አይሰይሳታ 7 - ጌሻ ማፃፋ

ገድዮን ምድያመ ፆኑዋ

¹ ዎንተ ጋላስ የሩባኣላ ጌተትያ ገድዮንነ እያራ ደእያ አሳ ኡባይ ዎንታ ጉራ ደንድድ ብድ፥ ሀሮዳ ፑልቱዋ ማታን ዱንካንዶሶና። ምድያመ አሳይ ኤንታፈ ፑደሀ ባጋራ ሞረ ዙማ ማታን ደእያ ዛንጋራን ዱንካንዶሶና።

² ጎዳይ ገድዮናኮ፥ “ኔራ ደእያ አሳይ ዳሮ ግድያ ግሾነ እስራኤለ አሳይ፥ ‘ኑኒ ኑ ዎልቃን ፆንዳ’ ግድ ታ ቦላ ጬቀቶና መላ ታኒ ምድያመታ ህንተ ኩሸን አዳ እምከ።

³ ሄሳ ግሾ፥ አሳኮ፥ ‘ያይያ አስ ደእኮ ጋላዳ ዙማፐ ስሚድ ጉየ ባ ሶ ሶ ቦ’ ያጋዳ አዋጃ” ያግስ። ያትን፥ ላታማነ ናምኡ ሙኩሉ አሳይ ጉየ ስምን ታሙ ሙኩሉ አስ አትስ።

⁴ ግዶሽን፥ ጎዳይ ገድዮናኮ፥ “ሀእካ አሳይ ዳሮ። ነ ኤንታ ኤካዳ ዱገ ሻፋ ዎ፤ ታኒ ኤንታ ያን ፓጫና። ታኒ፥ ‘ሀይስ ኔራ ቦ’ ገይስ ኔራ ቦ፤ ታኒ፥ ‘ሀይስ ኔራ ቦፖ’ ገይስ ቦፖ” ያግስ።

⁵ ገድዮን አሳ ሻፉ ኤክድ ብስ። ጎዳይ እያኮ፥ “ሀ አሳ ግዶፈ ጉልባትድ ሃ ኡየይሳታነ ካናዳ ሃ እንፃርሳን ኡየይሳታ ሻካ” ያግስ።

⁶ ባንታ ኩሸን ሃ ኡየይሳታ ታይቦይ ሄ ፄታ፤ ሽን አትዳይሳት ኡባይ ሃ ጉልባትድ ኡይዶሶና።

⁷ ጎዳይ ገድዮናኮ፥ “ባንታ ኩሸን ሃ ኮጰትድ ኡይዳ ሄ ፄቱ አሳታን ታኒ ህንተና አሻና፤ ምድያመታ ህንተዉ አዳ እማና። ሽን አትዳ አሳ ኡባይ ባ ሶ ሶ ስሞ” ያግስ።

⁸ ሄሳ ግሾ፥ ገድዮን አሳታ ሽንቅያነ ኤንታ ሞይዝያ ኤክዳ ሄ ፄቱ አሳታ ባራ አሽድ፥ ሀንኮ አሳ ኡባ ኤንታ ሶ ሶ የድስ። ሀ ኡባይ ሀንያ ዎደ ምድያመ ኦላንቾት ኤንታፈ ጋርሳ ባጋራ ደእያ ዛንጋራን ዱንካንድ ኡትዶሶና።

⁹ ሄ ቃማ ጎዳይ ገድዮናኮ፥ “ታኒ ነዉ አዳ እምዳ ግሾ ደንዳዳ ኤንቲ ዱንካንዳ በሳን ደእሽን ኦላ።

¹⁰ ኔኒ ኤንታ ኦላናዉ ያይኮ ነ ኦሳንቹዋ ፑራ ኤካዳ ኤንቲ ዱንካንዳ በሳ ዱገ ዎ።

¹¹ ኤንቲ ግያባ ስአ። ሄሳፈ ጉየ፥ ኔኒ ኤንታ ኦላናዉ ምኖተ ደማና” ያግስ። ገድዮንነ እያ አይለይ ፑር፥ ምድያመት ዱንካንዳ በሳ ማታን ናግያ ኦላንቾታኮ ብዶሶና።

¹² ሄ ዎደ ቦለዳ ዳርዳ ምድያመት፥ አማለቃትነ ዶሎሀ ባጋ አሳ ኡባይ ዛንጋራን ዱንካንድ ኡትዶሶና። ኤንታ ግማለት አባ ጋፃን ደእያ ሻፈ መላ ታይባናዉ ዳንዳኤተና።

¹³ ገድዮን ያ ጋክያ ዎደ እስ አደይ ባ አሙሁዋ ባ ላግያስ ኦድሽን ስእስ። ሄስካ፥ “እስ ባንጋ ኡይ ኦኮለት ጋክድ ምድያመታ ዱንካንያ ዶምእስ፤ ዱንካነይ ሽረት ዎድ ምጨትስ” ያግስ።

¹⁴ እያ ላገይ ዛሪድ፥ “ሄስ እስራኤለ አድያ፥ እዮኣሳ ናኣ ገድዮና ማሻፈ አትሽን፥ ሀራባ ግደና። ፆሳይ ምድያመነ ምድያመታራ ደእያ ኦላንቾታ ኡባ ገድዮናስ አድ እሚስ” ያግስ።

¹⁵ ገድዮን ሄ አሙሁዋነ እያ ብርሸ ስእዳ ዎደ ጉልባትድ ፆሳ ጎይንስ። እስራኤለ አሳይ ዱንካንዳ በሳ ጉየ ስሚድ፥ “ደንድተ፤ ጎዳይ ምድያመ ኦላንቾታ ህንተ ኩሸን አድ እሚስ” ያግስ።

¹⁶ ሄ ፄቱ አሳታ ሄ ጩጋን ሻክድ ኤንታዉ ሁጰን ሁጰን እስ እስ ሞይዘነ ግዶን ኤፅያ ፆምፐይ ደእያ እስ እስ ፃሮ እሚስ።

¹⁷ ገድዮን ኤንታኮ፥ “ታና ፄልተ፤ ታኒ ኤንቲ ዱንካንዳ በሳ ጋክያ ዎደ ኦይሳዳ ህንተካ ኦተ።

¹⁸ ታነ ታራ ደኤይሳት ኡባይ ሞይዘ ፑንይ ዎደ ህንተካ ኤንቲ ዱንካንዳ በሳ ዩሹዋን ኤቅድ ሞይዘ ፑንሸ፥ ‘ጎዳሳነ ገድዮናሳ’ ያግድ ዋስተ” ያግስ።

¹⁹ ግድ ብላሄ ግድያ ዎደ ናገይሳት ላመትዳፐ ጉየ ገድዮንነ እያራ ደእያ ፄቱ አሳት ብድ፥ ምድያመት ዱንካንዳ በሳ ጋክድ ባንታ ሞይዝያ ፑንዶሶና፤ ኦይክዳ ፃሩዋ መንዶሶና።

²⁰ ሀራ ባጋራ ደእያ ናምኡ ጩጋይ ሄሳዳ ኦዶሶና። ባንታ ሀድርሳ ኩሸን ኤፅያ ፆምፐ፥ ባንታ ኡሻቻ ኩሸን ሞይዘ ኦይክድ፥ “ጎዳነ ገድዮና ማሻ” ያግድ ዋስዶሶና።

²¹ አሳ ኡባይ ምድያመት ዱንካንዳ በሳ ዩሾን ባ በሳን በሳን ኤቅዳሽን፥ ምድያመ ኦላንቾት ኡባይ ዋስሸ ባቃትዶሶና።

²² ሄ ፄቱ አሳይ ባንታ ሞይዝያ ፑንዳ ዎደ ሞርከ ኦላንቾት ባንታ ማሻ እሶይ እሱዋ ቦላ ደንና መላ ጎዳይ ኦስ። አትዳ ኦላንቾት ፃራራኮ ስሚድ ቤት-ሽፃ ጋካናዉ፥ ያፐ አድ፥ ፃባታ ማታን ደእያ አቤል-ማሆላ ጋካናዉ ባቃትዶሶና።

²³ ሄሳፈ ጉየ ንፍታለመ፥ አሴራነ ምናሰ ኮቻት ፄገትድ፥ ሺቅድ ምድያመታ የደዶሶና።

²⁴ ደረይ ዳርያ ኤፍሬማ ቢታን ደእያ አሳኮ ገድዮን ኪትድ፥ “ምድያመታ ኦላናዉ ዱገ ዎድ ቤት-ባራ ጋካናዉ ደእያ ዮርዳኖሰን ገልያ ሻፋታ ኤንታፈ ካሰትድ ኦይክተ” ያግስ። ኤፍሬማ አሳ ኡባይ ፄገትድ፥ ሺቅድ ቤት-ባራ ጋካናዉ ዮርዳኖሰን ገልያ ሻፋታ ኦይክዶሶና።

²⁵ ኤንቲ ኦሬባነ ዘባ ጌተትያ ናምኡ ምድያመ ሀላቃታ ድእዶሶና። ኦሬባ፥ “ኦሬባ ዛላ” ጌተትያ በሳን፥ ቃስ ዘባ፥ “ዘባ ዎይነ ጉምእያ በሲ” ጌተትያ በሳን ዎዶሶና። ሄሳፈ ጉየ፥ አትዳ ምድያመታ የደድ፥ ኦሬባነ ዘባ ቆያ ቃንፅድ ኤንታ ሁጵያ፥ ዮርዳኖሰ ሻፋፐ ሄፍንን ደእያ ገድዮናኮ ኤህዶሶና።