አይሰይሳታ 8 - ጌሻ ማፃፋ

ዛብሄላነ ስልማና

¹ ኤፍሬማ አሳይ ገድዮናኮ፥ “ምድያመታ ኦላናዉ ባሸ ኑና አይስ ፄጋብኪ? ኑ ቦላ ሄሳ መላባ አይስ ኦዲ?” ያግድ ይሎትዶሶና።

² ሽን ገድዮን፥ “ህንተ ኦዳይስ ታ ኦዳይሳፈ አኔ? ታ ኮቻይ አብኤዘር ሺሽዳ ካፈ ህንተ ኤፍሬማ ኮቻት ቆርዳ ቡይ አኔ?

³ ምድያመ ሀላቃታ፥ ኦሬባነ ዘባ ፆሳይ ህንተ ኩሸን አድ እሚስ። ህንተ ኦዳይሳ መላ ታኒ አይ ኦናዉ ዳንዳእያና?” ያግስ። እ ያግን ኤንቲ ዛርብዶሶና።

⁴ ገድዮንነ እያራ ደእያ ሄ ፄቱ አሳይ ዮርዳኖሰ ሻፋ ፕንዶሶና። ኤንቲ አይ ዳቡርኮካ ባንታ ሞርከታ የደ አግቦኮና።

⁵ ኤንቲ ሱኮታ ጋክዳ ዎደ ገድዮን ሄ ካታማ አሳኮ፥ “ታ አሳይ ዳቡርዳ ግሾ፥ ሀያና ጉ ካ እመርከት። ታኒ ምድያመ ካዎታ ዘባነ ሳልሞና የደሸ ደአይስ” ያግስ።

⁶ ሱኮታ ካታማ ሀላቃት፥ “ዘባነ ሳልሞና ኔኒ ድአባካሽን ነ ኦላንቾታስ አይስ ካ እማኔ?” ያግዶሶና።

⁷ ገድዮን፥ “ሎኦ አይኮይ ባዋ፤ ጎዳይ ዘባነ ሳልሞና ታ ኩሸን አድ እምያ ዎደ ታኒ ባዞ አጉንንነ ፁንዱቀን ህንተና ዋና” ያግስ።

⁸ ያፐ ደንድድ ፓኑኤላ ብድ፥ ያን ደእያ አሳካ ሄ ኦይሻ ኦይችን፥ ፓኑኤላ አሳይ ሱኮታ አሳይ ዛርዳይሳዳ ዛርዶሶና።

⁹ እ ፓኑኤላ አሳኮ፥ “ታኒ ፆናዳ ሳሮ ስምያ ዎደ ህንተ ካታማ ናግያ ሀ አዱሳ ግምብያ ላላና” ያግስ።

¹⁰ ሄ ዎደ ዘብነ ሳልሞን ዶሎሀ ባጋፈ ይዳ ኦላንቾታፐ አትዳ 15,000 ኦላንቾታራ ቃርቆራን ደኦሶና። ኤንታፈ 120,000 ኦላንቾት ኦላን ሀይቅዶሶና።

¹¹ ገድዮን ኖባፐነ ዮግባፐ ዶሎሀ ባጋን ደእያ ባዞ ኦግያራ ብድ፥ ያን ደእያ ኦላንቾት ቆፖና ደእሽን ኦላ ደንስ።

¹² ናምኡ ምድያመ ካዎት ዘብነ ሳልሞን ባቃትዶሶና፤ ሽን ገድዮን ኤንታ የደ ጋክድ ድእስ። ኤንታ ኦላንቾት ኡባይ ዎልቃማ ዳጋማን ኩንድዶሶና።

¹³ እዮኣሳ ናአይ ገድዮን ሄሬሳ ባጋራ ኦላፐ ስምስ።

¹⁴ ሱኮታፐ እስ ናአተ ናኣ ኦይክድ ኦይችስ። ሄ ናአይ ላፑን ታማነ ላፑን ሱኮታ ሀላቃታነ ጭማታ ሱን ፃፍድ እያዉ እሚስ።

¹⁵ ሄሳፈ ጉየ፥ ገድዮን ሱኮታ ይድ፥ “ ‘ዘባነ ሳልሞና ኔኒ ድአባካሽን፥ ዳቡርዳ ነ አሳስ አይስ ካ እማኔ?’ ግድ ታ ቦላ ቀልቅስደታ፤ ሽን ዘባነ ሳልሞና ሀይሳ በእተ” ያግስ።

¹⁶ ገድዮን ባዞ አጉንነ ፁንዱቀ ኤክድ ሱኮታ ሀላቃታ ዋስ።

¹⁷ ቃስ ፓኑኤላን ካታማ አዱሳ ግምበ ሻኩዋ ላልድ ካታማን ደእያ አደታ ዎስ።

¹⁸ ያትድ ገድዮን ዘባነ ሳልሞና፥ “ህንተ ታቦረን አይ መላ አስ ዎደቲ?” ያግድ ኦይችስ። ኤንቲ፥ “ነ መላ አስ፤ ኤንቲ ካዎ ናአ ዳኖሶና” ያግድ ዛርዶሶና።

¹⁹ ገድዮን፥ “ኤንቲ ታ እሻታ፤ ኤንቲ ታ አየ ናይታ። ደኦ ፆሲ ኤርያ መላ ኤንታ ህንተ ዎናባ ግድያኮ ታ ህንተና ዎከሽን” ያግስ።

²⁰ ባ ባይራ ናኣ የተራኮ፥ “ደንዳዳ፥ ሀይሳታ ዎ” ያግስ። የተር ቡሮ ዮጋ ግድያ ግሾ ያይድ ባ ማሻ ሾድቤና።

²¹ ዘብነ ሳልሞን ገድዮናኮ፥ “ህዛ ነ ኑና ዎ፤ አደ ኦሶ ኦናዉ አደ ኮሼስ” ያግዶሶና። ያትን፥ ገድዮን ኤንታ ዎስ፤ ኤንታ ግማለታ ቆን ደእያ አሌቆ ኡባ ኤክስ።

²² እስራኤለ አሳይ ገድዮናኮ፥ “ኔኒ ኑና ምድያመታፐ አሽዳ ግሾ ኔኒ፥ ነ ናአይነ ነ ናኣ ናአይ ኑና ሃርተ” ያግስ።

²³ ሽን ገድዮን፥ “ታኒ ህንተና ሃርከ፤ ታ ናአይካ ህንተና ሃረና፤ ጎዳይ ህንተና ሃራና” ያግስ።

²⁴ እ ኤንታኮ፥ “ታ ህንተና እስባ ኦይቻይስ፤ ህንተ ኡባይ ድእድ ኤህዳ ሀይ ዎርቅያፈ ታዉ እምተ” ያግስ። (እስማኤላ አሳስ ሀይን ዎርቃ አሶይ ዎጋ።)

²⁵ እስራኤለ አሳይ ዛሪድ፥ “ኤሮ፥ ኡፋይትድ እማና” ያግዶሶና። አፍላ ሂፅድ፥ አሳ ኡባይ ድእድ ኤህዳ ሀይ ዎርቅያ የግዶሶና።

²⁶ ገድዮን ኤክዳ ሀይ ዎርቀይ ላታሙ ክሎ ግራመ ዴፄስ። ሄስካ፥ ሀራ አሌቆታ፥ ቆን አያ ጎዝዳታ፥ ምድያመ ካዎት ማእያ ኦቻ ቴራ ዳንያ ማኦታነ ኤንታ ግማለታ ቆያፐ ኤከትዳ አሌቆታ ጉጆናሽና።

²⁷ ገድዮን ዎርቃ ኤቃ ምስልያ ጊግስድ፥ ባ ደእያ ኦፍራ ካታማን ዎስ። እስራኤለ አሳ ኡባይ ጎዳ አግድ ሄ ኤቃ ምስልያ ጎይንዶሶና፤ ሄስ ገድዮናስነ እያ ሶ አሳስ ፅሄ ግድስ።

²⁸ ሄሳዳ ሀንድ፥ ምድያመ አሳይ እስራኤለ አሳስ ሃረትስ፤ ኤንቲ እስራኤለ አሳ ቦላ ናምአን ደንድቦኮና። ገድዮን ሀይቃና ጋካናዉ ኦይታሙ ላይ ቢታይ ዎፑ ግድ ደእስ።

ገድዮና ሀይቁዋ

²⁹ የሩባኣላ ጌተትያ ገድዮን፥ እዮኣሳ ናአይ ባ ሶ ስሚድ ደእስ።

³⁰ ገድዮን ዳሮ ማቾ ኤክዳ ግሾ፥ እያዉ ላፑን ታሙ አደ ናይት የለትዶሶና።

³¹ ሴከማን ደእያ ላገያ እያዉ አደ ናኣ የልን፥ እያ ሱን አብመለከ ያግድ ሱንስ።

³² እዮኣሳ ናአይ ገድዮን ሎኦ ጭምድ ሀይቅስ፤ ባ አዋ እዮኣሳ ዱፎን ሞገትስ። ሄ ዱፎይ አበዜራ ኮቻት ደእያ ኦፍራን ደኤስ።

³³ ገድዮን ሀይቅዳፐ ጉየ፥ እስራኤለ አሳይ ጎዳ አግድ ባኣለ ፆሳታ ጎይንዶሶና። ባኣል-ብሪታ ጌተትያ ኤቃ ባንታዉ ፆሰ ኦዶሶና።

³⁴ እስራኤለ አሳይ ባንታ ዩሹዋን ደእያ ሞርከታ ኡባፈ ኤንታ አሽዳ ጎዳ ባንታ ፆሳ ሀሳይቦኮና።

³⁵ እስራኤለ አሳስ ኦዳ ሎኦ ኦሱዋ ግሾ የሩባኣላ ጌተትያ ገድዮና ሶ አሳስ ሎኦ ኩሸ ዛርቦኮና።