Kessa 1 - ጌሻ ማፃፋ

እስራኤለ አሳ ኡንኤተ

¹ ባንታ ሶ አሳ ኡባ ኤክድ፥ ያይቆባራ ግብፀ ብዳ እስራኤለ አደ ናይታ ሱንይ ሀይሳፈ ካልድ ፃፈትዳይሳ፤

² ኤንትካ ሮቤላ፥ ስሞና፥ ሌወ፥ ይሁዳ፥

³ ይሳኮራ፥ ዛብሎና፥ ብንያመ፥

⁴ ዳነ፥ ንፍታለመ፥ ጋደነ አሴራ።

⁵ ያይቆባ ሼሻት ኡባይ ላፑን ታማ። ዮሰፍ ካሰካ ግብፀን ደኤስ።

⁶ ዎደፐ ጉየን ዮሰፍ፥ እያ እሻትነ ሄ የለተ ኡባይ ሀይቅዶሶና።

⁷ ሽን እስራኤለ ሼሻይ የለትድ ግብፀ ቢታ ኩማና ጋካናዉ ታይቦን ዳርዶሶናነ ምንዶሶና።

⁸ ሄሳፈ ጉየ፥ ዮሰፋ ኤሮና ሀራ ካዎይ ግብፀ ቢታን ካዎትስ።

⁹ ሄ ካዎይ ባ አሳ፥ “ሄኮ፥ ሀ እስራኤለት ኑፐ አድ የለተንነ ዎልቃን ዳርዶሶና።

¹⁰ ኑኒ ሂላቶና እፅኮ ኤንቲ ታይቦን ካሰይሳፈ ሃ ዳራና። ቆፖና ኦል ደንድኮ ኤንቲ ኑ ሞርከታራ እስፍድ ኑና ኦልድ፥ ቢታ የግድ ባናዉ ዳንዳኦሶና” ያግስ።

¹¹ ሄሳ ግሾ ዴፆ ኦሶን ኤንታ ኡንኤና መላ ኤንታ ቦላ ኢታ ካፖታ ዎዶሶና። ኤንቲ ፕቶማነ ራምሰ ጌተትያ ሻሎ ዎያ ካታማታ ካዋስ ኬፅዶሶና።

¹² ሽን ግብፀት ኤንታ ዳርስ ኡንኤንካ ኤንቲ ሃ ዳርድ የለትዶሶናነ ቢታ ጋክዶሶና። ግብፀት እስራኤለታ እፅዳ ግሾ ያይዶሶና።

¹³ ኤንታና ኢታ ኦሶ ኦስስዶሶና።

¹⁴ ኡርቃ የሶን፥ ስምንቶን ፁበ መን ቃስ ጋደ ኦስሶን ኤንታ ደኡዋ ጫምስዶሶና። ቃይ ባይና ዴፆ ኦሶ ኡባ ኤንታ ኦስስዶሶና።

¹⁵ ግብፀ ካዎይ ቃን እብራወ ማጫሳታ ኡሎ ፕትያ ስፖሮነ ፑሆ ጌተትያ ናምኡ ማጫሳታኮ ሀይሳዳ ያግስ፤

¹⁶ “እብራወ ማጫሳት የልያ ዎደ የለትዳ ናአይ አደ ግድኮ ዎተ፥ ሽን ማጫ ግድኮ ፓፃ አግተ” ያግስ።

¹⁷ ሽን ኡሎ ፕተይሳት ፆሰ ባቢድ፥ ግብፀ ካዎይ ኪትዳይሳዳ ኦቦኮና። ኤንቲ አደ ናይታ ፓፃ አግዶሶና።

¹⁸ ሄሳፈ ጉየ፥ ግብፀ ካዎይ ሄ ኡሎ ፕተይሳታ ፄግድ፥ “ህንተ አይስ ሀይሳ ኦደቲ? አደ ናይታ አይስ ፓፃ አገቲ?” ያግድ ኤንታ ኦይችስ።

¹⁹ ኡሎ ፕተይሳት ዛሪድ፥ “እብራወ ማጫሳት ግብፀ ማጫሳታ መላ ግዶኮና። ኤንቲ ምኖ ግድያ ግሾ ኡሎ ፕተይሳት ጋካናፐ ስንትድ የሎሶና” ያግዶሶና።

²⁰ ሄሳ ግሾ ፆሳይ ኡሎ ፕተይሳታስ ኬህስ። እስራኤለ አሳይ ካሰይሳፈ ሃ ዳርሸነ ምንሸ ብዶሶና።

²¹ ቃስ ኡሎ ፕተይሳት ፆሳስ ያይዳ ግሾ ፆሳይ ኤንታዉ ኤንታ ሶ አስ እሚስ።

²² ሄሳፈ ጉየ ካዎይ ባ አሳ ኡባኮ፥ “እብራወታፐ የለትያ አደ ኡባ ናይለ ሻፋን የግተ፤ ሽን ማጫ ናእ የለትኮ ፓፃ አግተ” ያግድ ኪትስ።