አይሰይሳታ 18 - ጌሻ ማፃፋ

ምካነ ዳነ ኮቻ

¹ ሄ ዎደ እስራኤለ ቢታን ካዎይ ባዋ። ሄ ዎደይ ጋካናዉ ዳነ ኮቻት እስራኤለ ኮቻታ ግዶን ላትዳ ቢት ባዋ። ኤንቲ ባንታዉ ደእያ ቢታ ኮይሸ ደኦሶና።

² ሄሳ ግሾ፥ ዳነ ኮቻት ባንታ ግዶፈ እቻሹ ምኖ ኦላንቾታ ዶርድ ቢታ ዎቻና መላ ፆርአፈነ ኤሽታኦላፐ ኤንታ ኪትዶሶና። ኤንቲ ደረይ ዳርያ ኤፍሬማ ቢታ ጋክድ ምካ ሶን አቅዶሶና።

³ ኤንቲ ምካ ሶን ደእያ ዎደ ሌወ ኮቸ ግድዳ ናአተ እያ ኦዳን ኤርዶሶና። ኤንቲ እያኮ ሺቅድ፥ “ነና ሀይሳ ኤህዳይ ኦኔ? ሀይሳ አይስ ያዲ?” ያግድ ኦይችዶሶና።

⁴ እ ዛሪድ፥ “ሚክ ታዉ ዳሞዘ ቃንፅን፥ ታኒ እያዉ ካህነ ግዳዳ ኦይስ” ያግስ።

⁵ ኤንቲ፥ “ኑኒ ብያ ኦገይ ኑስ ሱራነ፥ ሱረነ ሀያና ኑስ ፆሰ ኦይቻ” ያግዶሶና።

⁶ ካህነይ፥ “ሳሮ ቢተ፤ ህንተ ብያ ኦግያን ጎዳይ ህንተራ ግዳና” ያግስ።

⁷ ሄሳፐ ጉየ፥ እቻሹ አሳት ያፐ ደንድድ፥ ላይሻ ካታማ ጋክዶሶና። ያን ደእያ አሳይ ስዶና ቢታ አሳዳ ሳሮን ደኤይሳ በእዶሶና፤ አሳት ኦንካ ስና ዎፑ ግዳ አስ፤ ኤንታዉ አይኮይካ ፓጮና ኡባባይ ኩምዳ አስ። አይ አሳራካ ጋሄቶና ስዶና አሳፐ ሃክድ ባንታዉ ዱማ ደኦሶና።

⁸ እቻሹ አሳት ፆርአንነ ኤሽታኦላን ደእያ ባንታ እሻታኮ ስምዶሶና፤ ኤንታ እሻት፥ “አይ ዎረ ኤክድ ይደቲ?” ያግዶሶና።

⁹ ኤንቲ ዛሪድ፥ “ቢታይ ዳሮ አራዳ ግደይሳ ኑ በእዳ። አነ ደንድድ ላይሻ ኦሎስ። ሀይሳን ኦሶ ይድ ጮ ኡቶፍተ፤ ኤለ ብድ ኦይክተ።

¹⁰ ህንተ ያ ብድ፥ ኦናነ ስና ኡትዳ አሳኮ ጋካና። ቢታይ ዳልጋ፤ አሳስ ኮሽያ ኡባባይ ሄ ቢታን ደኤስ። ፆሳይ ሄ ቢታ ህንተዉ እሚስ” ያግዶሶና።

¹¹ ያትን፥ ዳነ ኮቻፈ ቶራ ዳንጭዳ ኡሱፑን ፄቱ አሳት ፆርአፐነ ኤሽታኦላፐ ደንድድ ብዶሶና።

¹² ይሁዳ ቢታን ቅርያት-ይኣርማፐ ዉሎሀ ባጋራ ኡትዶሶና። ሄሳ ግሾ፥ ሄ በሳይ ሀች ጋካናዉ ዳነ ጉታ ጌተትድ ፄገቴስ።

¹³ ያፐ ደንድድ ደረይ ዳርያ ኤፍሬማ ቢታን ደእያ ምካ ሶ ይዶሶና።

¹⁴ ላይሻ ቢታ ዎቻናዉ ብዳ እቻሹ አሳት ባንታ እሻታኮ፥ “ሀ በሳን፥ ሀ ኬታፐ እሱዋን ኤፉደይ፥ ሶ ግዶ ኤቃ ምስለትነ ምፈ ኦድ ብራ ሼሽድ ትይዳ ምስለይ ደኤይሳ ኤሬቲ? አነ አይ ኦናዉ ኮሽያኮ ቆፕተ” ያግዶሶና።

¹⁵ ኤንቲ ኦግያፐ ስሚድ፥ ሌወ ኮቸ ግድዳ ናአተ ካህነይ ደእያ ምካ ሶ ብድ እያ ሳሮዶሶና።

¹⁶ ሄ ዎደ ኡሱፑን ፄቱ ዳነ ኦላንቾት ኦላ ሚሸ ኦይክድ ፐንገ ቦላ ኤቅዶሶና።

¹⁷ ኤንቲ ሄ ካህንያራ ያን ኤቅዳሽን፥ ቢታ ዎችያ እቻሹ አሳት ምካ ሶ ገልድ፥ ምፈ ኦድ፥ ብራ ሼሽድ፥ ትይዳ ኤቃ ምስልያ፥ ኤፉድያነ ሶ ግዶ ኤቃ ምስለታ ኤክዶሶና።

¹⁸ ሄ ዎደ ካህነይ ኤንታ፥ “ዋተቲ?” ያግድ ኦይችስ።

¹⁹ ኤንቲ እያ፥ “ሀይዛ፥ እስ ቃላካ ፖጎፓ። ኑራ ባዳ ኑስ አዋነ ካህነ ግዳ። እስ ኬ አሳስ ካህነ ግደይሳፈ እስራኤለ ግድያ እስ ኮቻስ ካህነ ግደይስ ነዉ ሎኤኔ?” ያግዶሶና።

²⁰ ካህነይ ሄሳ ስእድ ኡፋይትድ ኤፉድያ፥ ሶ ግዶ ኤቃ ምስለታነ ምፈ ኦድ ብራ ሼሽድ ትይዳ ምስልያ ኤክድ ኤንታራ ብስ።

²¹ ያፐ ደንድድ፥ ባንታ ናይታ፥ ባንታ መህያነ ባንታዉ ደእያባ ኡባ ስን አድ ብዶሶና።

²² ኤንቲ ምካ ሶፐ ሃክድ ብዳፐ ጉየ፥ ሚክ ባ ሾሮታ ፄግን፥ ዳነ አሳታ ካልድ ጋክዶሶና።

²³ ኤንታ ጋክድ ዋስን፥ ዳነ አሳት ጉየ ስሚድ፥ “ዋናዲ? ሀ አሳ ኡባ አይስ ሺሻዲ?” ያግድ ምካ ኦይችዶሶና።

²⁴ ሚክ ዛሪድ፥ “ታኒ መዳ ታ ፆሳታነ ታዉ ኦያ ካህንያ ቦንቅደታ። ያትን ታዉ አትዳባይ አይቤ? ታና፥ ‘ዎይግድ ዋናድ፥ ጌቲ?’ ” ያግስ።

²⁵ ዳነ አሳት፥ “አነ ዶና ፖጋዳ ነና ኤራ! ሀ ሸነራ ደእያ አሳ ኔኒ ደንኮ፥ ኤንቲ ነ ቦላ ደንዳና፤ ነናነ ሶ አሳ ኡባ ይሳና” ያግዶሶና።

²⁶ ዳነ አሳት ባንታ ኦግያ ብዶሶና። ምክካ ኤንቲ ባፐ ዳሮ ምኖ ግደይሳ በእድ ባ ሶ ስምስ።

²⁷ ዳነ አሳት ሚክ መዳ ፆሳታነ እያ ካህንያ ኤክድ፥ ሌሳን ኦናካ ስና ሳሮ ደእያ አሳታኮ ብድ፥ አሳ ኡባ ማሻን ዎድ ካታማ ታማን ፁግዶሶና።

²⁸ ላይሻ ካታማይ ስዶናፐ ሃክድ ደእያ ግሾነ ኤንቲ ሀራ አሳራ ጋሄትድ ኤሮና ግሾ ኤንታ አሻናዉ ኦንካ ዳንዳእቤና። ላይሻ ካታማይ ቤት-ረሆባ ጌተትያ በሳ ማታን ደእያ ዛንጋራን ደኤስ። ዳነ አሳት ካታማ ዛር ኬፅድ ያን ደእዶሶና።

²⁹ ካታማ ሱን በን ባንታ ማይዛ ያይቆባ ናኣ ዳነ ሱንን ላምድ፥ ዳነ ያግድ ሱንዶሶና፤ ሽን ኮይሮ ሄ ካታማይ ላይሻ ጌተቴስ።

³⁰ ዳነ አሳት ባንታዉ ኤቃ ምስልያ ያን ዎድ፥ ሙሰ ናኣ ገድሶናፐ የለትዳ ዮናታና ባንታ ካህነ ኦዶሶና። እያ ኮቻት አሳይ ድኤትድ ብዳ ዎደ ጋካናዉ ያን ካህነ ግድዶሶና።

³¹ ሄሳዳ ሀንድ፥ ጌሻ ዱንካነይ ሴሎን ደእዳ ላይ ኡባን ሚክ ኦዳ ምስለት ያን ጋምእዶሶና።