አይሰይሳታ 16 - ጌሻ ማፃፋ

ሳምሶናነ ዳልላ

¹ እስ ጋላስ ሳምሶን ፍልስፄመ ካታማ ግድዳ ጋዛ ካታማ ብስ፤ ያን እስ ላይማ ማጫስ በእድ ኢራ አቃናዉ እ ሶ ገልስ።

² ጋዛ ካታማ አሳይ ሳምሶን ኤንታ ካታማ ይዳይሳ ስእድ ኬ ተቅድ ቃማ ኩመ ናግሸ ካታማ ፐንግያን አቅዶሶና። ሳእ ዎንትኮ ዎና ግድ ናግሸ ዶና ጱቆና አቅዶሶና።

³ ሽን ሳምሶን ያን ግድ ብላሄ ጋካናዉ ጋምእስ። ብላሄ ደንድድ ካታማ ድርሳ ፐንግያ፥ ፐንግያ ኦይክያ ናምኡ ቱሳታነ ኮበ ብራታታ እስፈ ሾድስ። ሄ ኡባ ሀሸን ቶክድ ከብሮናፐ ስን ባጋራ ደእያ ዙማ ሁጰ ከስስ።

⁴ ጉ ዎደፐ ጉየ ሳምሶን ሶረቃ ዛንጋራን ደእያ እስ ዳልሎ ጌተትያ ማጫስዉ ዶስስ።

⁵ ፍልስፄመ ሀላቃት ኢኮ ብድ፥ “ኔኒ እያ ጭማዳ፥ ሄ ዎልቃ ኡባ እ አዉፐ ደምያኮነ ኑኒ እያ ዋት ፆንድ ቃቻናዉ ዳንዳእያኮ ኦይቻ። ኑኒ እሶይ እሶይ ነዉ ታማነ እስ ክሎ ግራመ ብራ ሳንትመ እማና” ያግዶሶና።

⁶ ሄሳ ግሾ ዳልላ ሳምሶናኮ፥ “ሀይሳ መላ ምኖተ ነ አዉፐ ደምዳኮ፥ ሀያና ታዉ ኦዳርኪ። አስ ነና ቃችድ ዋትድ ነ ዎልቃ ዳቡርሳናዉ ዳንዳኢ?” ያጋሱ።

⁷ ሳምሶን፥ “ታና ላፑን እርፃ ዳፎራ አስ ቃችኮ ዳቡራዳ ሀራ አሳዳ ሀናና” ያግድ ዛርስ።

⁸ ፍልስፄመ ሀላቃት ዳልላስ ላፑን እርፃ ዳፎታ ኤህን እያ ሳምሶና ቃቻሱ።

⁹ ቆልአን አሰ ቆታ ዎዳ፥ “ሳምሶና፥ ፍልስፄመት ይዶሶና” ጋዳ ፄጋሱ። ሽን ሻሎይ ታም ኦይክን ዱፀረተይሳዳ ዳፎታ ዱሰረ የግስ። ሀእካ እያ ምኖተ ፁራይ ኤረትቤና።

¹⁰ ዳልላ ሳምሶናኮ፥ “ኔኒ ታና ኤያ ኦሳ፤ ነ ታዉ ዎርዶ ኦዳዳሳ። ሀእካ ነና ዋት ቃቻናዉ ዳንዳኤትያኮ ሀያና ታዉ ኦዳ” ያጋሱ።

¹¹ እ ዛሪድ፥ “አስ ጎኤትቦና ኦራ ዎዶሮን ታና ቃችኮ ዳቡራዳ ሀራ አሳዳ ሀናና” ያግስ።

¹² ዳልላ ኦራ ዎዶሮ ኤካዳ ሳምሶና ቃቻሱ። ቆልአን አሰ ቆታ ዎዳ፥ “ሳምሶና፥ ፍልስፄመት ይዶሶና” ያጋሱ። ሽን እ ዎዶሩዋ ባ ቀስያፐ ሻሎዳ ዱሰረ የግስ።

¹³ ዳልላ ሳምሶናኮ፥ “ሀእ ጋካናዉ ነ ታና ጭማሳ፤ ኔኒ ታዉ ዎርዶ ኦዳዳሳ። ሀእካ ነና ዋትድ ቃቻናዉ ዳንዳኤትያኮ ሀያና ታዉ ኦዳ” ያጋሱ። እ ዛሪድ፥ “ታ ሁጵያ ላፑን ብናና ዳታ ቃጭናራ ጋዳ፥ ቁፃራዳ ዳድኮ፥ ታኒ ዳቡራዳ ሀራ አሳዳ ሀናና” ያግስ።

¹⁴ ሄሳፈ ጉየ፥ ሳምሶን ስክዳሽን፥ ዳልላ እያ ሁጵያ ላፑን ብናና ዳታ ቃጭናራ ጋዳ ዶቃሱ። ሄሳፈ ጉየ፥ “ሳምሶና፥ ፍልስፄመት ይዶሶና” ያጋሱ። እ ስኮፈ ባርክድ፥ ባ ብናናይ ዶቀትድ ቶለትዳ በሳፈ ሾድ ኤክስ።

¹⁵ ያትን እያ፥ “ነ ዎዛናይ ታራ ዴና፥ ‘ዎይጋዳ ታ ነና ዶሳይስ’ ጋይ? ሄ ቶሆ ታና ጭማዳሳ። ኔኒ ሀ ምኖተ አዉፐ ደምያኮ ታዉ ኦዳ” ያጋሱ።

¹⁶ ጋላስ ጋላስ ኦይቻዳ እ ሀይቆ አሞታና ጋካናዉ እያ ዋይሳሱ።

¹⁷ ዉርሰን ሳምሶን፥ “ታ አየ ኡሎፐ ዶምን ታኒ ፆሳስ ዱማትዳ ናዝራወ ግድዳ ግሾ፥ ታ ሁጰ ብናናይ ሜደትድ ኤረና። ታ ብናናይ ሜደትኮ፥ ታ ዎልቃይ ታፐ ኤከትን፥ ታኒ ዳቡራዳ ሀራ አሳዳ ሀናና” ያግድ፥ ባ ፁራ ኡባ እዉ ኦድስ።

¹⁸ ባ ዎዛናን ደእያባ ኡባ እ ኦድዳይሳ ዳልላ በእዳ ዎደ፥ “ባ ዎዛናን ደእያባ ኡባ ታዉ ኦድዳ ግሾ፥ አነ እስ ቶሆ ስሚድ ዪተ” ያጋዳ ፍልስፄመ ሀላቃታስ ኪታ የድን ኤንቲ ብራ ኤክድ ኢኮ ይዶሶና።

¹⁹ ዳልላ ሳምሶና ባ ዎድረ ቦላ ስክሳዳ እስ አስ ፄግን ይድ፥ እያ ሁጵያ ላፑን ዳ ብናና ሜድን እያ ዎልቃይ እያፐ ይስ። ሄሳፈ ጉየ፥ እያ ዋይሶ ዶማሱ።

²⁰ እያ፥ “ሳምሶና፥ ፍልስፄመት ይዶሶና” ያጋሱ። እ ስኮፈ ባርክድ፥ ካሰይሳዳ ዱሰረዳ ባና ያግድ ቆፕስ፤ ሽን ጎዳይ እያፐ ሻከትዳይሳ ኤርቤና።

²¹ ፍልስፄመት እያ ኦይክዳፐ ጉየ፥ እያ ናምኡ አይፈታ ዎጭ ከስዶሶና። ጋዛ ካታማ ኤፍድ ናሰ ብራታ ሳንላታን ቃችድ ቃሾ ኬን ካ ጋጭስዶሶና።

²² ኤንቲ እያ ሁጵያ ብናና ሜድዳፐ ጉየ፥ ብናናይ ስሚድ ዶሎ ዶምስ።

ሳምሶና ሀይቁዋ

²³ ፍልስፄመ ሀላቃት፥ “ኑ ፆሳይ ኑ ሞርክያ ሳምሶና ኑ ኩሸን አድ እሚስ” ያግድ ባንታ ፆሳ ዳጎናስ ያርሾ ያርሻናዉነ ኡፋይታናዉ እስፈ ሺቅዶሶና።

²⁴ አስ ኡባይ እያ በእዳ ዎደ፥ “ኑ ቢታ ይስዳነ ኑፐ ዳሮታ ዎዳ ኑ ሞርክያ፥ ኑ ፆሳይ ኑ ኩሸን አድ እሚስ” ያግድ ባንታ ፆሳ ጋላትዶሶና።

²⁵ ኤንቲ ዳሮ ኡፋይትዳ ግሾ፥ “ዱርድ ኑና ኡፋይሳና መላ ሳምሶና ፄግተ” ያግዶሶና። ሳምሶና ቃሾ ኬፈ ፄግድ ኤህን፥ እ ኤንታ ስንን ዱርዳፐ ጉየ ቱሳታፐ ግዶን ኤስዶሶና።

²⁶ ሳምሶን ባ ኩሽያ ኦይክድ ካለያ ናኣኮ፥ “ታኒ ኤንታን ዘምፓዳ ኤቃና መላ ኬ ቶክዳ ቱሳታ ታና ኦይ” ያግስ።

²⁷ ኬ ግዶን አደይነ ማጫስ፥ ሄሳዳካ ፍልስፄመ ሀላቃት ኡባይ ኩምድ ደኦሶና። ሳምሶን ዱርሽን፥ ፖቅያ ቦላ ኡትድ በእያ ሄ ሙኩሉ ግድያ አደይነ ማጫስ በኦሶና።

²⁸ ሄ ዎደ ሳምሶን፥ “አቤት ኡባ ሃርያ ጎዳዉ፥ ታና ቆፓርክ። አቤት ፆሳዉ፥ ፍልስፄመት ታ ናምኡ አይፈታ ከስዳ ግሾ፥ ሀሎ ከያና መላ ታና እስ ቶሆ ምንርክ!” ያግድ ጎዳ ዎስስ።

²⁹ ሳምሶን ኬ ቶክዳ ግዶ ቱሳታ ናምኣካ ኦይክስ። እሱዋ ኡሻቻ ኩሸን፥ እሱዋ፥ ሀድርሳ ኩሸን ኦይክዳፐ ጉየ፥

³⁰ “ታኒ ፍልስፄመታራ እስፈ ሀይቃና” ያግድ ዋስስ። ባዉ ደእያ ዎልቃ ኡባን ሱግን፥ ኬይ ሀላቃታ ቦላነ ጋርሳን ደእያ አሳ ኡባ ቦላ ኩንድስ። ሳምሶን ፓፃ ደእሸ ዎዳ አሳፐ ሀይቅሸ ዎዳ አሳይ ዳሮ።

³¹ እያ እሻትነ እያ ዳቦት ኡባይ ይድ፥ እያ አሀ ኤክዶሶና። ፆርአፈነ ኤሽታኦላፐ ግዶን እያ አዋ ማኑሄ ዱፉዋን ሞግዶሶና። ሳምሶን እስራኤለ ላታሙ ላይ አይስስ።