አይሰይሳታ 20 - ጌሻ ማፃፋ

እስራኤለት ኦላስ ጊገተ

¹ ዳነፐ በርሳበ ጋካናዉ ጋላዳን ደእያ እስራኤለ አስ ኡባይ እስ አሳዳ ምፅጳን ጎዳ ስንን እስፈ ሺቅዶሶና።

² ሄ ሺቅዳ ፆሳ አሳራ፥ እስራኤለ ዛረ ኡባ ሀላቃት ደኦሶና። ኤንታ ግዶን ማሸ ዳንጭድ ኦለታናዉ ዳንዳእያ 400,000 ኦላንቾት ደኦሶና።

³ ሄ ዎደ እስራኤለ አሳይ ምፅጳን ሺቅዳይሳ ብንያመ አሳይ ስእዶሶና። እስራኤለ አሳይ፥ “ሀ ኢታባይ ዋንድ ሀንዳኮ ኑስ ኦድተ” ያግዶሶና።

⁴ ሀይቅዳ ላገ አዝናይ፥ ሌወይ፥ ሀይሳዳ ያግድ ዛርስ፤ “ታንነ ታ ላገያ ሳእ ቃምን አቃናዉ ብንያመ ቢታን ደእያ ግብአ ካታማ ይዳ።

⁵ ግብአ ካታማ አሳት ታና ዎናዉ ይድ፥ ኬ ዩሹዋ ተቅዶሶና። ሽን ጉየፐ ታ ላገራ ዎልቃን፥ ታራን ታራን ጋሄትድ እዮ ዎዶሶና።

⁶ ታኒ እ አሀ ኤካዳ ቃንፀረስ፤ ኤንቲ ሀ ኢታባነ ዬላባ እስራኤለን ኦዳ ግሾ እስራኤለ አሳይ ደእያ ቢታ ኡባ እስ እስ ቃንፆ የዳስ።

⁷ ህዛ፥ ህንተ ኡባይ እስራኤለ አስ፤ ዞረትድ በሲያ ፕርዳ እምተ” ያግስ።

⁸ አሳ ኡባይ እስፈ ደንድድ፥ “ኑ ግዶፈ ኦንካ ባ ዱንካንያ ዎይኮ ባ ኬ ጉየ ስመና።

⁹ ኑኒ ግብአ ቦላ ሀይሳ ኦና፤ ሳማ የግድ፥ ግብአ ካታማ ኦላናዉ ባና አሳታ ዶራና።

¹⁰ እስራኤለ ዛረ ኡባፈ ኦላ ብያ አሳስ ሽንቀ ጊግሳና መላ ፄታፐ ታማ፥ ሙኩላፐ ፄታ፥ ታሙ ሙኩላፐ እስ ሙኩላ ዶርድ ኤካና። አትዳ ኦላንቾት ብንያመ ቢታን ደእያ ግብአ ብድ፥ እስራኤለ ቦላ ሀይሳ መላ ኢታባ ኦዳ አሳ ቦላ ሀሎ ከያናዉ ቦ” ያግዶሶና።

¹¹ እስራኤለ አሳ ኡባይ ካታማ ኦላናዉ እስፈ ሺቅዶሶና።

¹² እስራኤለ ኮቻት ብንያመ ኮቻ ኡባስ ሀይሳዳ ያግድ አሰ ኪትዶሶና፤ “ህንተ ግዶን ሀንዳ ሀ ኢታባይ አይቤ?

¹³ ኑኒ ኤንታ ዎድ፥ እስራኤለፐ ኢታባ ይሳና መላ ግብአን ደእያ ሄ ኢታ አሳታ ከስድ ኑስ እምተ” ያግዶሶና። ሽን ብንያመት እስራኤለ አሳይ ኦድዳይሳ ስኦና እፅዶሶና።

¹⁴ ኤንቲ እስራኤለ አሳራ ኦለታናዉ ባንታ ካታማታፐ ከይድ እስፈ ግብአን ሺቅዶሶና።

¹⁵ ሄ ጋላስ ብንያመ ካታማታፐ ይዳ ማሻን ኦለትያ ላታማነ ኡሱፑን ሙኩሉ ኦላንቾታ ሺሽዶሶና። ሄስካ ግብአን ደእያ አሳ ግዶፈ ዶረትዳ ላፑን ፄቱ አሳፐ ሀራ።

¹⁶ ሀ ኦላንቾታ ግዶፈ ላፑን ፄቱ አሳት ሀድርሳ ኩሸን ኦይሳታ፤ ኤንቲ ያምባርሻን ሹቹ ሆልድ፥ ሀር አቶሽን እስ ብናናካ ባሎኮና።

¹⁷ ብንያመ አሳ ጉጆና፥ እስራኤለ አሳይ ማሻን ኦለትያ 400,000 ኦላንቾታ ሺሽዶሶና።

¹⁸ እስራኤለ አሳይ ደንድድ፥ ቤተለ ብድ፥ “ብንያመ አሳ ኦላናዉ ኑፐ ስንትድ ከያናይ ኦኔ?” ያግድ ፆሳ ኦይችዶሶና። ጎዳይ፥ “ይሁዳ ኮቻይ ስንትድ ከዮ” ያግስ።

¹⁹ ዎንተ ጋላስ ዎንታ ጉራ እስራኤለ አሳይ ደንድድ ግብአ ካታማ ማታን ሺቅዶሶና።

²⁰ ሄሳፈ ጉየ እስራኤለ አሳይ ብንያመ አሳ ኦላናዉ ብድ ግብአ ካታማ ማታን ሳልፕዶሶና።

²¹ ሄ ጋላስ ብንያመ አሳይ ግብአፐ ከይድ፥ እስራኤለ አሳፐ 22,000 ኦላንቾታ ዎዶሶና።

²² እስራኤለ አሳይ እሶይ እሱዋ ምንን፥ ኮይሮ ጋላስ ኤንቲ ኦላስ ሳልፕዳ በሳን ናምአን ሳልፕዶሶና።

²³ እስራኤለ አሳይ ብድ ሳእ ቃማና ጋካናዉ ጎዳ ስንን ዬክዶሶና። ኤንቲ፥ “ኑ እሻታራ፥ ብንያመ አሳታራ ኦለታናዉ ናምአን ከይኖ?” ያግድ ጎዳ ኦይችዶሶና። ጎዳይ፥ “ኤ፥ ኤንታራ ኦለታናዉ ከይተ” ያግስ።

²⁴ እስራኤለ አሳይ ብንያመ አሳራ ኦለታናዉ ናምአን ሺቅዶሶና።

²⁵ ናምአን ጋላስካ ብንያመ አሳይ ግብአ ካታማፐ ከይድ፥ እስራኤለ ኦላንቾታፐ ማሻን ኦለትያ 28,000 አሳ ዎዶሶና።

²⁶ ሄሳፈ ጉየ፥ እስራኤለት ኡባይ ቤተለ ብድ ዬክዶሶና፤ ያን ፆምሸ ሳእ ቃማና ጋካናዉ፥ ጎዳ ስንን ኡትዶሶና። ጎዳ ስንን ፁሳ ያርሾነ እስፈተ ያርሾ ሺሽዶሶና።

²⁷ ሄ ዎደ ፆሳ ጫቆ ታቦተይ ቤተለ ካታማን ደእያ ግሾ እስራኤለ አሳይ ጎዳ ኦይችዶሶና።

²⁸ ሄ ዎደ አሮና ናአይ፥ አላዛራ ናአይ ፍንሃስ ካህነተን ኦስ። እስራኤለ አሳይ፥ “ኑ እሻ ግድዳ ብንያመ አሳራ ኦለታናዉ ከይኖየ አትኖ” ያግድ ጎዳ ኦይችዶሶና። ጎዳይ፥ “ብድ ኦለትተ፤ ታኒ ኤንታ ዎንቶ ህንተ ኩሸን አዳ እማና” ያግስ።

²⁹ እስራኤለ አሳይ ጉ ኦላንቾት ግብአ ካታማ ዩሹዋን ዙግድ ናጋና መላ ኦዶሶና።

³⁰ ሄን ጋላስ እስራኤለ ኦላንቾት ካሰይሳዳ ብንያመ ኦላንቾታ ኦላናዉ ብድ፥ ግብአ ካታማፐ ስን ባጋራ ሳልፕዶሶና።

³¹ ብንያመ አሳይ ኤንታራ ኦለታናዉ ካታማፐ ከይድ፥ ኤንታ ካል ከይድ ሃክድ ብዶሶና። ካሰይሳዳ ቤተለነ ግብአ ኤፍያ ዳልጋ ኦገታንነ ደምባታን እስራኤለ አሳፐ ሀስታሙ ግድያ አሳ ዎዶሶና።

³² ብንያመ አሳይ፥ “ኑኒ ካሰይሳዳ ኤንታ ፆንዳ!” ያግዶሶና። ሽን እስራኤለ አሳይ፥ “ኤንቲ ካታማፐ ሃክድ፥ ኦግያ ቦላ ከያና መላ አነ ኑኒ ባቃቶስ” ያግድ ዎፅዶሶና።

³³ እስራኤለ አሳ ኡባይ ባንታ በሳፈ ደንድድ፥ ባኣል-ታማራ ጌተትያ በሳን ሳልፕያ ዎደ ግብአ ደንባን ዙግድ ኡትዳ እስራኤለት ከይዶሶና።

³⁴ እስራኤለ አሳፐ ዶረትዳ ታሙ ሙኩሉ አሳይ ግብአ ቦላ ኦላ ደንዶሶና፤ ኦላይ ዳሮ ዎልቃምስ። ሄ ኡባይ ሀንያ ዎደ ብንያመ አሳስ ዮይ ማትዳይሳ ኤርቦኮና።

³⁵ እስራኤለት ብንያመ አሳ ቦላ ፆኖ ደማና መላ ጎዳይ ኦስ። ሄ ጋላስ እስራኤለ አሳይ ብንያመ አሳፐ ማሻን ኦለትያ ላታማነ እቻሹ ሙኩሉነ እስ ፄቱ ኦላንቾታ ዎዶሶና።

³⁶ ሄሳፈ ጉየ፥ ብንያመ አሳይ ፆነትዳይሳ ኤርዶሶና። እስራኤለ አሳይ ግብአ ካታማ ዩሹዋን ዙግድ ኡትዳ ኦላንቾታን አማነትዳ ግሾ፥ ብንያመ አሳን ፆነትዳባ ዳንድ ጉየ ሺቅዳ ግሾሳ።

³⁷ ቆሰትድ ናግያ ኦላንቾት ግብአ ካታማ ኤለስ ዎፅ ገልድ ካታማ ግዶን ደምዳ ኡባ ዎዶሶና።

³⁸ ቆሰትድ ናግያ አሳትነ እስራኤለ አሳይ ጩያ ሻራዳ ደንና መላ ካሰ ዞረት ኡትዶሶና።

³⁹ ኦላ ደንባን ደእያ እስራኤለ አሳይ ባቃተይሳ አግድ፥ ጉየ ስሚድ፥ ኤንታ ኦልዶሶና። ብንያመ አሳይ እስራኤለ አሳፐ ሀስታሙ ግድያ አሳ ዎድ፥ “ካሰይሳዳ ሀእካ ኑ ኤንታ ፆንዳ” ያግዶሶና።

⁴⁰ ሽን ማላ ጩያይ ካታማፐ ፑደ ከስ ዶምስ። ብንያመ አሳይ ጉየ ፄልያ ዎደ ካታማይ ታማን ፁገትን፥ ጩያይ ፑደ ከየይሳ በእዶሶና።

⁴¹ ሄሳፈ ጉየ፥ እስራኤለት ብንያመ አሳ ቦላ ጉየ ስምዶሶና። ብንያመ አሳይ ዉራና ሀነይሳ ኤርዳ ግሾ ዳጋምዶሶና።

⁴² ሄሳ ግሾ፥ ኤንቲ እስራኤለ አሳ ስንፈ ባዞ ስሚድ ባቃትዶሶና፤ ሽን ከስ ኤካናዉ ዳንዳእቦኮና። ካታማታፐ ከይዳ እስራኤለ ኦላንቾት ግዱዋን ኤንታ ዎ ዉርስዶሶና።

⁴³ እስራኤለት ብንያመ አሳ ተቅድ፥ ግብአ ካታማፐ ዶሎሀ ባጋራ ደእያ በሳ ጋካናዉ የደድ ዳሮታ ዎዶሶና።

⁴⁴ ያን ብንያመ አሳፐ ታማነ ሆስፑን ሙኩሉ ምኖ ኦላንቾት ሀይቅዶሶና፤

⁴⁵ ኤንታፈ አትዳይሳት ጉየ ስሚድ፥ ባዙዋ ካንድ፥ እርሞና ዛላኮ ባቃትዶሶና። እስራኤለት ኤንታፈ እቻሹ ሙኩሉ አሳ ኦገ ቦላ ዎዶሶና። ኤንታፈ አትዳይሳታ ግዶማ ጋካናዉ የደድ ናምኡ ሙኩሉ አሳ ዎዶሶና።

⁴⁶ ሄ ጋላስ ብንያመ አሳፐ ማሻን ኦለትያ ላታማነ እቻሹ ሙኩሉ ምኖ ኦላንቾት ሀይቅዶሶና።

⁴⁷ ሽን ኡሱፑን ፄቱ አሳት ባዙዋ ካንድ፥ እርሞና ዛላኮ ባቃትድ፥ ያን ኦይዱ አጌና ጋምእዶሶና።

⁴⁸ እስራኤለ አሳይ አትዳ ብንያመ አሳኮ ጉየ ስሚድ፥ አደነ ማጫ፥ ናይታነ መህያ ኡባ ዎዶሶና፤ ሄራን ደእያ ካታማታ ኡባ ታማን ፁግዶሶና።