና። ሄ ዛላ ሾጫ፤ አሳይ ኡያና ሃይ እያፐ ከያና” ያግስ። ሙሰይ እስራኤለ ጭማታ ስንን ሄሳ ኦስ።

⁷ እስራኤለት፥ “ቱማ ጎዳይ ኑራ ደኢ?” ያግድ ዙዙምዳ ግሾነ ጎዳ ፓጭዳ ግሾ ሄ በሳ ማሳሀነ ማርባ ግድ ሱንስ።

እስራኤለነ አማለቃ ኦላ

⁸ አማለቃት ይድ ራፍድማን እስራኤለታ ኦልዶሶና።

⁹ ሙሰ እያሱኮ፥ “ኔኒ ዎንቶ አማለቃታ ኦላናዉ ጉ አስ ዶራ። ታኒ ፆሳ ፃምኣ ኦይካዳ ዙማ ሁጰን ኤቃና” ያግስ።

¹⁰ ሙሰይ ኪትዳይሳዳ እያሱይ አማለቃታ ኦልስ። ሙሰይ፥ አሮንነ ሆር ዙማ ሁጰ ከይዶሶና።

¹¹ ሙሰይ ባ ኩሽያ ደንድ ጋምእያ ዎደ እስራኤለት ፆኖሶና፥ ሽን እ ባ ኩሽያ ዎያ ዎደ አማለቃት ፆኖሶና።

¹² ሙሰ ኩሸይ አርጋጭዳ ዎደ አሮናራነ ሁራራ ሹች ኤህድ ሙሰ እያ ቦላ ኡትስዶሶና። አሮንነ ሁር ኡሻቻራነ ሀድርሳራ ኤቅድ አዋይ ዉላና ጋካናዉ እያ ኩሽያ ካትስ ኦይክዶሶና።

¹³ ሄሳዳ ኦድ እያሱይ አማለቃታ ማሻን ኦልድ ይስስ።

¹⁴ ሄሳፈ ጉየ ጎዳይ ሙሰኮ፥ “ሀይስ ኡባ ዎደ ሀሳየታና መላ ሀ ፆኑዋ ታርክያ ፃፋ። ታኒ አማለቃታ ቡርፆራ ይሳናይሳነ ኤንቲ ዶገታናይሳ እያሱስ ኦዳ” ያግስ።

¹⁵ ሙሰይ ያርሾ በሲ ጊግስድ፥ “ጎዳይ ታ ፆኑዋ ባንድራ” ግድ ሱንስ።

¹⁶ እ፥ “ጎዳ ፆኖ ባንድራ ቁ ኦድ ኦይክተ። ጎዳይ አማለቃታ መርናዉ ኦላና” ያግስ።