አይሰይሳታ 21 - ጌሻ ማፃፋ

ብንያመ ኮቻስ ማቾ ኮሽ

¹ እስራኤለ አሳይ ምፅጳን ሺቅዳ ዎደ፥ “ኑ ግዶፈ ኦንካ ብንያመ አሳስ ባ ናአ ማቾ እሞፎ” ያግድ ጫቅ ኡትዶሶና።

² እስራኤለት ቤተለ ካታማ ብድ፥ ያን ሳእ ቃማና ጋካናዉ ፆሳ ስንን ኡትድ፥ ባንታ ቃላ ቁ ኦድ ዬክዶሶና።

³ ኤንቲ፥ “አቤት ጎዳዉ፥ እስራኤለ ፆሳዉ፥ ሀይስ እስራኤለን አይስ ሀንዴ? ሀች እስራኤለ አሳ ግዶፈ እስ ኮቻይ አይስ ፓጭዴ?” ያግዶሶና።

⁴ ዎንተ ጋላስ ጉራ ደንድድ፥ ያርሾ በስ ጊግስድ፥ ፁሳ ያርሾነ እስፈተ ያርሾ ሺሽዶሶና።

⁵ እስራኤለት፥ “እስራኤለ ዛረ ኡባፈ ጎዳ ስንን ሺቅያ በሳ ዮና ኮቻይ ኦኔ?” ያግድ ኦይችዶሶና። ኤንቲ ሄሳ ኦይችዳ ጋሶይ፥ “ምፅጳ ካታማን ጎዳ ስንን ሺቃናዉ ይቦና አስ ኦንካ ሀይቆ” ያግድ ካሰ ጫቅዳ ግሾሳ።

⁶ እስራኤለ አሳይ ባንታ እሻታስ፥ ብንያመ ኮቻታስ ቃትድ፥ “ሀች እስራኤለፐ እስ ኮቻይ ይስ።

⁷ ኑኒ ኑ ማጫ ናይታ ኤንታዉ እሞና መላ ጎዳን ጫቅዳ ግሾ ሀይቆፐ አትዳ ብንያመ ኮቻት ማቾ ኤካና መላ ኑኒ አይ ኦኖ?” ያግዶሶና።

⁸ ቃስካ ኤንቲ፥ “እስራኤለ ኮቻታፐ ምፅጳን ጎዳ ስን ዮናይ ኦኔ?” ያግድ ኦይችዶሶና። ጋላዳን ደእያ ያበሳ ካታማፐ እስ አስካ ቃንገ ጋናዉ ዮናይሳ በእዶሶና።

⁹ ኤንቲ አሳ ታይብዳ ዎደ ጋላዳን ደእያ ያበሳፐ እስ አስካ በንትቤና።

¹⁰ ሄሳ ግሾ፥ ማባራይ 12,000 ምኖ ኦላንቾታ ጋላዳን ደእያ ያበሳ ካታማ ኪትዶሶና። ብድ፥ “ያበሳን ደእያ ማጫሳነ ናይታ እሱዋካ አሾና ማሻን ቡተ።

¹¹ ሄሳዳ ኦድ፤ አደነ አደራ አቅዳ ማጫ ኡባ ዎተ” ያግድ ኪትዶሶና።

¹² ያበሳ ካታማን ደእያ አሳ ግዶፈ አደራ አቅቦና ኦይዱ ፄቱ ጌላኦ ማጫ ናይታ ደምዶሶና። ኤንታ ካናነ ቢታን፥ ሴሎን ዱንካንዳ ጉታ ኤክድ ይዶሶና።

¹³ ሄሳፈ ጉየ፥ ኩመ ማባራይ እርሞና ዛላ ማታን ደእያ ብንያመ አሳራ ስገታናዉ ጭማ የድዶሶና።

¹⁴ ብንያመ አሳት ስሚድ ይዶሶና። እስራኤለ አሳይ ያበሳ ካታማፐ ዎና ኤህዳ ጌላኦ ናይታ ኤንታዉ እምዶሶና። ሽን ጌላኦታ ታይቦይ አደታ ታይቡዋራ ግንቤና።

¹⁵ እስራኤለ ኮቻታ ግዶን ደእያ እስፈተይ ዱፃና መላ ጎዳይ ኦዳ ግሾ አሳይ ብንያመታስ ዳሮ ቃትዶሶና።

¹⁶ ማባራ ጭማት፥ “ብንያመ ኮቻታፐ ማጫስ ሀይቅድ ዉርዳ ግሾ፥ ሀይቆፐ አትዳ አደታስ ኑኒ ማጫስ ዋትድ ደማኔ?

¹⁷ እስራኤለ አሳ ግዶፈ ቁሸትድ ዮና መላ ብንያመ ኮቻታፐ አትዳይሳታ ላትያ ናእ ዳናዉ ኮሼስ።

¹⁸ ግዶሽን፥ ኑኒ ኑ ማጫ ናይታፐ ኤንታዉ እማናዉ ዳንዳኦኮ። እስራኤለ አሳይ ካሰ፥ ‘ባ ናአ ብንያመ ኮቻስ እምያ ኡራይ ባደትዳይሳ ግዶ’ ያግድ ጫቀትድ ኡትዶሶና” ያግዶሶና።

¹⁹ ያትን፥ ጭማት፥ “ሄኮ፥ ላይን ላይን ሴሎን ጎዳ ቦንችያ ባለይ ማትስ” ያግዶሶና። ሴሎይ ቤተለፐ ፑደሀ ባጋራ፥ ላቦናፐ ዱገሀ ባጋራ፥ ቤተለፐ ሴከማ ኤፍያ ኦግያፐ ዶሎሀ ባጋራ ደኤስ።

²⁰ ሄሳ ግሾ፥ ጭማት፥ ብንያመ አሳታ ሀይሳዳ ያግድ ኪትዶሶና፤ “ብድ ዎይነ ጋደ ግዶን ቆሰትድ፥

²¹ ናግተ። ሴሎ ካታማ ማጫ ናይት ባኣለ ጋላስ ካራቦ ኦይክድ፥ የፅሸነ ዱርሸ ያ ዎደ ህንተ ዎይነ ጋደ ግዶፈ ከይተ። ሴሎ ማጫ ናይታፐ ዳፍ ኤክድ፥ ብንያመ ቢታ ኤፍተ።

²² ኤንታ አዋት ዎይኮ ኤንታ እሻት ኑኮ ማጋናናዉ ያ ዎደ ኑኒ ኤንታኮ፥ ‘ሀያና፥ ኤንታ ኑስ እምተ፤ ኑኒ ኤንታ ኦላ በሳፈ ኡንኤድ ኤክቦኮ። ህንተ ዶስድ እምቦና ግሾ ባላ ግደከታ’ ያጋና” ያግዶሶና።

²³ ብንያመ አሳይ እስራኤለ ጭማት ግዳይሳዳ ኦዶሶና። እሶይ እሶይ ሴሎን የፅያ ማጫ ናይታፐ ባዉ ማቾ ዳፍድ ኤክስ። ኤንቲ ባንታ ላታ ቢታ ስሚድ፥ ካታማታ ዛር ኬፅድ ያን ደእዶሶና።

²⁴ ሄ ዎደ እስራኤለ አሳይ ያፐ ላለትድ፥ እሶይ እሶይ ባ ኮቻኮ፥ ባ ኮቻኮነ ባ ሶ አሳኮ ብስ።

²⁵ ሄ ዎደ እስራኤለ ቢታን ካዎይ ባዋ፤ አስ ኡባይ ባዉ ሎኦ ዳንዳባ ኦስ።