አይሰይሳታ 19 - ጌሻ ማፃፋ

እስ ሌወነ እያ ላገዉ

¹ እስራኤለ ቢታን ካዎይ ባይና ዎደ ደረይ ዳርያ ኤፍሬማ ቢታን፥ ሃሆ በሳን፥ ሌወ ኮቸ ግድዳ እስ ኡራይ ደኤስ። ሄ ኡራይ ይሁዳ ቢታን፥ ቤተለመ ካታማፐ እስ ላገ ባዉ ኤህስ።

² ሽን እያራ ኦየታዳ ይሁዳ ቢታን ቤተለመ ካታማን ደእያ ባ አዋ ሶ ባዳ ያን ኦይዱ አጌና ኡታሱ።

³ እ አዝናይ እዮ ጭማትድ ሶ ዛራናዉ ባ አይልያነ ናምኡ ሀረታ ኤክድ ብስ። እ ያ ጋክያ ዎደ እያ ሞካ ኤካዳ ባ አዋ ሶ ገልሳሱ፤ እ አዋይ እያ በእዳ ዎደ ኡፋይትድ ሞክስ።

⁴ ናኤ አዋይ እያ የዶና እፅን፥ ያን እያራ ምሸነ ኡይሸ ሄ ጋላስ ጋምእስ።

⁵ ኦይዳን ጋላስ ዎንታ ጉራ ደንድድ፥ ባናዉ ጊግዶሶና። ሽን ናኤ አዋይ ባ ናኤ አዝናኮ፥ “ጉ ካ ማዳ ጋሽታዳ ባ” ያግስ።

⁶ ናምኡ አሳት ኡትድ እስፈ ምዶሶናነ ኡይዶሶና። ሄሳፈ ጉየ ናኤ አዋይ እያኮ፥ “ሀያና፥ ሀች ኡፋይታዳ ሀይሳን አቃ” ያግስ።

⁷ ሌወይ ባናዉ ደንድን፥ ናኤ አዋይ ቦና መላ ዎስን ቃስካ ያን አቅስ።

⁸ እቻሻን ጋላስ ዎንታ ጉራ ባናዉ ደንድን፥ ናኤ አዋይ፥ “ሀያና፥ ጉ ካ ማዳ፥ ጋሽታዳ ኦማርስ ባ” ያግስ። ኤንቲ ናምአይካ እስፈ ካ ምዶሶና።

⁹ ሌወይ ባ ላገራነ ባ አይልያራ ባናዉ ከይን፥ ናኤ አዋይ፥ “ሄኮ፥ ሳእ ቃምስ፤ ሀእካ አቅተ፤ ዎንታ ጉራ ደንድድ ህንተ ሶ ቢተ” ያግስ።

¹⁰ ሽን እ ያን አቃናዉ ኮይቦና ግሾ ባ ላገዉ፥ ባ አይልያነ ናምኡ ጫነትዳ ሀረታ ኤክድ ያቡሰ ጌተትያ የሩሳላመ ካታማ ጋክዶሶና።

¹¹ ኤንቲ ያቡሰ ማትያ ዎደ ሳእ ዳሮ ኦማርስን፥ አይለይ፥ “ሀይሳን፥ ያቡሰታ ካታማን አቅኮ ዋናኔ?” ያግድ ባ ጎዳ ኦይችስ።

¹² ሽን እያ ጎዳይ፥ “ሀይሳን፥ እስራኤለ አስ ባይና አላጋ ካታማ ቦኮ። ግብአ ካታማ ጋካናዉ ባና” ያግስ።

¹³ ቃስካ ባ አይልያኮ፥ “ሃያ፥ ኑኒ ግብአን ዎይኮ ራማን አቅያ በሲ ደማና” ያግስ።

¹⁴ ሄሳ ግሾ ባንታ ኦግያ ኦይክድ ብዶሶና። ብንያመ ቢታን ግብአ ካታማ ኤንቲ ማትያ ዎደ አው ዉልስ።

¹⁵ ኤንቲ ግብአ ካታማ ገልድ አቃናዉ ያ ብዶሶና። ሄ ካታማ አሳይ ዱላታ ኡትያ በሳን ኡትዶሶና፤ ሽን ኤንታ ባ ሶ ኤፍድ አይስያ አስ በንትቤና።

¹⁶ ኤንቲ ያን ኡትዳሽን፥ ሳእ ኦማርስን ጋደፐ ባ ሶ ስምያ እስ ጭማ አደይ ኤንታ ማታራ አስ። ሀ አደይ ካሰ ደረይ ዳርያ ኤፍሬማ ቢታፈ ይዳ አስ፤ ሽን ሀእ ግብአ ካታማን ደኤስ። ሄ ቢታን ብንያመ ኮቻፈ የለትዳ አሳይ ደኦሶና።

¹⁷ ሄ ጭማ አደይ፥ ካታማ አሳይ ዱላታ ኡትያ በሳን ኡትዳ አድያ በእድ፥ “አዉፐ ያዲ? አዉ ባይ?” ያግድ ኦይችስ።

¹⁸ ሌወይ ዛሪድ፥ “ኑኒ ይሁዳ ቢታን ቤተለመ ካታማፐ ይዳ። ሀእ ደረይ ዳርያ ኤፍሬማ ቢታን፥ ሃሆ በሳን ደእያ ፆሳ ኬነ ኑ ሶ ቦስ። ኑና ባ ሶ ኤፍድ አይስያ አስ ደምቦኮ።

¹⁹ ኑ ሀረታስ ኡቱልነ ካለይ ደኤስ፤ ታዉ፥ ታ ላገስነ ታ አይልያስ ግድያ ካነ ዎይነ ኡሽ ደኤስ፤ ኑስ ኮሽያባ ኡባ ኦይክዳ” ያግስ።

²⁰ ጭማ አደይ፥ “ሳሮይ ህንተዉ ግዶ፤ ታ ሶ የተ፤ ታ ሶን አቅተ፤ ህንተ ኮያባ ኡባ ታ ህንተዉ እማና። ሀ ካታማ ዳባባን ህንተ አቃናዉ በሰና” ያግስ።

²¹ ኤንታ ባ ሶ ኤፍስ፤ ኤንታ ሀረታስ ምያባ የግስ። እማት ባንታ ቶሁዋ ሜጨትድ ካሆ ምዶሶና።

²² ኤንቲ ኡፋይትሽን፥ ካታማፐ ኢታ አሳት ይድ፥ ኬ ተቅድ፥ ፐንግያ ቆፀ ዶምዶሶና። ኤንቲ ጭማ አድያኮ፥ “ሀ ነ ሶ ገልዳ አድያ ሃ ከሳ፤ ኑኒ እያራ ጋሄታናዉ ኮዮስ” ያግዶሶና።

²³ ሄ ኬ ጎዳይ፥ “ሀነና፤ ታ እሻቶ፥ ሄሳ መላ ፓላባ ኦፕተ፤ ሀ አደይ ታ እማ።

²⁴ ሄኮ፥ ታ ጌላኦ ናእያነ እያ ላገያ ሀይሳን ደኦሶና። ታኒ ኤንታ ህንተዉ ካረ ከሳና፤ ህንተ ኤንታ ቦላ ኮይዳባ ኦተ፤ ሽን ሀ አድያ ቦላ ሄሳ መላ ኢታባ ኦፍተ” ያግስ።

²⁵ ሽን አሳት እ ግዳይሳ ስኦና እፅዶሶና። ሌወይ ባ ላገዉ ካረ ሆልስ። ሳእ ዎንታና ጋካናዉ ቃማ ኩመ ታራን ታራን ኢራ ዎልቃን ጋሄትድ፥ እዮ ፓፃ ካእሸ አይስዶሶና፤ ሳእ ዎንታና ሀንሽን እዮ የድ አግዶሶና።

²⁶ ዎንታናዉ ጎንተይ ዞእያ ዎደ ያዳ፥ እ ጎዳይ አቅዳ ጭማ አድያ ኬ ፐንገን ኩንዳሱ፤ ፃልቀይ ዶላና ጋካናዉ ያን ዝንአሱ።

²⁷ ዎንታ እ ጎዳይ ደንድድ፥ ባ ኦግያ ባናዉ ፐንግያ ዶይድ ከይያ ዎደ እያ ላገያ ኬ ፐንገን ባ ኩሽያ ምጫዳ ጉፋንዳሮ በእስ።

²⁸ እ ጎዳይ፥ “ደንዳ፤ አነ ቦስ” ያግስ። ሽን እያ አይኮካ ዛራቡኩ። ያትን፥ እ አሀ ሀረን ጫንድ ባ ሶ ብስ።

²⁹ እ ባ ሶ ጋክዳ ዎደ ማሻ ኤክድ፥ ባ ላገ አሀ ታማነ ናምኡ በሳን ቃንፀረድ፥ እስ እስ ቃንፁዋ ታማነ ናምኡ እስራኤለ ኮቻታስ የድስ።

³⁰ ሄሳ በእዳ ኡባይ፥ “እስራኤለ አሳይ ግብፀ ቢታፈ ከዮደፐ ሀች ጋካናዉ ሀይሳ መላባይ ሀንቤና፤ ኑካ በእቦኮ። አነ ሀይሳ ቆፕ በእድ፥ አኬካን ዞረትድ፥ አይ ኦነኮ ኑስ ኦድተ” ያግዶሶና።