አይሰይሳታ 2 - ጌሻ ማፃፋ

ጎዳ ኪታንቾይ ቦክማን

¹ ጎዳ ኪታንቾይ ጋልጋላፐ ቦክማ ብድ፥ እስራኤለ አሳኮ ሀይሳዳ ያግስ፤ “ታኒ ህንተና ግብፀፈ ከሳዳ በን ህንተ ማይዛታስ እማና ጋዳ ጫቅዳ ቢታ ህንተና ገልሳዳ፥ ‘ታኒ ህንተራ ጫቅዳ ጫቁዋ መንከ፤

² ህንተ ሀ ቢታን ደእያ አሳታራ ጫቆፍተ፤ ኤንታ ያርሾ በሳ ላልተ’ ያጋስ። ሽን ህንተ ታዉ ኪተትበከታ፤ አይስ ሄሳ ሀንደቲ?

³ ሄሳ ግሾ፥ ታኒ ኤንታ ህንተ ስንፈ ጎድከ፤ ኤንቲ ህንተዉ ሞርከ ግዳና፤ ኤንታ ፆሳት ህንተዉ ፅሄ ግዳና” ያግስ።

⁴ ጎዳ ኪታንቾይ እስራኤለ አሳስ ሄሳ ኦድዳ ዎደ አሳይ ባንታ ቃላ ቁ ኦድ ዬክዶሶና።

⁵ ያትድ ሄ በሳ ቦክማ ያግድ ሱንድ ያን ጎዳስ ያርሽዶሶና።

ኪተተ እፆይ ኤህያ መቶ

⁶ እያሱይ እስራኤለ አሳ የድዳፐ ጉየ፥ አሳይ እሶይ እሶይ ባና ጋክዳ ላታ ቢታ ኤካናዉ ብስ።

⁷ እያሱይ ፓፃ ደእያ ላይንነ ጎዳይ እስራኤለ አሳስ ኦዳ ግታ ኦሶ ኡባ በእዳ ጭማት ደእያ ዎደ አሳይ ጎዳስ ኪተትዶሶና።

⁸ ጎዳ አይለይ፥ ናወ ናአይ እያሱይ ላይይ ፄታነ ታማ ግድን ሀይቅስ።

⁹ ኤንቲ እያ ጋኣሳ ዙማፐ ፑደሀ ባጋን፥ ኤፍሬማ ገዘ ቢታን፥ ትምናት-ሳራሀ ጌተትያ በሳን እያ ላታ ቢታን ሞግዶሶና።

¹⁰ ሄ የለተ ኡባይ ሀይቅድ ባንታ ማይዛታን ጋሄትዶሶና። ሄሳፈ ጉየ ጎዳ ዎይኮ ጎዳይ እስራኤለ አሳስ ኦዳባ ኤሮና ሀራ የለተ ደንድስ።

¹¹ ሄሳፈ ጉየ፥ እስራኤለ አሳይ ጎዳ ስንን ኢታባ ኦዶሶና፤ ባኣለ ኤቃ ምስለታ ጎይንዶሶና።

¹² ግብፀ ቢታፈ ኤንታ ከስዳ ጎዳ፥ ባንታ ማይዛታ ፆሳ አግዶሶና። ኤንታ ዩሹዋን ደእያ አሳ ኤቃታኮ ስሚድ፥ ኤንታዉ ጎይንዶሶና፤ ሄሳን ጎዳ ሀንቀዶሶና።

¹³ ቃስ ጎዳ አግድ፥ ባኣለነ አስታሮተ ኤቃ ጎይንዶሶና።

¹⁴ ያትን፥ ጎዳ ሀንቆይ እስራኤለ አሳ ቦላ ኤፅስ፤ ቦንቀይሳት ኤንታ ቦንቃና መላ ኦስ። ኤንታ ዩሹዋን ደእያ ሞርከታስ አድ እሚስ። ያትን፥ ኤንቲ ባንታ ሞርከታራ ኤቀታናዉ ዳንዳእቦኮና።

¹⁵ ኤንቲ ኦለታናዉ ከይያ ዎደ ኡባን፥ ጎዳይ ካሰ ኤንታዉ ኦድዳይሳዳነ ጫቅዳይሳዳ ኤንቲ ፆነታና መላ እ ኤንታ ቦላ ደንድስ። ያትን፥ ኤንቲ ዳሮ ኡንኤትዶሶና።

¹⁶ ያትን፥ ጎዳይ አይሰይሳታ ኤንታዉ ደንን፥ ኤንቲ እስራኤለ አሳ ቦንቀይሳታ ኩሸፐ አሽዶሶና።

¹⁷ ግዶሽን እስራኤለ አሳይ ሃረይሳታስ ኪተትቦኮና፤ ጎዳስ አማነቶና እፅድ ሀራ ፆሳታ ጎይንዶሶና። ኤንታ አዋት ጎዳስ ኪተትድ ሄመትዳ ኦግያ አግድ ሀራ ሶ ስምዶሶና።

¹⁸ ጎዳይ ኤንታዉ አይሰይሳታ ደንዳ ዎደ ኡባን እ አይሰይሳታራ እስፈ ግድድ ሄ አይሰይስ ፓፃ ደእያ ላይ ኡባን ኤንታ ሞርከታ ኩሸፐ አሽስ። ኤንቲ ኡንአንነ መቶን ግድድ ጎዳኮ ዋስያ ዎደ ኡባን ጎዳይ ኤንታዉ ቃቴስ።

¹⁹ ሽን አይሰይስ ሀይቅዳፐ ጉየ፥ አሳይ ጉየ ስሚድ፥ ካሰ ኤንታ አዋት ኦዳ ኢታፐ አዳ ኢታ ኦዶሶና። ኤንቲ ሀራ ፆሳታኮ ስሚድ፥ ኤንታዉ ጎይንዶሶና። ባንታ ኢታ ኦሱዋነ ጌላ ኦግያ አጎና እፅዶሶና።

²⁰ ጎዳይ እስራኤለ አሳ ቦላ ይሎ ኤፅድ፥ “ሀ አሳይ ታኒ ኤንታ ማይዛታስ ጫቅዳ ጫቁዋ መንዳ ግሾነ ታዉ ኪተቶና እፅዳ ግሾ፥

²¹ እያሱይ ሀይቅያ ዎደ ቢታ ቦላ አትዳ ካዎተታፐ እሱዋካ ታኒ ኤንታ ስንፈ ጎዳዳ ከስከ።

²² እስራኤለ አሳይ ካሰ ባንታ ማይዛታዳ ታ ኦግያ ካልያኮነ ካሎናኮ ፓጫናዉ ታኒ ሀ አትዳ ካዎተታ ጎኤታና” ያግስ።

²³ ሄሳ ግሾ፥ ጎዳይ ሄ ካዎተት ቢታፈ ጎደቶና ጋምአና መላ ኦስ። እ ኤንታ ኤለስድ ጎድ ከስቤና፤ ኤንታ እያሱስ አድ እምቤና።